မက်အယ်လစ္စတာက နည်းပြအီရာအိုလာလက်အောက် ပွဲထွက်ခွင့်ရရှိဖို့အတွက် တိုက်ပွဲဝင်နေချိန် လီဗာပူးနဲ့ စာချုပ်သစ်ချုပ်ဆိုနိုင်ရေး သူ့ရဲ့မျှော်လင့်ချက်တွေကို ဖွင့်ဟပြောကြားခဲ့ပါတယ်။
 
၂၀၂၃ ခုနှစ်မှာ လီဗာပူးအသင်းက အာဂျင်တီးနားလက်ရွေးစင်ကစားသမားကို ဘရိုက်တန်ဆီမှ ၂၀၂၈ ခုနှစ်အထိ သက်တမ်းရှိမယ့် စာချုပ်နဲ့အတူ အပြီးသတ်ခေါ်ယူခဲ့ပါတယ်။ ကြိုးကြာနီတွေက ကမ္ဘာ့ဖလားချန်ပီယံကွင်းလယ်ကစားသမားကို စာချုပ်သက်တမ်းတိုးဖို့ မကမ်းလှမ်းသေးလို့ ကလပ်အသင်းအတွင်းပိုင်းမှာ မေးခွန်းထုတ်စရာတွေ ပေါ်ပေါက်လာခဲ့ပါတယ်။
 
အခုလအစောပိုင်းမှာပဲ ဒီကွင်းလယ်လူက လီဗာပူးရဲ့စာချုပ်သစ်ကမ်းလှမ်းဖို့ ပျက်ကွက်နေမှုအပေါ် အလွန်ဝမ်းနည်းမိတယ်လို့ ဖွင့်ဟခဲ့ပြီး အသင်းမှာ ပွဲထွက်ခွင့်ရရှိဖို့ ကြိုးစားရင်း ခြေစွမ်းပိုင်း သိသိသာသာ ပြန်လည်ကောင်းမွန်လာခဲ့ပါတယ်။
 
မက်အယ်လစ္စတာက အခုရာသီအဖွင့်ပွဲစဉ် ၇ ခုမှာ အက်သလက်တီကိုမက်ဒရစ်နဲ့ တော့တင်ဟမ်တို့ကို ဂိုးတွေ သွင်းယူခဲ့ပြီး နိုင်ငံတကာသီတင်းပတ်အတွင်း သူ့ရဲ့အနာဂတ်နဲ့ပတ်သက်လို့ မေးမြန်းရာမှာတော့ ဘာမဆိုဖြစ်လာနိုင်တယ်လို့ တုံ့ပြန်ဖြေကြားခဲ့ပါတယ်။
 
"ခိုင်မာတဲ့ ဆုံးဖြတ်ချက် မရှိသေးပါဘူး။ ကျွန်တော့်မှာ စာချုပ်သက်တမ်းနှစ်နှစ် ကျန်ပါသေးတယ်။ ကျွန်တော်ပြောခဲ့သလိုပါပဲ၊ ကျွန်တော် အစွမ်းကုန် ပေးဆပ်သွားပါတယ်။ အဲဒီအချိန်အတွင်းမှာ အများကြီးဖြစ်လာနိုင်သလို ရွေးချယ်စရာတွေလည်း အများကြီးရှိပါတယ်" လို့ မက်အယ်လစ္စတာက ပြောပါတယ်။
 
"ဒီထက်ပိုပြီး နှစ်ရှည်လများ ဆက်ရှိနေနိုင်ဖို့ မျှော်လင့်ပေမဲ့ နှစ်နှစ်ပဲဆိုရင်လည်း ကျွန်တော့်မိသားစုနဲ့အတူ ပျော်ပျော်ရွှင်ရွှင် ဖြတ်သန်းသွားပါမယ်။ ဘာကြောင့်လဲဆိုတော့ ကျွန်တော်က ကမ္ဘာ့အကောင်းဆုံးကလပ်အသင်းစာရင်းဝင် အသင်းတစ်ခုမှာ ရောက်ရှိနေတယ်ဆိုတာ သံသယဖြစ်စရာ မလိုလို့ပါပဲ" လို့ ဆိုပါတယ်။
 
၂၀၂၃ ခုနှစ်၊ မက်အယ်လစ္စတာနဲ့အတူ ရောက်ရှိလာခဲ့ကြတဲ့ ဂရာဗန်ဘတ်ချ်နဲ့ ဆိုဘိုဆလိုင်းတို့ နှစ်ဦးလုံး စာချုပ်သစ်တွေ ရရှိခဲ့ကြပြီး အသက် ၂၇ နှစ်အရွယ်ကစားသမားအတွက်တော့ ပုံစံကောင်းပြန်ရလာချိန်နဲ့ ကြုံကြိုက်နေလို့ စာချုပ်သစ်အတွက် နောက်ထပ်ဦးစားပေးရမယ့်သူ ဖြစ်လာနိုင်ပါတယ်။

မက်အယ်လစ္စတာက နိုင်ငံတကာသီတင်းပတ်အပြီး အန်ဖီးလ်ကွင်းမှာ မန်စီးတီးကို ဧည့်ခံကစားရမယ့်ပွဲစဉ်နဲ့အတူ လီဗာပူးအတွက် ပြန်လည်ပါဝင်ကစားပေးပါလိမ့်မယ်။