နူအာဟာ ဂျာမနီလက်ရွေးစင်အသင်းရဲ့ ဂိုးသမားပြဿနာကို ဖြေရှင်းနိုင်မယ့် တစ်ဦးတည်းသော အဖြေဖြစ်တယ်လို့ ဘက်စ်တီယန် ရှဝိန်စတိုင်ဂါက ယုံကြည်နေပါတယ်။

ဂျာမနီရဲ့ ဂိုးသမားနေရာနဲ့ပတ်သက်ပြီး ဆွေးနွေးမှုတွေ ရှိနေချိန်မှာ ဂျာမနီလက်ရွေးစင်ဟောင်း ရှဝိန်စတိုင်ဂါက နူအာကို လက်ရွေးစင်အသင်းကို အံ့အားသင့်ဖွယ် ပြန်လာဖို့ အများရှေ့မှာ ထောက်ခံပြောကြားခဲ့ပါတယ်။ ရှဝိန်စတိုင်ဂါဟာ ဂျာမနီရဲ့ ကမ္ဘာ့ဖလားခြေစစ်ပွဲပွဲစဉ်ဖြစ်တဲ့ စလိုဗက်ကီးယားနဲ့ပွဲစဉ်မတိုင်ခင် အခုလို မှတ်ချက်ပေးခဲ့တာ ဖြစ်ပါတယ်။ ဂျာမနီရဲ့ ပုံမှန် နံပါတ် ၁ ဂိုးသမား မာ့ခ်-အန်ဒရီ တာစတီဂန်ဟာ ဘာစီလိုနာမှာလည်း ပွဲထွက်ခွင့် ဆုံးရှုံးခဲ့သလို ခါးဒဏ်ရာကြောင့် အနားယူနေရတာကြောင့် အများကြားထဲမှာ ဂိုးသမားနဲ့ပတ်သက်တဲ့ ဆွေးနွေးမှုတွေ ပြန်လည်ဖြစ်ပေါ်လာခဲ့တာပဲ ဖြစ်ပါတယ်။

ARD သတင်းဌာနနဲ့ ပြောကြားရာမှာ ဂျာမနီရဲ့ ဂိုးသမားအခြေအနေအတွက် သူ့ရဲ့အမြင်ကတော့ တစ်ခုတည်းသော ရွေးချယ်မှုပဲ ရှိတယ်လို့ ရှဝိန်စတိုင်ဂါက ရှင်းရှင်းလင်းလင်း ပြောကြားခဲ့ပါတယ်။

‘ဒီအကြောင်းအရာနဲ့ပတ်သက်လာရင် ကျွန်တော် အမြဲတမ်း ဂျာမနီနိုင်ငံကူးလက်မှတ် ဘယ်သူတွေ ရှိသလဲဆိုတာကို ကြည့်ပါတယ်။ အဲဒီနောက်မှာ နူအာဆီ ရောက်သွားတယ်။ သူဟာ ပြီးခဲ့တဲ့ ကလပ်ကမ္ဘာ့ဖလားမှာ သူ့ရဲ့ထူးခြားတဲ့ စွမ်းဆောင်ရည်ကို ပြသနိုင်ခဲ့ပါတယ်။ သူ့ကို ဂျာမနီအသင်းထံ ပြန်ခေါ်မယ်။ သူ့မှာ အရည်အသွေးရှိတယ်။ တစ်ကြိမ် ကမ္ဘာ့ဖလားချန်ပီယံဖြစ်ခဲ့ရင် အဲဒီခံစားချက်ကို ထပ်ပြီး ခံစားချင်ကြပါတယ်။ ဒုတိယနဲ့ တတိယအကြိမ်အဖြစ် ခံစားရနိုင်မယ့် အခွင့်အရေးရှိတယ်’လို့ ရှဝိန်စတိုင်ဂါက ပြောကြားခဲ့ပါတယ်။

ဂျာမနီဘောလုံးအဖွဲ့ချုပ် ကတော့ ၂၀၂၆ ကမ္ဘာ့ဖလား နီးကပ်လာတာနဲ့အမျှ ဂိုးသမားပြဿနာကို ရင်ဆိုင်နေရပါတယ်။ တာစတီဂန်ရဲ့ ခါးခွဲစိတ်မှုနဲ့ ဒူးဒဏ်ရာဟောင်းတွေကြောင့် ပွဲကစားချိန် နည်းပါးနေခဲ့ပြီး၊ ဘာစီလိုနာအသင်းမှာလည်း ပွဲထွက်ခွင့် ဆုံးရှုံးခဲ့တာကြောင့် ဒီအခြေအနေက ပိုပြီး ဆိုးရွားလာခဲ့ပါတယ်။ ဒါကလည်း တခြားသူတွေအတွက် နံပါတ် ၁ ဂျာစီရရှိဖို့ အခွင့်အရေး ဖန်တီးပေးလိုက်တာပဲ ဖြစ်ပါတယ်။

ဂျာမနီနည်းပြ ဂျူလီယန် နာဂယ်စ်မန်းကတော့ ကြံ့ခိုင်မှုအပြည့်အဝရှိပြီး ပွဲကစားထားတဲ့ တာစတီဂန်ဟာ သူ့ရဲ့ပထမဆုံးရွေးချယ်မှုအဖြစ် ရှိနေဆဲဖြစ်ကြောင်း ပြောကြားထားပေမယ့် ဘာစီလိုနာ ဂိုးသမားရဲ့ ရေရှည်အတွက် ရရှိနိုင်မှုကတော့ သံသယဖြစ်ဖွယ်ရှိနေပါပြီ။ ဒါကလည်း နူအာကို ပြန်ခေါ်ဖို့ ရှဝိန်စတိုင်ဂါ အပါအဝင် လူအများအပြားကို ကြည့်မိစေခဲ့တာပါ။ နူအာကတော့ ၂၀၂၄ နွေရာသီမှာ ဂျာမနီအိမ်ကွင်း ယူရိုပြိုင်ပွဲအပြီး လက်ရွေးစင်ဘဝကနေ တရားဝင် အနားယူခဲ့သူဖြစ်ပါတယ်။ သူ့ရဲ့အသက်အရွယ် ကြီးနေပေမယ့်လည်း နူအာဟာ ကလပ်ကမ္ဘာ့ဖလားပွဲစဉ်အပါအဝင် ဘိုင်ယန်မြူးနစ်မှာ ကမ္ဘာ့အဆင့်မီ လက်စွမ်းတွေကို ပြသနေပါတယ်။

တာစတီဂန် ရေရှည်အနားယူရတော့မှာဖြစ်တဲ့အတွက် နာဂယ်စ်မန်းဟာ ဟော်ဖန်ဟိမ်းအသင်းက အိုလီဗာ ဘော့မန်းကို ဂိုးသမားနေရာမှာ အစားထိုး အသုံးပြုထားပါတယ်။ ဒါပေမဲ့ နူအာရဲ့ လက်ရွေးစင်အသင်းကို ပြန်လာနိုင်ခြေရှိတဲ့အကြောင်း ဆွေးနွေးမှုတွေက ဆက်ပြီး ရှိနေနိုင်ဖွယ်ရှိနေပြီး အထူးသဖြင့် ဂျာမနီအသင်းဟာ လာမယ့် ခြေစစ်ပွဲ ပွဲစဉ်တွေမှာ ရုန်းကန်ရမယ်ဆိုရင်တော့ ဒီအကြောင်းအရာက ပိုပြီး အရှိန်ရလာနိုင်ပါတယ်။

၂၀၁၄ ကမ္ဘာ့ဖလားမှာ ရှဝိန်စတိုင်ဂါနဲ့ အသင်းဖော်ဖြစ်ခဲ့တဲ့ နူအာဟာ ၂၀၂၄ ခုနှစ် နွေရာသီမှာ ဂျာမနီအိမ်ကွင်း ယူရိုပြိုင်ပွဲအပြီးမှာ လက်ရွေးစင်အသင်းအတွက် ၁၂၄ ပွဲ ကစားပြီးနောက် အနားယူခဲ့ပါတယ်။ ဘိုင်ယန်အသင်းခေါင်းဆောင်ကို လက်ရွေးစင်အသင်းထံ ပြန်လာဖို့ စည်းရုံးတာဟာ ပြဿနာတစ်ခု မဖြစ်နိုင်ဘူးလို့ ရှဝိန်စတိုင်ဂါက ယုံကြည်နေပါတယ်။ ‘သူက ကြံ့ခိုင်မှုအပြည့်ရှိတယ်။ ထိပ်တန်းအဆင့်မှာ ကစားနိုင်တယ်။ ဘာလို့ မဖြစ်နိုင်ရမှာလဲ’လို့ သူက ပြောပါတယ်။