မန်ချက်စတာယူနိုက်တက်နည်းပြမိုက်ကယ်ကာရစ်က သူ့ရဲ့အနာဂတ်နဲ့ပတ်သက်လို့ ထင်ကြေးပေးမှု ရပ်တန့်သွားစေမယ့် တစ်ခုတည်းသောနည်းလမ်းအဖြစ် ပွဲစဉ်တွေ အနိုင်ရရှိဖို့သာ လိုအပ်တယ်ဆိုတာကို သိထားပြီး အသင်းအကြီးအကဲတွေရဲ့အာမခံချက် မလိုအပ်ဘူးလို့ ပြောကြားလိုက်ပါတယ်။

ဒီည၊ ကိုမိုအသင်းနဲ့ရင်ဆိုင်ရမယ့် ချန်ပီယံလိဂ်အဝေးကွင်းပွဲစဉ်မတိုင်ခင် ယူနိုက်တက်က အခုရာသီ၊ ပြိုင်ပွဲစုံ ၁၀ ပွဲမှာ ၂ ပွဲသာ အနိုင်ရရှိခဲ့ပါတယ်။

အင်္ဂလန်ထိပ်တန်းလိဂ်ပြိုင်ပွဲမှာ နှစ် ၄၀ အတွင်း အဆိုးရွားဆုံးရာသီသစ်စတင်မှုနဲ့ ရင်ဆိုင်နေရတဲ့ သရဲနီတွေက ပြီးခဲ့တဲ့လအတွင်း ဘရိုက်တန်ကို ရှုံးနိမ့်ကာ ကာရာဘောင်ဖလားပြိုင်ပွဲမှ ထွက်ခွာခဲ့ရသလို လွန်ခဲ့တဲ့သီတင်းပတ်မှာလည်း အက်သလက်တီကိုမက်ဒရစ်ကို ချန်ပီယံလိဂ်အဝေးကွင်းပွဲစဉ်အဖြစ် ထပ်မံရှုံးနိမ့်ခဲ့ပါတယ်။

ပြီးခဲ့တဲ့ဘောလုံးရာသီ၊ ဒုတိယရာသီဝက်ကာလမှာ ယာယီနည်းပြအဖြစ် အထင်ကြီးလောက်စရာ စွမ်းဆောင်ပြပြီးနောက် ကာရစ်က မေလအတွင်း ယူနိုက်တက်ရဲ့ အမြဲတမ်းနည်းပြ ဖြစ်လာခဲ့ပါတယ်။

ဒါပေမဲ့ သူက ၂၀၁၃ ခုနှစ်၊ ဆာအဲလက်စ်ဖာဂူဆန် အနားယူပြီးနောက်ပိုင်း ဂုဏ်သိက္ခာတွေ ကျဆင်းလာခဲ့တဲ့ အိုးလ်ထရက်ဖို့ဒ်ကလပ်အသင်းမှာ ဖိအားတွေရင်ဆိုင်နေရတဲ့ နည်းပြတစ်ဦး အလျှင်အမြန်ဖြစ်လာခဲ့ပါတယ်။

အီတလီမြေမှာ ပြုလုပ်တဲ့ သတင်းစာရှင်းလင်းပွဲအတွင်း ကာရစ်က "အရာအားလုံး အဆင်ပြေချောမွေ့သွားစေဖို့နဲ့ နေရာတကျ ဖြစ်လာစေဖို့အတွက် ဘောလုံးပွဲတွေကို အနိုင်ရအောင် ကစားရမယ်ဆိုတာ ကျွန်တော် သိပါတယ်။ ကျွန်တော်တို့ တစ်ခုခု လုပ်ပြနိုင်သေးလို့ ဒါလည်း ကောင်းတဲ့ အချက်တစ်ခုပါပဲ" လို့ ပြောပါတယ်။

"ကျွန်တော့်အတွက် ဘာအာမခံချက်မှ မလိုအပ်ပါဘူး။ ဒါ အလွန်ရှင်းပါတယ်"

"ကျွန်တော့်ရဲ့အခန်းကဏ္ဍကို ကျွန်တော် သိတယ်၊ တာဝန်တွေကိုလည်း ကျွန်တော် နားလည်ပါတယ်။ အခြေအနေတွေ ကောင်းနေသလား၊ ဒါမှမဟုတ် ပိုကောင်းဖို့ လိုအပ်နေသလားဆိုတာကို တခြားသူတစ်ဦးဦး လာပြောပြနေစရာ မလိုပါဘူး။ ဒါကို ကျွန်တော်ကိုယ်တိုင် ကောင်းကောင်းသိပါတယ်" လို့ ဆိုပါတယ်။

အခြေအနေတွေပြောင်းလဲနိုင်ဖို့ဆိုတဲ့ ကာရစ်ရဲ့မျှော်လင့်ချက်တွေအတွက် တိုးပွားလာနေတဲ့ ဒဏ်ရာရကစားသမားစာရင်းက အထောက်အကူ မဖြစ်စေခဲ့ပါဘူး။

အက်သလက်တီကိုမက်ဒရစ်ကို ရှုံးနိမ့်ပြီးနောက် ကလပ်အသင်းရဲ့အပြောင်းအရွှေ့ လှုပ်ရှားမှုအပေါ် ပြင်းပြင်းထန်ထန်ဝေဖန်ခဲ့ပေမဲ့ လီဆန်ဒရိုမာတီနက်ဇ်က လိဒ်နဲ့တစ်ဖက်တစ်ဂိုးစီသရေကျခဲ့တဲ့ တနင်္ဂနွေနေ့ပရီးမီးယားလိဂ်ပွဲစဉ်ရဲ့ ပထမပိုင်းပွဲချိန်အပြီး လူစားလဲခဲ့ရပါတယ်။

ဒီအာဂျင်တီးနားလက်ရွေးစင်ကစားသမားက ကိုမိုဆီသွားရောက်ရမယ့် ခရီးစဉ်ကို လွဲချော်ဖို့ရှိသလို လုခ်ရှော၊ မိုင်နူး၊ ရက်ရှ်ဖို့ဒ်၊ ဆက်စ်ကို၊ ဒေါဂူနဲ့ ဟေးဗင်းတို့လည်း လွဲချော်ကြပါလိမ့်မယ်။