အန်ဖီးလ်မှာ ဂိုးသွင်းယူပေးနိုင်ခဲ့တဲ့ အသင်းခေါင်းဆောင် ဘာနာဒိုဆေးလ်ဗားကို ပက်ဂွါဒီယိုလာ ချီးကျူး
မန်ချက်စတာစီးတီးအသင်းဟာ လီဗာပူးအသင်းရဲ့အိမ်ကွင်း အန်ဖီးလ်မှာ ၂ ဂိုး ၁ ဂိုးဆိုတဲ့ ရလဒ်နဲ့ အံ့အားသင့်ဖွယ် အနိုင်ရရှိခဲ့ပြီးနောက် အသင်းခေါင်းဆောင် ဘာနာဒိုဆေးလ်ဗားရဲ့ စွမ်းဆောင်ရည်နဲ့ ပွဲအပေါ် လွှမ်းမိုးနိုင်မှုအပေါ် နည်းပြ ပက်ဂွါဒီယိုလာက အထူးတလည် ချီးကျူးစကား ပြောကြားလိုက်ပါတယ်။
ဒီပွဲစဉ်မှာ လီဗာပူးအသင်းအတွက် အဖွင့်ဂိုးကို ဒုတိယပိုင်းအတွင်း ဒိုမီနစ်ဆိုဘိုဆလိုင်းက ပြစ်ဒဏ်ဘောကနေတစ်ဆင့် လှလှပပ သွင်းယူပေးခဲ့တာပါ။ ဒါပေမဲ့ ပွဲပြီးခါနီးအချိန်မှာတော့ ဘာနာဒိုဆေးလ်ဗားက အသင်းအတွက် ချေပဂိုး သွင်းယူပေးခဲ့သလို အာလင်းဟာလန်းကလည်း ပင်နယ်တီကနေတစ်ဆင့် အနိုင်ဂိုးကို သွင်းယူပေးခဲ့ပါတယ်။
ဒီနိုင်ပွဲဟာ မန်စီးတီးအသင်းအတွက် ၈၉ နှစ်အတွင်းမှာ လီဗာပူးအသင်းကို တစ်ရာသီအတွင်း နှစ်ကျော့စလုံး အနိုင်ရရှိခဲ့တဲ့ ပထမဆုံးအကြိမ်အဖြစ် မှတ်တမ်းဝင်သွားခဲ့ပါတယ်။ ပွဲအပြီးမှာတော့ အသင်းအတွက် ခြေစွမ်းပြခဲ့တဲ့ ဘာနာဒိုဆေးလ်ဗားက အကောင်းဆုံးကစားသမားဆုကို ဆွတ်ခူးသွားခဲ့တာပါ။
နည်းပြ ဂွါဒီယိုလာက ပွဲအခြေအနေနဲ့ပတ်သက်ပြီး "ပထမပိုင်းမှာ ကစားပုံက ထူးထူးခြားခြား ကောင်းမွန်ခဲ့ပေမဲ့ တိုက်စစ်ဆင်တဲ့နေရာမှာ ကျွန်တော်တို့ တည်ငြိမ်မှု မရှိခဲ့ပါဘူး။ ဂိုးဧရိယာအတွင်းမှာ ဆုံးဖြတ်ချက်ချတဲ့အခါ ကော်ဖီတစ်ခွက် သောက်နေသလိုမျိုး ပိုပြီး အေးအေးဆေးဆေး ရှိဖို့ လိုအပ်ပါတယ်" လို့ သုံးသပ်ခဲ့ပါတယ်။
၎င်းက ဆက်လက်ပြီး "ဒုတိယပိုင်းမှာ လီဗာပူးဘက်က ပိုပြီး ဖိအားပေးလာမယ်ဆိုတာ ကျွန်တော်တို့ သိပါတယ်။ ဆိုဘိုဆလိုင်းရဲ့ ဂိုးကတော့ အာဆင်နယ်နဲ့ပွဲက ဂိုးကို ကော်ပီကူးထားသလိုပါပဲ၊ တကယ်ကို ချီးကျူးစရာပါ" လို့ ပြောကြားခဲ့ပါတယ်။
အသင်းခေါင်းဆောင် ဘာနာဒိုဆေးလ်ဗားရဲ့ ဦးဆောင်မှုနဲ့ပတ်သက်ပြီး ဂွါဒီယိုလာက အားရကျေနပ်နေပြီး "နောက်ဆုံးမှာတော့ ကျွန်တော်တို့ရဲ့ အံ့အားသင့်စရာ ကစားသမား၊ ကျွန်တော် လေ့ကျင့်ပေးဖူးသမျှထဲမှာ အကောင်းဆုံးတွေထဲက တစ်ယောက်ဖြစ်တဲ့ အသင်းခေါင်းဆောင် ဘာနာဒိုကပဲ လမ်းပြပေးခဲ့ပါတယ်။ လူတိုင်းက သူ့နောက်ကို လိုက်ကြသလို ကျွန်တော်ကိုယ်တိုင်လည်း သူ့ကို လိုက်နာပါတယ်" လို့ ဖွင့်ဟခဲ့ပါတယ်။
"ဘာနာဒိုဟာ အသင်းကို သူ့ထက် ရှေ့တန်းတင်လေ့ရှိပြီး စံပြဖြစ်အောင် ကိုယ်တိုင်လုပ်ပြတတ်သူပါ။ သူက ဟော်လန်းရဲ့ ဖန်တီးပေးမှုကနေ ချေပဂိုးသွင်းခဲ့သလို မားသီးယပ်စ် ပင်နယ်တီရရှိဖို့အတွက်လည်း ဖန်တီးပေးခဲ့ပါတယ်" လို့လည်း ဂွါဒီယိုလာက ဆက်လက်ပြောဆိုခဲ့ပါတယ်။
အန်ဖီးလ်ကွင်းမှာ အနိုင်ရဖို့ဆိုတာ အမြဲတမ်းခက်ခဲတဲ့အရာ ဖြစ်ပေမဲ့ အခုလို ရလဒ်ကောင်းရရှိခဲ့တဲ့အတွက် ကစားသမားတွေအတွက် ဝမ်းသာမိကြောင်းနဲ့ လီဗာပူးရဲ့ အားကောင်းတဲ့ အစပျိုးမှုတွေကို ပိုမိုပြင်းထန်တဲ့ စွမ်းဆောင်ရည်နဲ့ တုံ့ပြန်နိုင်ခဲ့တာက နိုင်ပွဲအတွက် အဓိကသော့ချက်ဖြစ်ခဲ့တယ်လို့ သိရပါတယ်။
