နော့တင်ဟမ်ဖောရက်စ်အသင်းက နည်းပြသစ်အဖြစ် အိုလီဗာဂလက်စ်နာကို အတည်ပြုခန့်အပ်လိုက်ပြီလို့ တရားဝင်ကြေညာလိုက်ပါတယ်။

သြစတြီးယားလူမျိုးနည်းပြဂလက်စ်နာဟာ ခရစ္စတယ်ပဲလေ့စ်အသင်းကို နှစ်ရာသီကျော်တာဝန်ယူခဲ့ချိန်အတွင်း အက်ဖ်အေဖလား၊ ကွန်ဖရန့်လိဂ်နဲ့ ကွန်မြူနတီဒိုင်းတို့ကို ဆွတ်ခူးရရှိအောင် ဦးဆောင်ပေးခဲ့ပါတယ်။

ဒါပေမဲ့ ခရစ္စတယ်ပဲလေ့စ်အသင်းက သူဆက်ရှိနေဖို့ မစည်းရုံးနိုင်ခဲ့လို့ နောက်ဆုံးမှာ နော်တင်ဟမ်ဖောရက်စ်ဆီ ပြောင်းရွှေ့လာခဲ့ပါတယ်။ သူက နော်တင်ဟမ်ဖောရက်စ်ကို ပရီးမီးယားလိဂ်မှာ တန်းတင်ကျန်ရစ်အောင် စွမ်းဆောင်ပေးခဲ့တဲ့ နည်းပြဗီတာပါရဲရားနေရာကို အစားထိုးတာဝန်ယူသွားပါလိမ့်မယ်။

"နော်တင်ဟမ်ဖောရက်စ်ဆီ နည်းပြချုပ်အဖြစ် ရောက်ရှိလာရလို့ ဝမ်းသာမိပါတယ်" လို့ အသက် ၅၁ နှစ်အရွယ်နည်းပြဂလက်စ်နာက ပြောပါတယ်။ "အသင်းပိုင်ရှင်၊ တာဝန်ရှိသူတွေနဲ့အတူ စပြီး စကားပြောချိန်ကတည်းက သူတို့မှာ အသင်းအတွက် ရှင်းလင်းတဲ့ရည်မှန်းချက်တွေ ရှိတယ်ဆိုတာကို တွေ့ရပါတယ်။ ရေရှည်မှာ အောင်မြင်တဲ့အနာဂတ်တစ်ခုကို အတူတကွတည်ဆောက်နိုင်ဖို့ ကျွန်တော့်အပေါ်ရော၊ ကျွန်တော့်ရဲ့နည်းပြအဖွဲ့အပေါ်မှာပါ သူတို့က အပြည့်အဝယုံကြည်ကြပါတယ်"

"အခုလို ယုံကြည်မှုတွေ၊ တူညီတဲ့ ရည်မှန်းချက်တွေအပြင် လက်ရှိအသင်းမှာရှိတဲ့ ကစားသမားတွေရဲ့ စွမ်းဆောင်ရည်တွေကို မြင်တွေ့ရတာက ကျွန်တော့်အတွက် ဒီအသင်းကို ပြောင်းလာဖို့ အဓိက အကြောင်းရင်းတွေ ဖြစ်ပါတယ်။ ကျွန်တော်တို့အတူတူ ဘယ်လိုအောင်မြင်မှုတွေ ရယူနိုင်မလဲဆိုတာကိုလည်း ရင်ခုန်နေပါတယ်" လို့ သူက ဆိုပါတယ်။

ဒါ့အပြင် "နော်တင်ဟမ်ဖောရက်စ်ဆိုတာ ဂုဏ်သိက္ခာကြီးမားပြီး သမိုင်းကြောင်းကောင်းမွန်တဲ့ ကလပ်အသင်းတစ်ခုပါ။ ဥရောပချန်ပီယံဆုကို နှစ်ကြိမ်တိုင်ရရှိဖူးသလို ပရိသတ်တွေကလည်း ဘောလုံးလောကမှာ စိတ်အားထက်သန်ဆုံးမှုအရှိဆုံးပရိသတ်တွေ ဖြစ်ပါတယ်။ ကျွန်တော်တို့ရဲ့ရည်မှန်းချက်ကတော့ ရှေ့လာမယ့်နှစ်တွေမှာ အသင်းကို အရင်ထက်ပိုမိုမြင့်မားတဲ့အဆင့်တစ်ခုဆီ ပို့ဆောင်ပေးနိုင်ဖို့နဲ့ ပရိသတ်တွေဂုဏ်ယူရမယ့် အသင်းတစ်ခုဖြစ်လာဖို့ပါပဲ" လို့လည်း ပြောကြားခဲ့ပါတယ်။

"လောလောဆယ်မှာတော့ ရာသီကြိုလေ့ကျင့်ရေးတွေစတင်ဖို့အတွက် ကစားသမားတွေ၊ ဝန်ထမ်းတွေနဲ့တွေ့ဆုံပြီး အလုပ်စလုပ်ဖို့ပဲ အာရုံစိုက်ထားပါတယ်။ အနာဂတ်အတွက် စိတ်လှုပ်ရှားမိသလို အသင်းကြီးကို ကိုယ်စားပြုပြီး အောင်မြင်မှုတွေရအောင်လည်း မနားမနေကြိုးစားသွားပါမယ်။ အလုပ်စလုပ်ဖို့အတွက် မစောင့်ဆိုင်းနိုင်တော့ပါဘူး" လို့ ဂလက်စ်နာက နိဂုံးချုပ်ပြောဆိုခဲ့ပါတယ်။

နော်တင်ဟမ်ဖောရက်စ်က ၂၀၂၆-၂၀၂၇ ဘောလုံးရာသီ၊ ပရီမီးယားလိဂ်အဖွင့်ပွဲစဉ်အဖြစ် အိမ်ကွင်းမှာ လိဒ်ယူနိုက်တက်ကို ဧည့်ခံကစားရပါမယ်။