ဘင်ဖီကာနည်းပြမော်ရင်ဟိုက ရီးရဲလ်မက်ဒရစ်နဲ့ရင်ဆိုင်ရမယ့် အရေးကြီးချန်ပီယံလိဂ်ရှုံးထွက်ပလေးအော့ဖ်ပွဲစဉ်မတိုင်ခင် စိတ်ဓာတ်ရေးရာစစ်ပွဲကို စတင်လိုက်ပါတယ်။

ပေါ်တူဂီလူမျိုးနည်းပြကြီးကိုယ်တိုင်လည်း ဘာတွေဖြစ်လာနိုင်လဲဆိုတာကို ကောင်းကောင်းသိထားပါတယ်။ အထူးသဖြင့် ပြီးခဲ့တဲ့အုပ်စုအဆင့်တွေ့ဆုံမှုမှာ သူ့အသင်းက ရီးရဲလ်မက်ဒရစ်ကို အနိုင်ယူခဲ့လို့ နှစ်သင်းလုံးအတွက် အဲ့ဒီပွဲစဉ်ရလဒ်ပိုင်းကို မမေ့ပျောက်နိုင်သေးပါဘူး။အထူးသဖြင့် ရီးရဲလ်မက်ဒရစ်က ဥရောပပွဲစဉ်တွေမှာ အခုလိုမျိုးရှုံးနိမ့်မှုကို မေ့ပစ်လေ့မရှိပါဘူး။ မော်ရင်ဟိုကလည်း သူ့အသင်းအတွက် ဘယ်လိုတုံ့ပြန်မှုမျိုးရှိလာမလဲဆိုတာကို ကောင်းကောင်းသတိပြုမိနေပါတယ်။

စပိန်ထိပ်သီးဘီလူးကြီးက ပထမအကျော့အဖြစ် ဘင်ဖီကာရဲ့အိမ်ကွင်းဆီ လာရောက်ကစားရဖို့ရှိနေပြီး ဥရောပအတွေ့အကြုံရင့်ကလပ်အသင်းနှစ်ခုအကြား ဘယ်လိုယှဉ်ပြိုင်ကစားကြဦးမလဲဆိုတာကို အားလုံး စိတ်ဝင်စားနေကြပါတယ်။

ဘင်ဖီကာဘက်ကလည်း သူတို့ရဲ့တရားဝင်လူမှုကွန်ရက်စာမျက်နှာမှတစ်ဆင့် ပွဲကြိုလှုံ့ဆော်မှုတွေ စတင်နေပါပြီ။ ဒီပို့စ်တွေဟာ ပရိသတ်တွေကို အားတက်လာစေဖို့နဲ့ လစ္စဘွန်းမြို့မှာ ပြင်းထန်တဲ့အငွေ့အသက်တွေဖန်တီးပေးဖို့ ရည်ရွယ်ထားသလို ဧည့်သည်အသင်းဆီကိုလည်း သတိပေးချက်တစ်ခု ပေးပို့လိုက်တာပဲ ဖြစ်ပါတယ်။ ရည်ရွယ်ချက်ကတော့ ပွဲကစားမယ့်ညမှာ Estadio da Luzကွင်းကြီးကို ရီးရဲလ်မက်ဒရစ်အသင်းအတွက် ကြောက်စရာကောင်းတဲ့နေရာတစ်ခုဖြစ်အောင် လုပ်သွားဖို့ပါပဲ။

မော်ရင်ဟိုကိုယ်တိုင်ကလည်း ဆန်တာကလာရာကိုအနိုင်ယူခဲ့တဲ့ ပေါ်တူဂီလိဂ်ပွဲစဉ်အပြီး အခုထိပ်တိုက်တွေ့ဆုံမှုအကြောင်းကို ထုတ်ဖော်ပြောကြားခဲ့ပါတယ်။ သူက ရီးရဲလ်မက်ဒရစ်နဲ့ရင်ဆိုင်ရမယ့် အခိုက်အတန့်ကို အခက်အခဲဆုံးစမ်းသပ်မှုတွေအနက် တစ်ခုအဖြစ် သတ်မှတ်ခဲ့သလို တစ်ပွဲတည်းနဲ့တော့ အပြီးအပြတ်မဆုံးဖြတ်နိုင်သေးဘူးလို့ အတိအလင်းပြောကြားခဲ့ပါတယ်။

“ဒါဟာ တကယ်ကို ခက်ခဲတဲ့ပွဲဖြစ်လာမယ်ဆိုတာ သေချာပါတယ်။ ကျွန်တော်တို့တွေ ပထမအကျော့ပဲ ကစားရပါဦးမယ်။ နောက်ဆုံးထိပ်တိုက်တွေ့ဆုံမှုမှာ ရီးရဲလ်မက်ဒရစ်ကို ဂိုးသွင်းယူခဲ့တဲ့ ဂိုးသမားထရူဘင်လည်း ဒီတစ်ကြိမ်မှာတော့ တိုက်စစ်ပိုင်းမှာ မရှိနေနိုင်ပါဘူး။ ကျွန်တော့်အတွက် ဒီလိုပွဲစဉ်မျိုးနဲ့ အသားကျနေပါပြီ။ ဒါတွေက ကျွန်တော့်ဘဝတစ်လျှောက်လုံး လုပ်လာခဲ့တဲ့အရာတွေပါ။ လူတွေက ပထမအကျော့မှာ ဘာကြောင့်ပဲဖြစ်ဖြစ် ရလဒ်ကောင်းတစ်ခုလိုအပ်တယ်လို့ ထင်ကြပါတယ်။ ဒါပေမဲ့ ကျွန်တော်ကတော့ ဘာမှအတည်ပြုလို့မရသေးဘူးလို့ပဲ ပြောချင်ပါတယ်။ ကျွန်တော်တို့ကတော့ ပထမအကျော့ကို အတွေ့အကြုံ၊ ရည်မှန်းချက်၊ ယုံကြည်မှုတွေအပြည့် ကစားသွားပါမယ်။ ချန်ပီယံလိဂ်ရဲ့ဘုရင်တွေကို ကျွန်တော်တို့ ဘာတွေလုပ်ခဲ့သလဲဆိုတာ အားလုံးသိပြီးသားပါ။ သူတို့က အခုချိန်မှာ ဒဏ်ရာရနေတယ်။ ဒဏ်ရာရနေတဲ့ ဘုရင်တစ်ပါးက ပိုပြီး အန္တရာယ်များပါတယ်” လို့ ၎င်းက ဆိုပါတယ်။