ဂျက်ဆီဒယ်ရီဟာ ဒီနွေရာသီမှာ တစ်နှစ်ကြာ အငှားစာချုပ်နဲ့ စပို့တင်းလစ္စဘွန်းအသင်းဆီ သွားရောက်ပူးပေါင်းဖို့ သဘောတူညီခဲ့တာ ဖြစ်ပါတယ်။

ခရစ္စတယ်ပဲလေ့စ် နောက်ခံလူဟောင်း ရှောင်ဒယ်ရီရဲ့ သားဖြစ်သူ ဒယ်ရီဟာ အခုလအတွင်းမှာပဲ ချဲလ်ဆီးအသင်းနဲ့ ကာလရှည် စာချုပ်သစ် ချုပ်ဆိုခဲ့ပြီး ပထမအသင်း အတွေ့အကြုံ ရရှိစေဖို့အတွက် ချက်ချင်းပဲ အငှားချခြင်း ခံခဲ့ရတာပါ။

ဒီစာချုပ်သစ်ဟာ ဘိုင်ယန်မြူးနစ်နဲ့ ဂျူဗင်တပ်စ်လို ထိပ်တန်းကလပ်တွေက စိတ်ဝင်စားမှု မြင့်တက်လာချိန်မှာ ပေါ်ပေါက်လာတာ ဖြစ်ပါတယ်။ အထူးသဖြင့် အခုလအစမှာ နည်းပြသစ် ရှာဘီအလွန်ဆို ရောက်ရှိလာပြီးနောက် ဒယ်ရီရဲ့ အနာဂတ်က မရေမရာ ဖြစ်နေခဲ့တာကြောင့်လည်း ပါဝင်ပါတယ်။

ဒါပေမဲ့ စာချုပ်သစ် ချုပ်ဆိုပြီးနောက်မှာတော့ ဒယ်ရီဟာ ပုံမှန် ပထမအသင်း ပွဲထွက်ခွင့် ရရှိမယ့် ပေါ်တူဂီနိုင်ငံဆီ ထွက်ခွာသွားတော့မှာပါ။ ဒီသတင်းကိုတော့ အပြောင်းအရွှေ့ ကျွမ်းကျင်သူ ဖာဘရီဇီယိုရိုမန်နိုက ဗုဒ္ဓဟူးနေ့ မနက်ပိုင်းမှာ အပြောင်းအရွှေ့ အသေးစိတ် အချက်အလက်တွေနဲ့အတူ ထုတ်ဖော်ပြောကြားခဲ့တာ ဖြစ်ပါတယ်။

"ဂျက်ဆီဒယ်ရီ စပို့တင်းကို ပြောင်းပြီ၊ Here we go! ၂၀၂၇ ဇွန်လအထိ အငှားစာချုပ်နဲ့ သဘောတူညီမှု ရသွားပါပြီ။ လစာကို အပြည့်အဝ ပေးချေမှာ ဖြစ်သလို အပြီးသတ် ဝယ်ယူခွင့်လည်း မပါဝင်ပါဘူး။ ချဲလ်ဆီးက ဒီအပတ်ထဲမှာ ဒယ်ရီနဲ့ စာချုပ်သစ် ချုပ်ဆိုခဲ့ပြီးနောက် အခုတော့ စပို့တင်းဆီ အငှားထွက်ခွင့် ပြုလိုက်တာပါ။ ဒယ်ရီဟာ ၂၀၂၇ ဇွန်လမှာ ချဲလ်ဆီးဆီ ပြန်လာမှာ ဖြစ်ပါတယ်" လို့ ရိုမန်နိုက ဆိုပါတယ်။

ဒယ်ရီဟာ လက်ရှိအချိန်အထိ ချဲလ်ဆီးအသင်းအတွက် ပထမအသင်းမှာ သုံးပွဲ ကစားပေးထားပါတယ်။ သူဟာ ခရစ္စတယ်ပဲလေ့စ်ကနေ ၄ နှစ်စာချုပ်နဲ့ ရောက်ရှိလာပြီး ၇ လအကြာ ၂၀၂၆ ခုနှစ် ဖေဖော်ဝါရီလအတွင်းက ဟားစီးတီးနဲ့ ကစားခဲ့တဲ့ အက်ဖ်အေဖလားပွဲစဉ်မှာ အသင်းကြီးအတွက် စတင် ပွဲထွက်ခွင့် ရရှိခဲ့တာပါ။

ဒီလူငယ်ကစားသမားဟာ ချဲလ်ဆီး ယူ-၂၁ အသင်းအတွက် ပရီးမီးယားလိဂ် (၂) ပြိုင်ပွဲ ၁၇ ပွဲမှာ ၆ ဂိုးသွင်း၊ ၃ ဂိုး ဖန်တီးပေးထားသလို အသင်းကြီးမှာလည်း အထင်ကြီးစရာ ခြေစွမ်းပြခဲ့တာကြောင့် အလွန်ဆိုက သူ့ကို အသင်းကြီးမှာ ကစားစေချင်နေတာဖြစ်ပြီး အခု ပေါ်တူဂီမှာ ကစားမယ့် လာမယ့်ရာသီမှာတော့ သူဟာ ပထမအသင်း အတွေ့အကြုံတွေကို အပြည့်အဝ ရရှိသွားတော့မှာ ဖြစ်ပါတယ်။