သြဂုတ် ၂၃ ရက်၊ နယူးကာဆယ်နဲ့ တစ်ဖက်နှစ်ဂိုးစီသရေကျဖို့အတွက် ပွဲချိန်နောက်ဆုံးမိနစ်မှာ ရရှိလာတဲ့ ပင်နယ်တီအခွင့်အရေးအပေါ် အားကိုးနေရလို့ လီဗာပူးနည်းပြသစ်အီရာအိုလာ သိသိသာသာ စိတ်ပျက်နေခဲ့ပါတယ်။

အခုပွဲစဉ်မစတင်ခင် ကလပ်အသင်းနှစ်ခုလုံးက ကွယ်လွန်သူကစားသမားဟောင်းကြီး ကီဗင်ကီးဂန်းအတွက် ဂုဏ်ပြုဆုတောင်းမှုတွေ ပြုလုပ်ခဲ့ကြပါတယ်။

အခုပွဲစဉ်မှာ နယူးကာဆယ်က အီလန်ဂါရဲ့ ပွဲချိန်အစောပိုင်းသွင်းဂိုးဖြင့် ဦးဆောင်ကစားနိုင်ခဲ့ပြီး ပထမပိုင်းပွဲချိန်အတွင်း နည်းပြဂျေဆဲလ်ရဲ့အသင်းက အကောင်းဆုံးခြေစွမ်း ပြသနိုင်ခဲ့ပါတယ်။ 

ဒုတိယပိုင်းပွဲချိန်အတွင်းမှာတော့ ဂတ်ပိုက လီဗာပူးအတွက်‌ ချေပဂိုးကို သွင်းယူပေးခဲ့ပေမဲ့ မိနစ်ပိုင်းအကြာမှာပဲ အိမ်ရှင်တို့ ထပ်မံဦးဆောင်နိုင်ခဲ့ပါတယ်။

နယူးကာဆယ်အတွက် စိတ်လှုပ်ရှားစရာအောင်ပွဲရရှိဖို့ စက္ကန့်ပိုင်းအလိုမှာပဲ ဆိုဘိုဆလိုင်းက ပင်နယ်တီမှတဆင့် ချေပဂိုးသွင်းယူသွားလို့ တစ်မှတ်စီခွဲဝေယူရင်း ပွဲစဉ်ပြီးဆုံးသွားပါတယ်။

ပွဲစဉ်အပြီး ဘီဘီစီရဲ့ Match of the Day အစီအစဉ်မှာ အီရီယိုလာက အနိုင်ရလဒ်မရရှိမှုကြောင့် စိတ်ပျက်မိပေမဲ့ ဇွဲမလျော့ဘဲ တိုက်ပွဲဝင်ခဲ့တဲ့ ကစားသမားတွေကို ချီးကျူးခဲ့ပါတယ်။

"ဒါ ထူးဆန်းတဲ့ ခံစားချက်မျိုးပါ။ ကျွန်တော်တို့ လိုချင်တဲ့ရလဒ်မဟုတ်ပေမဲ့ နောက်ဆုံးမှာ ဂိုးသွင်းယူနိုင်ခဲ့တဲ့ ခံစားချက်က ပိုပြီးကောင်းမွန်တယ်ဆိုတာတော့ အမှန်ပါပဲ။ ဒါပေမဲ့ ကျွန်တော်တို့က အနိုင်ရလဒ်ကိုပဲ သေချာပေါက် ပိုပြီးလိုလားခဲ့ပါတယ်" လို့ အီရာအိုလာက ပြောကြားခဲ့ပါတယ်။

"ကျွန်တော်တို့ သိထားတဲ့ အဆိုးရွားဆုံးပုံစံဆိုတာမျိုးနဲ့ ပွဲစဉ်ကို စတင်မိခဲ့ပါတယ်။ နယူးကာဆယ်ရဲ့အိမ်ကွင်း၊ ရာသီအဖွင့် ပထမဆုံးပွဲစဉ်ဖြစ်ပြီး ပရိတ်သတ်တွေရဲ့အားပေးမှုမှအစ သာလွန်နေသလို အရမ်းမြန်တဲ့ကစားသမားတွေရှိနေတဲ့ ပြိုင်ဘက်အတွက် ဦးဆောင်ဂိုးကို ကျွန်တော်တို့ ပေးလိုက်ရပါတယ်။

သူတို့က ကျွန်တော်တို့ကို ဒုက္ခပေးခဲ့ပြီး ကျွန်တော်တို့တွေ ရလဒ်ပိုင်းအရ နောက်မှလိုက်ကစားခဲ့ရပါတယ်။ ဒါပေမဲ့ ကျွန်တော်တို့က ဘယ်အချိန်မှာမှ အရှုံးမပေးခဲ့ပါဘူး။ ကစားသမားတွေ၊ အထူးသဖြင့် လူစားဝင်ကစားသမားတွေပေးခဲ့တဲ့ ခွန်အားကြောင့် ကောင်းမွန်တဲ့ပြန်လာမှု ဖြစ်ခဲ့ပါတယ်။

ပထမဆုံးဂိုးပေးလိုက်ရပြီးနောက် ပွဲကို ပိုပြီးမြန်ဆန်စေချင်ပါလိမ့်မယ်။ ရှုံးနိမ့်နေချိန်မှာ အပြောင်းအလဲတွေဖြစ်လာဖို့ လိုလားပါလိမ့်မယ်။ ဒုတိယပိုင်းမှာတော့ ပွဲကို ကျွန်တော်တို့ ထိန်းချုပ်နိုင်ခဲ့ပါတယ်။

ပြိုင်ဘက်ရဲ့ဂိုးဧရိယာနားမှာ ကျွန်တော်တို့ ဘောလုံးပိုင်ဆိုင်မှု ပိုရရှိခဲ့ပါတယ်။ ချေပဂိုးသွင်းလိုက်ချိန်မှာ ပွဲကို ပြောင်းလဲပစ်နိုင်တော့မယ်လို့ ထင်ခဲ့ပေမဲ့ ပြိုင်ဘက်ပဲ ဦးဆောင်ဂိုး ထပ်ရရှိသွားပါတယ်" လို့ ဆိုပါတယ်။