ဘရာဇီးအသင်းအတွက် ကမ္ဘာ့ဖလားခြေစစ်ပွဲစဉ်တွေမှာ အကြီးမားဆုံးရှုံးနိမ့်မှုအဖြစ် ဗျူနိုအေရိစ်မှာ ခါးသီးပြိုင်ဘက်အာဂျင်တီးနားကို ၄-၁ ဂိုးဖြင့် မရှုမလှအရေးနိမ့်ခဲ့ပြီးနောက် ဘရာဇီးကပ္ပတိန်မာကွင်ဟို့စ်က အသင်းပရိသတ်တွေကို တောင်းပန်ခဲ့ပါတယ်။

ကမ္ဘာ့ဖလားငါးကြိမ်ဆုရှင်ဘရာဇီးက နောက်ဆုံးကစားခဲ့တဲ့လေးပွဲမှာ တစ်ပွဲသာ အနိုင်ရရှိပြီး မာကွင်ဟို့စ်ကလည်း ကိစ္စတိုင်းကို တက်နိုင်သမျှအမြန်ဆုံးပြုပြင်ပြောင်းလဲသွားရန် အသင်းဖော်တွေဆီ တိုက်တွန်းခဲ့ပါတယ်။ ဘရာဇီးအခြေစိုက် TV Globo နဲ့တွေ့ဆုံချိန် မာကွင်ဟို့စ်က “ ဒီနေ့လုပ်ခဲ့တဲ့အရာမျိုးကို နောက်တစ်ကြိမ်ထပ်လုပ်သွားလို့ မရပါဘူး။ အခုလိုပူလောင်ရတဲ့အခိုက်အတန့်မျိုးမှာ ဒီအကြောင်းပြောရတာ ခက်ခဲလွန်းပါတယ်။ ရှက်စရာကောင်းပါတယ်။ ပွဲစတင်ချိန်မှာကတည်းက ကျွန်တော်တို့အသင်းကစားပုံ ဆိုးရွားခဲ့ပါတယ်။ကျွန်တော်တို့သတ်မှတ်ထားတဲ့ စံနှုန်းတွေအောက်မှာ ရောက်ရှိနေခဲ့ပြီး ပြိုင်ဘက်ကို ယုံကြည်မှုအပြည့်နဲ့ ရှေ့ဆက်စေခဲ့ပါတယ်။ သူတို့တွေက စနစ်တကျဘယ်လိုကစားရမလဲဆိုတာ သိထားကြပါတယ်။ ကျွန်တော်တို့အသင်းပရိသတ်တွေကို တောင်းပန်ပါတယ်”လို့ ပြောပါတယ်။

၂၀၂၄ ခုနှစ်အစောပိုင်း ရာထူးလက်ခံပြီးနောက် ၁၆ ပွဲကိုင်တွယ်ရာမှာ ခုနစ်ပွဲသာ အနိုင်ရရှိထားတဲ့ နည်းပြ ဒိုရီဗယ်လ်ဂျူနီယာကိုယ်တိုင်လည်း ဘရာဇီးအမာခံပရိသတ်တွေရဲ့ယုံကြည်မှုရရှိဖို့ မစွမ်းဆောင်နိုင်ခဲ့ပါဘူး။ မာကွင်ဟို့စ်က “ အခုက နည်းပြရဲ့အမှားတင်မဟုတ်ပါဘူး၊ ကစားသမားတွေရဲ့အမှားလည်း ပါဝင်ပါတယ်။ ဘောလုံးမှာ ရွေးချယ်မှုတစ်ခုကို အလုပ်ဖြစ်လာအောင် လုပ်ဆောင်နိုင်တဲ့ လျှို့ဝှက်ဖော်မြူလာဆိုတာ မရှိပါဘူး။ ကျွန်တော်တို့ အခုထက်ပိုကောင်းအောင် လုပ်သွားနိုင်ပါတယ်။ အခုပွဲစဉ်အတွက် အပြစ်တွေကိုလည်း မျှဝေခံစားသွားရပါမယ်။ ဒါကသာ လက်ရှိအခိုက်အတန့်ကိုနားလည်ထားတဲ့ ရိုးသားနှိမ့်ချမှုဖြစ်ပါတယ်”လို့ ပြောပါတယ်။

အခုပွဲစဉ်ရလဒ်ပိုင်းနဲ့အတူ အာဂျင်တီးနားက ၂၀၂၆ ကမ္ဘာ့ဖလားပြိုင်ပွဲဆီ တိုက်ရိုက်ဝင်ခွင့်ရရှိခဲ့ပြီး ဘရာဇီးကတော့ မြောက်အမေရိကခရီးစဉ်အလိုအလျောက်လိုက်ပါခွင့်ရရှိဖို့ လုပ်ဆောင်ရမယ့်အရာတွေ ရှိလာခဲ့ပါတယ်။လက်ရှိမှာ ဘရာဇီးက တောင်အမေရိကဇုန်ခြေစစ်ပွဲအမှတ်ပေးဇယားရဲ့စတုတ္ထနေရာမှာ ရပ်တည်နေပြီး အဆင့်-၇ မှာ ရပ်တည်နေတဲ့ ဗင်နီဇွဲလားထက် ခြောက်မှတ်သာ အသာစီးရရှိထားပါတယ်။ တောင်အမေရိကဇုန်သတ္တမနေရာမှာ ရပ်တည်နိုင်တဲ့အသင်းက ၂၀၂၆ ကမ္ဘာ့ဖလားဝင်ခွင့်အတွက် Inter-Confederation Play-off ပွဲစဉ်တွေကို ယှဉ်ပြိုင်သွားရပါလိမ့်မယ်။