အင်္ဂါနေ့၊ ကမ္ဘာ့ဖလားဆီမီးဖိုင်နယ်မှာ စပိန်ကို ၂-၀ ဂိုးဖြင့် ရှုံးနိမ့်ပြီးနောက် ပြင်သစ်အသင်းဟာ အကောင်းဆုံးပုံစံအောက် အများကြီးလျော့ကျနေခဲ့တယ်လို့ ဒက်စ်ချမ့်စ်က ဝန်ခံပြောကြားလိုက်ပါတယ်။

"ကျွန်တော်တို့ တကယ်ကို စိတ်ပျက်မိပါတယ်။ ဗိုလ်လုပွဲတက်ဖို့ ကျွန်တော်တို့ရဲ့ရည်မှန်းထားပေမဲ့ စပိန်အသင်းက ပွဲကို လုံးဝထိန်းချုပ်သွားနိုင်ခဲ့တယ်ဆိုတာ ဝန်ခံရပါမယ်" လို့ ပွဲစဉ်အပြီးမှာ ဒက်စ်ချမ့်စ်က ပြောပါတယ်။ "ကျွန်တော်တို့ နည်းစနစ်ပိုင်းဆိုင်ရာ အမှားတွေ အများကြီး လုပ်ခဲ့မိပါတယ်။ ပြိုင်ဘက်ကို အခက်တွေ့အောင် မလုပ်နိုင်ခဲ့ပါဘူး။ ပြိုင်ဘက်က ခံစစ်ကစားပုံ အရမ်းကောင်းသလို ပွဲကိုလည်း ကောင်းကောင်း စီမံခန့်ခွဲနိုင်တဲ့ အသင်းမျိုး ဖြစ်ပါတယ်"လို့ ဆက်ပြောခဲ့ပါတယ်။

ဒဲလ်လက်စ်မှာကစားခဲ့တဲ့ အဲဒီပွဲစဉ်ရဲ့ပွဲချိန် ၂၂ မိနစ်မှာ စပိန်က အိုယာဇာဘယ်လ်ရဲ့ ပင်နယ်တီဂိုးဖြင့် ဦးဆောင်နိုင်ခဲ့သလို ပွဲချိန်တစ်နာရီမပြည့်ခင်မှာပဲ ပေါ်ရိုရဲ့နောက်ထပ်အဖိုးတန်သွင်းဂိုးကို ရရှိခဲ့ပါတယ်။

ပြင်သစ်အသင်းအတွက် ဘောလုံးပညာပြသခြင်း ခံရတာမျိုးလားလို့ မေးမြန်းရာမှာ ဒက်စ်ချမ့်စ်က ဒီလာဖွန်တေရဲ့အသင်းကို ချီးကျူးခဲ့သလို ပြင်သစ်ကစားသမားတွေရဲ့ နည်းစနစ်ပိုင်းအားနည်ချက်တွေကိုလည်း စိတ်မကောင်းဖြစ်နေခဲ့ပါတယ်။

"စပိန်က တကယ့်ကိုတောင့်တင်းတဲ့အသင်းတစ်ခု ဖြစ်ပြီး ကစားသမားတွေကိုယ်တိုင်လည်း ဒီအချက်ကို ဒီညမှာ ထပ်ပြီးသက်သေပြခဲ့ပါတယ်။ ကျွန်တော်တို့ကတော့ ပုံမှန်ခြေစွမ်းမျိုး မပြသနိုင်ခဲ့ပါဘူး။ အရင်ပွဲတွေထက်စာရင် နည်းစနစ်ပိုင်းအမှားတွေ ပိုများခဲ့ပါတယ်။ ကစားသမားတွေ အစွမ်းကုန်ကြိုးစားခဲ့ကြပေမဲ့ ကျွန်တော်တို့အသင်း အကောင်းဆုံးပုံစံ မရရှိခဲ့ဘူးဆိုတာတော့ ရှင်းပါတယ်" လို့ သူက ဆိုပါတယ်။

စပိန်အသင်းရဲ့ခံစစ်ပိုင်းကျစ်လျစ်မှုနဲ့ အမ်ဘာပေအပေါ်အကောင်းဆုံးထိန်းချုပ်နိုင်ခဲ့မှုကို ပွဲစဉ်အတွက် အဓိကအဆုံးအဖြတ်အဖြစ် ဒက်စ်ချမ့်စ်က သတ်မှတ်ခဲ့ပါတယ်။

"ဒီနေ့မှာ စပိန်က ခံစစ်ကို အကောင်းဆုံးကစားသွားခဲ့ပါတယ်။ နေရာလွတ်တွေ တော်တော်လေး ရှားပါတယ်။ တချိန်တည်းမှာပဲ ကျွန်တော်တို့က နည်းစနစ်ပိုင်းအမှားတွေ လုပ်ခဲ့မိလို့ အဖြေရှာဖို့ ပိုခက်သွားပါတယ်။ ဒီလိုအသင်းမျိုးနဲ့ယှဉ်ပြိုင်ချိန်မျိုးမှာ နည်းစနစ်ပိုင်းနဲ့ တိုက်စစ်ပိုင်းအားနည်းသွားရင် တကယ်ကို ခက်ခဲသွားတတ်ပါတယ်"လို့ ဝါရင့်နည်းပြက ဆိုပါတယ်။

ပထမပို်ငးပွဲချိန်အတွင်း ဗဟိုခံစစ်မှူးဆာလီဘာ ဒဏ်ရာရရှိသွားလို့ လူစားလဲရာမှာ ကိုနာတေးအစား လာခရော့စ်ကို ထည့်သွင်းခဲ့မှုနဲ့ပတ်သက်လို့လည်း သူက ရှင်းပြခဲ့ပါတယ်။ 

"ဒါ ကျွန်တော့်ရဲ့ ဆုံးဖြတ်ချက်ပါ။ ဒဏ်ရာကြောင့် ဆာလီဘာ ထွက်သွားရပြီး အခြားကစားသမားတွေနဲ့အတူ အပိုစွန့်စားမှုမျိုး ကျွန်တော် မလုပ်ချင်ပါဘူး။ ပုံမှန်ပွဲထွက်အတွေ့အကြုံနဲ့ ကစားပုံအရ ဒါကို အသင့်တော်ဆုံးပြောင်းလဲမှုအဖြစ် ကျွန်တော်ယူဆပါတယ်" လို့ သူက ဆိုပါတယ်။

လက်ရှိမှာ ပြင်သစ်က တတိယနေရာလုပွဲကို ဆင်နွှဲသွားရပါတော့မယ်။ ယမန်နှစ်အတွင်း အခုကမ္ဘာ့ဖလားပြိုင်ပွဲအပြီး ရာထူးမှနုတ်ထွက်မယ်လို့ ပြောဆိုထားတဲ့ ဒက်စ်ချမ့်စ်က သူ့ရဲ့အနာဂတ်အကြောင်းဆွေးနွေးဖို့ ငြင်းဆန်ခဲ့ပါတယ်။

"အခု အဲဒီအကြောင်းပြောရမယ့်အချိန် မဟုတ်သေးပါဘူး။ ၂၀၁၈ ခုနှစ်မှာ ကမ္ဘာ့ဖလားချန်ပီယံဖြစ်ခဲ့တာ၊ ကာတာမှာ ဗိုလ်လုပွဲတက်ခဲ့တာနဲ့ အခု နောက်ထပ်ဆီမီးဖိုင်နယ် ရောက်ခဲ့တာတွေအထိ လက်ရွေးစင်အသင်းရရှိခဲ့တဲ့ အောင်မြင်မှုတွေအတွက် ကျွန်တော် အရမ်းဂုဏ်ယူပါတယ်။ ဒီနေ့တော့ ကျွန်တော်တို့ ရှုံးနိမ့်မှုကို လက်ခံပြီး စပိန်ကို ချီးကျူးသွားရပါမယ်။ ဒါက ထိပ်တန်းအဆင့်ဘောလုံးလောကရဲ့ သဘာဝပါပဲ" လို့ ဒက်စ်ချမ့်စ်က နိဂုံးချုပ်ပြောကြားခဲ့ပါတယ်။