ဒီည၊ ချန်ပီယံလိဂ်ဗိုလ်လုပွဲမတိုင်ခင် ရီးရဲလ်မက်ဒရစ်ကစားသမားတွေ ကြောက်ရွံ့ထိတ်လန့်မှုကို ခံစားနေရလိမ့်မယ်လို့ နည်းပြအန်ဆယ်လော့တီက ဝန်ခံပြောဆိုလိုက်ပါတယ်။ ရီးရဲလ်မက်ဒရစ်က အသင်းအတွက် စံချိန်သစ်ဖြစ်လာမယ့် ၁၅ ကြိမ်မြောက်ချန်ပီယံလိဂ်ဆုဖလားကို ဆွတ်ခူးနိုင်ဖို့ ဒီည၊ ဝင်ဘာလေကွင်းမှာ ဒေါ့မွန်နဲ့ ယှဉ်ပြိုင်ကစားသွားရပါမယ်။

တိုနီကရူးစ်၊ လူကာမိုဒရစ်နဲ့ ကာဗာဂျယ်လ်တို့လို ဝါရင့်ကစားသမားတွေက ရီးရဲလ်မက်ဒရစ်နဲ့အတူ ချန်ပီယံလိဂ်ဆုဖလားကြီးကို အကြိမ်ကြိမ်ဆွတ်ခူးထားနိုင်ခဲ့ပါတယ်။ ဒီကစားသမားတွေနဲ့အတူ စပိန်ဘီလူးကြီးက နောက်ဆုံးဆယ်စုနှစ်အတွင်း ချန်ပီယံလိဂ်ချန်ပီယံအဖြစ် ငါးကြိမ်တိုင် အောင်ပွဲခံနိုင်ခဲ့ပါတယ်။

အန်ဆယ်လော့တီကိုယ်တိုင်လည်း ရီးရဲလ်မက်ဒရစ်နည်းပြဘဝသက်တမ်းနှစ်ကြိမ်မှာ ဥရောပရဲ့အဆင့်အမြင့်ဆုံးဆုဖလားကြီးကို နှစ်ကြိမ်တိုင်ရယူနိုင်တဲ့ နည်းပြအဖြစ် မှတ်တမ်းတင်ထားပါတယ်။ ဒါ့အပြင် သူက အေစီမီလန်နဲ့အတူ နှစ်ကြိမ်တိုင်အောင်ပွဲခံနိုင်ခဲ့ခြင်းအပါအဝင် ချန်ပီယံလိဂ်ဆုဖလားကြီးကို လေးကြိမ်တိုင်ဆွတ်ခူးနိုင်တဲ့ တစ်ဦးတည်းသောနည်းပြဖြစ်ပြီး ဒီပြိုင်ပွဲမှာ အောင်မြင်မှုရရှိဖို့ ဘယ်လိုလုပ်ဆောင်ရမလဲဆိုတာ သိရှိထားသူလည်း ဖြစ်ပါတယ်။

ဒါပေမယ့် အန်ဆယ်လော့တီကတော့ သူကစားသမားတွေမှာ ဝင်ဘာလေကွင်းပွဲစဉ်မတိုင်ခင် ကြောက်ရွံ့မှုအချို့ရှိနေလိမ့်မယ်လို့ ဝန်ခံပြောဆိုလိုက်ပါတယ်။

“အသွားနှစ်ဖက်ပါတဲ့ ဓါးတစ်ချောင်းလိုပါပဲ။ ပျော်ရွှင်မှုတွေကို အမြင့်ဆုံးအဆင့်အထိ ခံစားဖို့ လိုအပ်သလို တခုခုများ မှားယွင်းသွားမလားဆိုတဲ့ စိုးရိမ်စိတ်တွေလည်း ရှိနေပါတယ်။ ဘာကြောင့်လဲဆိုတော့ ကျွန်တော်တို့က ဘောလုံးလောကရဲ့အကြီးကျယ်ဆုံးဆုဖလားကြီးနဲ့ လက်တကမ်းအကွာဆီ ရောက်ရှိနေလို့ဖြစ်ပါတယ်။

စိုးရိမ်မှုတွေလည်း ရှိလာပါလိမ့်မယ်။ ကြောက်စိတ်တွေလည်း ရှိမှာပေါ့၊ ဒါ ပုံမှန်ပါပဲ။ အဆုံးမှာ အနိုင်ရရှိမယ်ဆိုရင် ပိုပြီးကြောက်ရွံ့နေပေမယ့် ပျော်ရွှင်မိလာပါလိမ့်မယ်” လို့ အီတာလျံဝါရင့်နည်းပြကြီးက ဆိုပါတယ်။

ဒါ့အပြင် အန်ဆယ်လော့တီက ချန်ပီယံလိဂ်ဗိုလ်လုပွဲဆိုတာ ဘယ်အသင်းအတွက်မဆို အလွန်အန္တရာယ်ကြီးမားတဲ့ပွဲစဉ်တစ်ခုဖြစ်ပြီး မချင့်မရဲဖြစ်စရာတွေနဲ့ အလွန်နီးကပ်နေတာကြောင့် အာရုံစူးစိုက်မှုအပြည့်ရှိနေဖို့၊ ကံကောင်းမှုအနည်းငယ်ရှိနေဖို့ လိုအပ်တယ်လို့ သတိပေးလိုက်ပါတယ်။

သူက “ချန်ပီယံလိဂ်ဗိုလ်လုပွဲဆိုတာ အလွန်အရေးကြီးတဲ့ပွဲစဉ်တစ်ခုဖြစ်သလို အန္တရာယ်အများဆုံးပွဲစဉ်လည်း ဖြစ်ပါတယ်။ကောင်းကောင်းကစားနိုင်ဖို့နဲ့ ကံနည်းနည်းကောင်းနေဖို့ လိုအပ်ပါတယ်။ ကိုယ့်ရဲ့စိတ်ကိုလည်း ဘယ်တော့မှ မလျှော့ချလိုက်ပါနဲ့။ ဒါပေမယ့် အောင်မြင်မှုတစ်ခုရယူနိုင်ဖို့ နီးကပ်လာချိန်မှာ မင်းရဲ့စိုးရိမ်မှုတွေ စတင်လာပါလိမ့်မယ်”လို့ ဆက်ပြောခဲ့ပါတယ်။