အာဂျင်တီးနားအသင်း ဆီမီးဖိုင်နယ်တက်လှမ်းပြီးနောက် ကမ္ဘာ့ဖလားမှတ်တမ်းသစ်တစ်ခုကို ပိုင်ဆိုင်ခဲ့
၂၀၂၆ ဖီဖာကမ္ဘာ့ဖလား ဆီမီးဖိုင်နယ်အဆင့်မှာ ယှဉ်ပြိုင်မယ့် အသင်း ၄ သင်းကို အခုအခါမှာ အတည်ပြုလိုက်ပြီဖြစ်ပါတယ်။
ဇူလိုင် ၁၄ ရက်မှာ တက္ကဆက်ပြည်နယ်၊ အာလင်တန်မြို့က ဒါးလက်စ်အားကစားကွင်းမှာ စပိန်နဲ့ ၂၀၂၂ ခုနှစ်ရဲ့ ဒုတိယဆုရှင် ပြင်သစ်တို့ ယှဉ်ပြိုင်သွားကြမှာဖြစ်ပြီး ဇူလိုင် ၁၅ ရက်မှာတော့ ဂျော်ဂျီယာပြည်နယ်က အက်တလန်တာအားကစားကွင်းမှာ အင်္ဂလန်နဲ့ အာဂျင်တီးနားတို့ ရင်ဆိုင်သွားကြမှာပါ။
ဆီမီးဖိုင်နယ်ကို တက်ရောက်လာတဲ့ ခရီးလမ်းမှာ ပြင်သစ်က ကွာတားဖိုင်နယ်မှာ မော်ရိုကိုအသင်းကို ၂-၀ နဲ့ အနိုင်ယူပြီး အေးအေးလူလူ တက်လှမ်းနိုင်ခဲ့သလို စပိန်ကလည်း ဘယ်လ်ဂျီယံကို ၂-၁ နဲ့ အနိုင်ရခဲ့ပါတယ်။
ဒါဟာ ဒီနှစ်သင်းလုံးဟာ ဆီမီးဖိုင်နယ်အထိ တက်လှမ်းလာတဲ့ ခရီးမှာ အချိန်ပိုကစားဖို့ မလိုအပ်ခဲ့ဘူးလို့ ဆိုလိုတာဖြစ်ပါတယ်။ အာဂျင်တီးနားကတော့ ကိတ်ဗာဒီ၊ အီဂျစ်နဲ့ ဆွစ်ဇာလန်တို့နဲ့ ကစားခဲ့တဲ့ ရှုံးထွက်အဆင့် ၃ ပွဲစလုံးမှာ ၁၂၀ မိနစ်အထိ အချိန်ပိုကစားပြီးမှ အနိုင်ရခဲ့တာဖြစ်ပြီး အင်္ဂလန်ကလည်း ကွာတားဖိုင်နယ်မှာ နော်ဝေကို အနိုင်ရဖို့အတွက် အချိန်ပိုမှာ ဂျုဒ်ဘယ်လင်ဂမ်ရဲ့ ဂိုးကို အားကိုးခဲ့ရပါတယ်။
အခုတက်ရောက်လာတဲ့ အသင်း ၄ သင်းစလုံးဟာ ဆီမီးဖိုင်နယ်နဲ့ ထိုက်တန်သူတွေဖြစ်သလို ကမ္ဘာ့ဖလားသမိုင်းတစ်လျှောက်မှာလည်း ပထမဆုံးအကြိမ်အဖြစ် ဖီဖာကမ္ဘာ့အဆင့်သတ်မှတ်ချက်ရဲ့ ထိပ်ဆုံး ၄ သင်းစလုံး ဆီမီးဖိုင်နယ်ကို အတူတကွ တက်ရောက်နိုင်ခဲ့တဲ့ မှတ်တမ်းသစ်တစ်ခုလည်း ဖြစ်လာခဲ့ပါတယ်။
အဆင့် (၁) စပိန်၊ အဆင့် (၂) အာဂျင်တီးနား၊ အဆင့် (၃) ပြင်သစ်နဲ့ အဆင့် (၄) အင်္ဂလန်တို့ဟာ သူတို့ရဲ့ အုပ်စုပွဲစဉ်တွေမှာသာ အုပ်စုဗိုလ်ဖြစ်ခဲ့မယ်ဆိုရင် ဆီမီးဖိုင်နယ်မတိုင်ခင် အချင်းချင်း မဆုံနိုင်အောင် မဲခွဲမှုမှာ လမ်းကြောင်းခွဲထားတဲ့ ၂၀၂၆ ကမ္ဘာ့ဖလားရဲ့ ဖီဖာစည်းမျဉ်းအသစ်ကြောင့် အခုလို ဆီမီးဖိုင်နယ်ကို စုပေါင်းရောက်ရှိလာနိုင်ဖို့ အထောက်အကူဖြစ်စေခဲ့တာပါ။
