ဒီနေ့မနက်ပိုင်း၊ ယူရိုပါလိဂ်နောက်ဆုံး ၁၆ သင်းရှုံးထွက်ဒုတိယအကျော့ပွဲစဉ်မှာ တော့တင်ဟမ်က အယ်လ်ခမာကို ၃-၁ ဂိုး(နှစ်ကျော့ပေါင်းရလဒ် ၃-၂ ဂိုး)ဖြင့် အနိုင်ယူပြီး ဖရန့်ဖတ်နဲ့ရင်ဆိုင်ရမယ့် ကွာတားဖိုင်နယ်အဆင့်ဆီ တက်လှမ်းသွားခဲ့ပါတယ်။ ဒီပွဲစဉ်အပြီး ပိုစတီကိုဂလူက အဓိကကစားသမားအချို့ ဒဏ်ရာပြဿနာမှပြန်လာနိုင်ခြင်းနဲ့အတူ လတ်တလောတိုးတက်လာမှုတွေမှာ တိုက်ဆိုင်မှုဆိုတာ မရှိပါဘူးလို့ ပြောပါတယ်။

တောင်ပံကစားသမားအိုဒိုဘတ်ရဲ့သွင်းဂိုးနှစ်ဂိုးနဲ့အတူ မက်ဒီဆင်ရဲ့သွင်းဂိုးတွေက မြောက်လန်ဒန်အရပ်မှာ ပိုစတီကိုဂလူရဲ့အသင်းအတွက် အရေးပါတဲ့နိုင်ပွဲတစ်ခု ဖန်တီးပေးခဲ့ပါတယ်။
ရိုမဲရိုး၊ ဗန်ဒီဗန်၊ ဆိုလန်ကီတို့အပါအဝင် အဓိကကစားသမားအများစုလက်လွှတ်ခဲ့ရတဲ့ ဒဏ်ရာပြဿနာအကျပ်အတည်းတစ်ခုက အသင်းအတွက် စိတ်ပျက်စရာပရီးမီးယားလိဂ်ဘောလုံးရာသီကို ယူဆောင်လာခဲ့ပါတယ်။ အခုအချိန်မှာတော့ အဓိကကစားသမားအချို့ ပြန်လာနိုင်မှုနဲ့အတူ ပိုစတီကိုဂလူက အပေါင်းလက္ခဏာဆောင်တဲ့ ရာသီပိတ်သိမ်းချိန်ကာလတစ်ခုဖြစ်ပေါ်လာဖို့ မျက်စိကျနေပါတယ်။

ပွဲပြီးသတင်းစာရှင်းလင်းပွဲအတွင်း တော့တင်ဟမ်အသင်းမှာ ယခင်လိုပုံစံကောင်းပြန်ရနေပြီဆိုတဲ့ ခံစားမှုမျိုး ရှိနေသလားလို့ မေးမြန်းမှုကို ပိုစတီကိုဂလူက “ဟုတ်ပါတယ်၊ ဒါက တိုက်ဆိုင်မှုမဟုတ်ပါဘူး။ ကျွန်တော်တို့ရဲ့ အဓိကကစားသမားအချို့ ပြန်လာနိုင်ပြီးနောက် အရင်လိုပုံစံကောင်းပြန်ရနေပြီလို့ ခံစားမိတယ်ဆိုတာ မှန်ပါတယ်။ ပွဲတွေ ဆက်တိုက်ကစားရင်းနဲ့မှ ပြန်ကောင်းလာတဲ့သူတွေလည်း ရှိပါတယ်။ ဒါက အသင်းကို အနည်းအကျဉ်းလောက်တော့ အပြောင်းအလဲဖြစ်စေပါတယ်။ ပြီးခဲ့တဲ့သီတင်းပတ်ကုန်ပွဲစဉ်မှာ ဆွန်ဟောင်မင်နဲ့ မက်ဒီဆင်တို့ ပွဲထွက်လူစာရင်းမှာ မပါဝင်ခဲ့ဘူးဆိုတာ မမေ့ပစ်လိုက်ပါနဲ့။

ကျွန်တော်တို့အသင်းပြင်ဆင်နိုင်ဖို့အတွက် ခွင့်ပြုပေးထားတဲ့အရာတွေကို လုပ်ဆောင်လာနိုင်ပါတယ်။ ကိုယ့်ကိုယ်ကိုယ် ပြန်မြင်တွေ့လာရတာမျိုး ဖြစ်ခဲ့ပေမယ့် ကျွန်တော်တို့ ဖြတ်ကျော်ရမယ့် အဆင့်တွေလည်း ကျန်ရှိနေပါသေးတယ်။ ဘာကြောင့်လဲဆိုတော့ ရိုမဲရိုး၊ ဗန်ဒီဗန်၊ ဝီလ်ဆင်နဲ့ ဆိုလန်ကီတို့လို ကစားသမားတွေအပါအဝင် ကစားသမားအများစုက ကြံ့ခိုင်မှုပိုင်းအပြင် ပွဲနဲ့လိုက်လျောညီထွေဖြစ်အောင် တည်ဆောက်နေရတုန်းပဲလို့ ယူဆမိလို့ ဖြစ်ပါတယ်။ 
ကွာတားဖိုင်နယ်က သီတင်းပတ်သုံးပတ်ခွဲလောက် စောင့်ရပါဦးမယ်။ ဒါကြောင့် အဲ့ဒီပွဲစဉ်တွေအတွက် ကောင်လေးတွေပြင်ဆင်နိုင်ဖို့ အခွင့်အရေးတစ်ခု ရှိပါတယ်”လို့ တုံ့ပြန်ဖြေကြားပါတယ်။

အယ်လ်ခမာကိုအနိုင်ယူခဲ့တဲ့ပွဲစဉ်မှာ အထူးခြေစွမ်းပြခဲ့တဲ့ တောင်ပံကစားသမားအိုဒိုဘတ်နဲ့ပတ်သက်လို့ ပိုစတီကိုဂလူက “ သူ့အတွက် အလွန်ပျော်ရွှင်ကျေနပ်မိပါတယ်။ အိုဒိုဘတ်က အရမ်းကြိုးစားတဲ့ကစားသမား တစ်ဦးဖြစ်ပါတယ်။ သူကို့ခေါ်ယူလိုက်နိုင်ချိန်မှာ ကျွန်တော် စိတ်လှုပ်ရှားမိခဲ့ပါတယ်။ သူ့မှာ ပရိသတ်တွေကို စွဲဆောင်နိုင်မှုအပြင် နေရာလွတ်ရှာဖွေနိုင်စွမ်း၊ အရမ်းကောင်းတဲ့နည်းစနစ်ကျေညက်မှုတွေ ရှိပါတယ်။

ဒီနှစ်မှာ သူက ခမ်းနားတဲ့ ကလပ်အသင်းသစ်တစ်ခုဆီ ပြောင်းရွှေ့ရောက်ရှိလာပါတယ်။ သူ့ဒဏ်ရာကြောင့်သာ ထင်သလောက်ခြေစွမ်းမပြနိုင်တာပါ။ သူ့ရဲ့စွမ်းဆောင်ရည်တွေကို ထုတ်မပြနိုင်ခဲ့လို့ ကျွန်တော့်အတွက်တော့ စိတ်ပျက်စရာပါပဲ။ သူဘယ်လောက်အထိ တိုးတက်လာနိုင်သလဲဆိုတာ ကျွန်တော် သိပါတယ်။ အခုက သူ့အတွက် စမှတ်တစ်ခုလောက်သာ ဖြစ်ပါတယ်”လို့ ပြောပါတယ်။