အာဆင်နယ်အသင်းရဲ့ ပရိသတ်အချစ်တော် နောက်ခံလူ ရီကာဒို ကာလာဖီအိုရီက လန်ဒန်မြို့က သူ့ရဲ့ လူနေမှုဘဝအကြောင်းကို ဖွင့်ဟပြောကြားခဲ့ပါတယ်။

၂၀၂၄ ခုနှစ် နွေရာသီမှာ ဘိုလော့ဂ်နာအသင်းကနေ အာဆင်နယ်ကို ပြောင်းရွှေ့လာခဲ့ပြီးနောက် ကာလာဖီအိုရီဟာ အင်္ဂလန်မှာ အခြေချနေထိုင်ခဲ့တာ (၁၈) လ ရှိပြီဖြစ်သလို နည်းပြ အာတီတာရဲ့ လက်အောက်မှာလည်း အခုအချိန်အထိ အောင်မြင်မှုတွေ အများကြီး ရရှိနေသူ ဖြစ်ပါတယ်။

အသက် ၂၃ နှစ်အရွယ် နောက်ခံလူဟာ ဒီဇင်ဘာလအတွင်း ရရှိခဲ့တဲ့ ဒဏ်ရာပြဿနာကြောင့် ပွဲထွက်လူစာရင်းကနေ ဖယ်ချန်ခံထားရပေမဲ့ မြောက်လန်ဒန်မှာ ပထမဆုံးအကြိမ် ပရီးမီးယားလိဂ်ဖလားကို ဆွတ်ခူးနိုင်ဖို့ လမ်းကြောင်းပေါ်မှာ ရှိနေဆဲ ဖြစ်ပါတယ်။

ဒါပေမဲ့ ဒီတစ်ပတ်မှာတော့ သူက အသင်းပြောင်းလာပြီးနောက်ပိုင်း ကြုံတွေ့နေရတဲ့ အခက်အခဲတစ်ခုကို ထုတ်ဖော်ခဲ့ပြီး သွားလာရေးကိစ္စတွေနဲ့ သူငယ်ချင်းတွေနဲ့ ဝေးကွာနေရတာက သူ့အတွက် ခက်ခဲကြောင်း ရှင်းပြခဲ့ပါတယ်။

"ကျွန်တော် ကိုယ်တိုင် ကားမမောင်းပါဘူး၊ ဒါပေမဲ့ ကားဆရာနဲ့ပဲ သွားလာပါတယ်။ ဒီမှာ ကိုယ်တိုင် ကားမမောင်းချင်လို့ပါ။ ကျွန်တော့်မှာ ကားမရှိပေမဲ့ ကားတော့ မောင်းတတ်ပါတယ်" လို့ သူက Supernova ပေါ့ဒ်ကတ်စ်မှာ ပြောကြားခဲ့ပါတယ်။ "ဒီက လူတွေ ကားမောင်းတဲ့ပုံစံကို ကျွန်တော် သိပ်မကြိုက်ဘူး။ သူတို့က စည်းကမ်းတွေကို အလွန်အကျွံ လိုက်နာကြပြီးတော့ နည်းနည်းလည်း နှေးကွေးတယ်။ တစ်ခါတလေ ဘာအကြောင်းပြချက်မှ မရှိဘဲနဲ့ လမ်းတွေ အရမ်းပိတ်နေတတ်တယ်"

"ခင်ဗျားတို့ သိလားတော့ မသိဘူး၊ လန်ဒန်က အရမ်းကျယ်တာဗျ။ အဲ့ဒါကြောင့် ကျွန်တော်က အသင်းဖော်တွေနဲ့ တော်တော်လေး ဝေးဝေးမှာ နေဖြစ်ပါတယ်။ ကျွန်တော်နေတဲ့နေရာမှာ ဘယ်အသင်းဖော်မှ မရှိကြဘူး။ ဒါက လန်ဒန်ရဲ့ သဘာဝလို ဖြစ်နေတာပါ။ အသင်းဖော် အများစုမှာက မိသားစုတွေ၊ ကလေးတွေ ရှိကြတော့ လေ့ကျင့်ရေးကွင်းနဲ့ နီးတဲ့ အိမ်တွေမှာ နေကြတယ်။ ကျွန်တော်ကတော့ ငယ်သေးသလို တစ်ယောက်တည်းလည်း ဖြစ်တော့ မြို့ထဲမှာပဲ နေရတာကို ပိုသဘောကျတယ်"

ကာလာဖီအိုရီက လန်ဒန်မြို့လယ်ခေါင်မှာ နေထိုင်ဖို့ ရွေးချယ်ခဲ့တာ ဖြစ်ပါတယ်။ ဒါဟာ အာဆင်နယ် ကစားသမားတွေကြားမှာ တွေ့ရခဲတဲ့ အခြေအနေမျိုးဖြစ်လို့ လူငယ်နောက်ခံလူအနေနဲ့ အသင်းဖော်တွေနဲ့ သီးခြားဖြစ်နေသလို ခံစားရနိုင်တဲ့ ပြဿနာတစ်ခုလည်း ဖြစ်လာနိုင်ပါတယ်။

အသင်းအနေနဲ့ ဒီရာသီ ချန်ပီယံဆုအတွက် အစွမ်းကုန် ကြိုးစားနေချိန်မှာ နောက်ခံလူ ကာလာဖီအိုရီက အသင်းရဲ့ ဖလားရနိုင်ခြေအပေါ်မှာလည်း ထပ်မံ ပြောကြားခဲ့ပါတယ်။

"နည်းပြ အာတီတာရောက်လာကတည်းက ကျွန်တော်တို့အသင်းဟာ ချန်ပီယံဆုနဲ့ အမြဲတမ်း နီးစပ်ခဲ့ပါတယ်။ ကပ်ပြီးတော့ ဒုတိယပဲ ရခဲ့တာမျိုးတွေ ရှိခဲ့ပေမဲ့ နှစ်တိုင်းမှာ တိုးတက်မှုတွေ ရှိလာတယ်လို့ ကျွန်တော် ထင်ပါတယ်။ ဒီနှစ်ကတော့ အဆုံးအဖြတ်ပေးမယ့် နှစ်တစ်နှစ် ဖြစ်လာမယ်လို့ မျှော်လင့်ပါတယ်" လို့ ၎င်းက ဆိုပါတယ်။