အာဆင်နယ် နောက်ခံလူ ရီကာဒိုကာလာဖီအိုရီက နည်းပြ မီကယ်အာတီတာ ပြီးခဲ့တဲ့နွေရာသီက ဘိုလော့ဂ်နာအသင်းကနေ ပေါင် ၄၂ သန်းနဲ့ ခေါ်ယူခဲ့တဲ့ကိစ္စနဲ့ပတ်သက်ပြီး  ဖွင့်ဟပြောကြားခဲ့ပါတယ်။ Rivista Undici e Cronache အီတလီမဂ္ဂဇင်းနဲ့ အင်တာဗျူးမှာ အသက် ၂၂ နှစ်အရွယ် ကစားသမားက အာတီတာရဲ့ ကိုယ်ပိုင်ချဉ်းကပ်မှုက အပြောင်းအရွှေ့ဆွေးနွေးမှုတွေမှာ အတော်လေး အထင်ကြီးစေခဲ့တယ်လို့ ဆိုပါတယ်။

ကာလာဖီအိုရီက "တစ်နေ့ကျတော့ ဖုန်းဆက်ပြီး ကျွန်တော့်မိသားစုဓာတ်ပုံတချို့ကို အာတီတာကပို့ပေးပြီး မိသားစုဝင်တစ်ယောက်စီတိုင်းက ကျွန်တော့်အတွက် ဘာကိုဆိုလိုလဲလို့မေးပါတယ်။ ဒီလိုမျိုးကိစ္စမျိုးက ကျွန်တော့်ဘဝမှာ တစ်ခါမှမကြုံဖူးဘူး။ ဒီအချက်တစ်ခုတည်းနဲ့ သူက ကျွန်တော့်ကို သဘောတူအောင် ပြောနိုင်ခဲ့တယ်လို့ မဆိုလိုပါဘူး။ ဒါပေမဲ့ အဲဒါကတော့ အရေးပါတဲ့ အခိုက်အတန့်တစ်ခုတော့ ဖြစ်ခဲ့ပါတယ်" လို့  ရှင်းပြပါတယ်။

မိသားစုကို အဓိကထားတဲ့ ဒီလိုကစားသမားခေါ်ယူမှုနည်းဗျူဟာက အာတီတာရဲ့ ပုံမှန်မဟုတ်တဲ့ နည်းလမ်းတွေနဲ့ ပတ်သက်ပြီး နာမည်ကြီးလာစေပါတယ်။ အဲ့ဒီနည်းလမ်းတွေထဲမှာ 'Win' လို့ အမည်ပေးထားတဲ့ ခွေးတစ်ကောင်ကို လေ့ကျင့်ရေးကွင်း ခေါ်လာတာ၊ လေ့ကျင့်ရေးကွင်းမှာ နှစ် ၁၅၀ သက်တမ်းရှိတဲ့ သံလွင်ပင်တစ်ပင် စိုက်ပျိုးတာ၊ အသင်းသားတွေရဲ့ ပတ်ဝန်းကျင်အသိစိတ်ကို မြှင့်တင်ဖို့အတွက် ခါးပိုက်နှိုက် ငှားရမ်းတာတွေလည်း ပါဝင်ပါတယ်။

ဒါ့အပြင် ကာလာဖီအိုရီက အသင်းရဲ့ ကစားသမားတွေအပေါ် ဂရုစိုက်တဲ့ သဘောထားကိုလည်း အလေးပေးပြောကြားခဲ့ပါတယ်။ ကာလာဖီအိုရီက "ကျွန်တော့်စိတ်ထဲမှာ အရင်ဆုံးပေါ်လာတာက စနစ်တကျရှိတာပါပဲ။ ကွင်းထဲမှာရော၊ အထူးသဖြင့် ကွင်းပြင်ပမှာပါ ကစားသမားတစ်ယောက်ချင်းစီကို ဘယ်လောက်အထိ ဂရုစိုက်လဲဆိုတာပါပဲ"လို့ ဆက်ပြောပါတယ်။

ဒီရာသီမှာ ဒဏ်ရာပြဿနာတွေနဲ့ ရင်ဆိုင်ခဲ့ရပေမဲ့ အီတလီလက်ရွေးစင်ကစားသမားဟာ နောက်ပိုင်းပွဲစဉ်တွေမှာ ပွဲထွက်ခွင့်ပြန်ရလာပြီး အရေးပါတဲ့ ဂိုးတွေကိုပါ သွင်းယူလာနိုင်ခဲ့ပါတယ်။ ကာလာဖီအိုရီက အာတီတာနဲ့ သူ့ရဲ့ ယခင်နည်းပြတွေဖြစ်တဲ့ သီယာဂိုမော့တာ၊ စပယ်လက်တီ တို့ကြောင့် သူ့ရဲ့ခြေစွမ်းတိုးတက်လာပုံကို ချီးကျူးခဲ့ပါတယ်။ 

ကာလာဖီအိုရီက "သီယာဂိုမော့တာ ပြီးတော့ စပယ်လက်တီ နဲ့ အာတီတာတို့က ကျွန်တော့်ကို အများကြီး ပြောင်းလဲစေခဲ့တယ်။ ပွဲကစားပုံ အမြင်၊ နေရာယူပုံ အစရှိတဲ့ အရာတွေအားလုံးမှာပါပဲ"လို့ ပြောခဲ့ပါတယ်။