ဒဏ်ရာထပ်ရသွားလို့ ဇန်နဝါရီလလယ်အထိ အနားယူရဦးမယ့် ကိုင်ဟာဗက်ဇ်
အာဆင်နယ်တိုက်စစ်မှူး ကိုင်ဟာဗက်ဇ်ဟာ ပြီးခဲ့တဲ့လက ဒူးခွဲစိတ်မှုအသေးစားကနေ ပြန်လည်ကောင်းမွန်လာဖို့ ကြိုးစားနေစဉ် ဒဏ်ရာထပ်ရခဲ့တာကြောင့် ဇန်နဝါရီလလယ်အထိ အနားယူရဦးမှာဖြစ်ပါတယ်။ ဂျာမန်သားဟာ ဒီနှစ်ရာသီ ပရီးမီးယားလိဂ် ပထမဆုံးပွဲစဉ်ဖြစ်တဲ့ သြဂုတ်လ ၁၇ ရက်နေ့က မန်ချက်စတာယူနိုက်တက်နဲ့ပွဲမှာ ဒူးဒဏ်ရာရရှိခဲ့ပြီးနောက် ကစားနိုင်ခြင်းမရှိခဲ့ပါဘူး။ အဲဒီနောက် တစ်ပတ်အကြာမှာ ဟာဗက်ဇ်ဟာ ဒူးခွဲစိတ်မှုခံယူခဲ့ရပါတယ်။
Daily Mail ရဲ့ ဖော်ပြချက်အရ ၂၆ နှစ်အရွယ် ဂျာမန်ကစားသမားဟာ နောက်ဆုံးလေ့ကျင့်ခန်းအစီအစဉ်တွေမှာ ပြဿနာတစ်ခုမဖြစ်ခင် ပွဲထွက်လူစာရင်းကို ပြန်လာဖို့ တစ်ပတ်သာ လိုတော့တာဖြစ်ပါတယ်။ ဂျာမန်ကစားသမားဟာ လာမယ့်လလယ်ပိုင်းမှာ အသင့်ဖြစ်ဖို့ ရည်မှန်းထားပါတယ်။ ဒဏ်ရာထပ်ရပြီးကတည်းက ဟာဗက်ဇ်စတ်ယောက် လေ့ကျင့်ခန်းပြန်မဆင်းနိုင်သေးပါဘူး။
ဟာဗက်ဇ်ဟာ ဇန်နဝါရီ ၈ ရက်နေ့ လီဗာပူးနဲ့ကစားမယ့် လိဂ်ပွဲစဉ်အတွက် အာဆင်နယ်အသင်းမှာ ပါဝင်နိုင်ဖို့ အခွင့်အရေးရှိပေမဲ့ သုံးရက်အကြာမှာ ကစားမယ့် ပို့စ်မောက်နဲ့ FA ဖလား တတိယအဆင့်ပွဲစဉ်က ပိုပြီးဖြစ်နိုင်ခြေရှိပါတယ်။ ဟာဗက်ဇ် အနားယူနေရချိန်မှာ ဝီလျံဆာလီဘာနဲ့ ဂါဘရီယယ်ဂျီးဆပ်စ်တို့ ဒီလထဲမှာ ပြန်လာနိုင်ခဲ့ပါတယ်။ ဟာဗက်ဇ်ရဲ့ ဒဏ်ရာအခြေအနေက ပရီးမီးယားလိဂ်ဖလားအတွက် တိုက်ပွဲဝင်နေတဲ့ အာဆင်နယ်နည်းပြ မီကယ်အာတီတာအတွက် ထိုးနှက်ချက်တစ်ခုဖြစ်ပါတယ်။
အာဆင်နယ်အသင်းဟာ မကြာသေးခင်က ဒဏ်ရာအကျပ်အတည်းနဲ့ ရင်ဆိုင်ခဲ့ရပါတယ်။ ဒီလထဲမှာ ဗစ်တာယောကရက်စ်၊ နိုနီမာဒူကီ၊ ဂါဘရီယယ်ဂျီးဆပ်စ်နဲ့ ဝီလျံဆာလီဘာတို့အပါအဝင် ကစားသမားအများအပြား ပြန်လာနိုင်ခဲ့ပါတယ်။ ဒါပေမဲ့ အသင်းမှာ ဟာဗက်ဇ်၊ ဂါဘရီယယ်မာဂယ်ဟေးစ်၊ ခရစ်စတီယန်မော့စ်ကွီရာ၊ ဘန်ဝှိုက်နဲ့ မက်စ်ဒေါင်းမန်းတို့အားလုံး လက်ရှိမှာ ဒဏ်ရာကြောင့် အနားယူနေရပါတယ်။
