ပွဲထွက်ခွင့်မရဘူးဆိုတာ သိရှိပြီးနောက် အခုသီတင်းပတ်အတွင်း လက်ရွေးစင်အသင်းလူစာရင်းမှ ထွက်ခွာသွားခဲ့ပေမဲ့ ခရစ္စတီယာနိုရော်နယ်ဒိုဆိုတာ နိုင်ငံရဲ့ အကြီးကျယ်ဆုံး ဘောလုံးပြယုဂ်အဖြစ် ဆက်လက်တည်ရှိနေဆဲပဲလို့ ပေါ်တူဂီကွင်းလယ်ဖန်တီးရှင်ဘရူနို ဖာနန်ဒက်စ်က ပြောကြားခဲ့ပါတယ်။

ဒိန်းမတ်နဲ့ရင်ဆိုင်ရမယ့် နေးရှင်းလိဂ်ပွဲစဉ်အတွက် အသက် ၄၁ နှစ်အရွယ်စူပါစတား ပွဲထွက်ခွင့်မရရှိနိုင်ဘူးလို့ နည်းပြဂျော့ရှ်ဂျီးဆပ်စ်ကိုယ်တိုင် ဖွင့်ဟပြောကြားလာပြီးနောက် စီရော်နယ်ဒိုက အသင်းမှထွက်ခွာလာခဲ့ပြီလို့ ဗုဒ္ဓဟူးနေ့မှာ ပြောကြားခဲ့ပါတယ်။ ဒီပွဲစဉ်မှာတော့ စီရော်နယ်ဒိုမပါဝင်တဲ့ ပေါ်တူဂီအသင်းက ဒိန်းမတ်ကို ၄-၂ ဂိုးဖြင့် အနိုင်ရရှိခဲ့ပါတယ်။

ပေါ်တူဂီအသင်းအတွက် သွင်းဂိုးအများဆုံးနဲ့ ပွဲအများဆုံးကစားထားတဲ့ ကစားသမားဖြစ်သူ ရီးရဲလ်မက်ဒရစ်နဲ့ မန်ချက်စတာယူနိုက်တက်တိုက်စစ်မှူးဟောင်းရဲ့ လက်ရွေးစင်အသင်းကစားသမားအနာဂတ်က အခုလိုထွက်ခွာသွားခဲ့ပြီးနောက် မရေမရာ ဖြစ်လာခဲ့ပါတယ်။

"စီရော်နယ်ဒိုနဲ့ပတ်သက်လို့ ကျွန်တော် သူနဲ့ စကားပြောဆိုခဲ့ပါတယ်။ သူ့ကို ကျွန်တော် ပြောခဲ့တဲ့ စကားနဲ့ ဒီနေရာမှာ ထပ်ပြောချင်တဲ့ စကားကတော့ ဒါပါပဲ - ဘာတွေပဲ ဖြစ်လာပါစေ၊ ပေါ်တူဂီမှာတင်မက ကမ္ဘာတစ်ဝန်းလုံးမှာ သူစွမ်းဆောင်ပေးခဲ့တဲ့ အရာတွေကြောင့် ခရစ္စတီယာနိုရော်နယ်ဒိုဆိုတာ ကျွန်တော်တို့ လက်ရွေးစင်အသင်း၊ ကျွန်တော်တို့ရဲ့ ဘောလုံးလောကနဲ့ နိုင်ငံရဲ့အကြီးကျယ်ဆုံးပြယုဂ်အဖြစ်မှ ဘယ်တော့မှရပ်တန့်သွားမှာ မဟုတ်ဘူးဆိုတဲ့ အချက်သာ အရေးအကြီးဆုံးပါပဲ" လို့ စနေနေ့မှာ သတင်းထောက်တွေကို ဖာနန်ဒက်စ်က ပြောပါတယ်။

စီရော်နယ်ဒိုရဲ့ဆုံးဖြတ်ချက်ကြောင့် ပေါ်တူဂီအသင်းပရိသတ်တွေအကြား သဘောထားကွဲလွဲမှုဖြစ်ပေါ်ခဲ့တဲ့ ရက်အနည်းငယ်အပြီး ယူနိုက်တက်ကွင်းလယ်လူဖာနန်ဒက်စ်က စည်းစည်းလုံးလုံးညီညီညွှတ်ညွှတ်ရှိကြဖို့ တိုက်တွန်းလိုက်ပါတယ်။

ဖာနန်ဒက်စ်က "စီရော်နယ်ဒိုဆိုတာ သမိုင်းတလျှောက်တင်မက ပေါ်တူဂီပြည်သူအားလုံးရဲ့နှလုံးသားထဲမှာပါ နေရာတစ်ခု အခိုင်အမာ ရယူထားပြီးသား ဖြစ်ပါတယ်။ ဒါကြောင့် အရေးအကြီးဆုံးကတော့ ကျွန်တော်တို့အချင်းချင်း သဘောထားမကွဲလွဲကြဖို့ပါပဲ" လို့ ပြောပါတယ်။

"လက်ရွေးစင်အသင်းထဲမှာတော့ သဘောထားကွဲလွဲမှုတွေ မရှိပါဘူး။ အသင်းက တစ်သားတည်း ရှိနေသလို ပြင်ပမှာ ဘယ်လိုဆူညံသံတွေ ထွက်ပေါ်လာပါစေ၊ အဲ့ဒီအတိုင်းပဲ ဆက်ရှိနေပါလိမ့်မယ်..."

"ကျွန်တော်တို့က ဒီအငြင်းပွားမှုတွေရဲ့အပြင်ဘက်မှာ ရှိနေပေမဲ့ ကျွန်တော် တောင်းဆိုချင်တာကတော့ နိုင်ငံအနေနဲ့ အချင်းချင်းသဘောထားမကွဲပြားဖို့၊ ဘက်မရွေးကြဖို့နဲ့ အားလုံးကို အပြန်အလှန်လေးစားကြဖို့ပါပဲ။ တစ်ချိန်တည်းမှာပဲ စီရော်နယ်ဒိုဆိုတာ ကျွန်တော်တို့ လက်ရွေးစင်အသင်းရဲ့ အကြီးမားဆုံးပြယုဂ်တစ်ခု ဖြစ်နေသလို ဆက်လက်ပြီးလည်း ဖြစ်နေဦးမှာပါ။ သူ့ကို ပိုကြိုက်သည်ဖြစ်စေ၊ မကြိုက်သည်ဖြစ်စေ လူတိုင်းရဲ့လေးစားမှုနဲ့ သူက ထိုက်တန်ပါတယ်" လို့ ဆက်ပြောပါတယ်။

ပေါ်တူဂီက ရော်နယ်ဒို ပွဲထွက် ပါဝင်ခြင်း မရှိဘဲ နော်ဝေနဲ့ ဒိန်းမတ်တို့ကို အဝေးကွင်းမှာ အသီးသီး အနိုင်ယူခဲ့ပြီး တနင်္ဂနွေနေ့မှာတော့ နော်ဝေနဲ့ နောက်တစ်ကြိမ် ရင်ဆိုင်ရမှာ ဖြစ်ပါတယ်။

နည်းပြဂျော့ရှ်ဂျီးဆပ်စ်ကလည်း ရော်နယ်ဒိုကို "ပေါ်တူဂီရဲ့ ပြယုဂ်တစ်ခု" အဖြစ် တင်စားပြောဆိုခဲ့သလို ပေါ်တိုမြို့မှာကစားရမယ့် တနင်္ဂနွေပွဲစဉ်အပြီး သူ့အကြောင်းပြောဆိုဖို့ အချိန်ရရှိလာလိမ့်မယ်လို့ ဆိုပါတယ်။

"ကျွန်တော်ကတော့ အသင်းနဲ့ ဥရောပရဲ့ထိပ်တန်းအသင်း ၅ ခုထဲမှာပါဝင်တဲ့ ပြိုင်ဘက်နော်ဝေအပေါ်မှာပဲ အာရုံစိုက်သွားပါမယ်။ လက်ရှိအချိန်မှာ ဒါက အဓိကပါပဲ" လို့ အသက် ၇၂ နှစ်အရွယ်နည်းပြက ပြောကြားခဲ့ပါတယ်။