တောင်ကိုရီးယားအသင်း နည်းပြချုပ် ဟောင်မြောင်ဘိုဟာ သူ့အသင်းရဲ့ စိတ်ပျက်စရာကောင်းတဲ့ ကမ္ဘာ့ဖလားကနေ ထွက်ခွာခဲ့ရမှုနောက်ပိုင်းမှာ ရာထူးကနေ နုတ်ထွက်ခဲ့တာဖြစ်ပါတယ်။

ကမ္ဘာ့ဖလား အဖွင့်ပွဲစဉ်မှာ ချက်သမ္မတနိုင်ငံအသင်းကို ၂ ဂိုး ၁ ဂိုးနဲ့ အနိုင်ရခဲ့ပြီးနောက် တောင်ကိုရီးယားအသင်းအတွက် နောက်တစ်ဆင့်တက်ဖို့ အခွင့်အရေးဟာ လက်တစ်ကမ်းမှာတင် ရှိနေခဲ့တာပါ။

ဒါပေမဲ့လည်း အိမ်ရှင် မက္ကဆီကိုအသင်းနဲ့ တောင်အာဖရိကအသင်းတွေကို ဆက်တိုက် ရှုံးနိမ့်ခဲ့တာကြောင့် သူတို့ရဲ့ ၃၂ သင်းအဆင့်ကို တက်ရောက်နိုင်မယ့် အိပ်မက်တွေဟာ ပျက်စီးသွားခဲ့ရပါတယ်။

တောင်ကိုရီးယားသမ္မတ လီဂျေမြောင်က X လူမှုကွန်ရက်ပေါ်မှာ ရှည်လျားတဲ့ ထုတ်ပြန်ချက်တစ်ခုကို တင်ခဲ့ပြီး အသင်းပြိုင်ပွဲကနေ ထွက်ခွာခဲ့ရတာနဲ့ ပတ်သက်လို့ စုံစမ်းစစ်ဆေးဖို့ တောင်းဆိုခဲ့ပါတယ်။

"အခုလို မျှော်လင့်မထားတဲ့ ရလဒ်ထွက်ပေါ်လာတာကို ကျွန်တော် အံ့သြရုံတင်မကဘဲ တကယ်ကိုပဲ စိတ်ရှုပ်ထွေးနေရပါတယ်" လို့ သူက ဆိုပါတယ်။ "ကမ္ဘာ့ဖလားပြိုင်ပွဲဝင်ဖို့အတွက် နိုင်ငံသားတွေရဲ့ အခွန်ငွေတွေနဲ့ နိုင်ငံတော်ရဲ့ ထောက်ပံ့မှုတွေကို အများကြီး ရင်းနှီးမြှုပ်နှံထားရတဲ့အတွက် ဒီဖြစ်ရပ်ရဲ့ အခြေအနေမှန်တွေကို ယဉ်ကျေးမှု၊ အားကစားနဲ့ ခရီးသွားလာရေးဝန်ကြီးဌာနအနေနဲ့ သေသေချာချာ စုံစမ်းစစ်ဆေးဖို့၊ အကြောင်းရင်းတွေကို ခွဲခြမ်းစိတ်ဖြာဖို့နဲ့ နောက်နောင် အခုလိုမျိုး ထပ်မဖြစ်အောင်နဲ့ ပိုမိုကောင်းမွန်လာအောင် အစီအမံတွေ ချမှတ်ဖို့ တောင်းဆိုပါတယ်၊ အခုလိုမျိုး နောက်တစ်ကြိမ် ထပ်မဖြစ်စေဖို့ အားကစားစီမံခန့်ခွဲမှုပိုင်းမှာ ပြုပြင်ပြောင်းလဲမှုတွေကို အမြန်ဆုံး လုပ်ဆောင်သွားမှာပါ" လို့လည်း ဆိုပါတယ်။

အခုအခါမှာတော့ ဟောင်မြောင်ဘိုဟာ တာဝန်ယူမှုအပြည့်နဲ့ တောင်ကိုရီးယားလက်ရွေးစင်အသင်းရဲ့ နည်းပြချုပ်ရာထူးကနေ နုတ်ထွက်သွားခဲ့ပြီ ဖြစ်ပါတယ်။