နိုင်ဂျီးရီးယားကြယ်ပွင့်တိုက်စစ်မှူးအိုဆီမန်က ချန်ပီယံလိဂ်ပြိုင်ပွဲမှာ ဂါလာတာစာရေးနဲ့အတူ သမိုင်းသစ်ရေးထိုးဖို့ သူနဲ့သူ့ရဲ့ကလပ်အသင်းဖော်တွေ ကြိုးပမ်းသွားလိမ့်မယ်လို့ ပြောခဲ့ပါတယ်။ တူရကီချန်ပီယံဂါလာတာစာရေးက အိမ်ကွင်းမှာ လီဗာပူးကို ၁-၀ ဂိုးဖြင့် အနိုင်ယူပြီးနောက် အင်္ဂါနေ့၊ ချန်ပီယံလိဂ်ပွဲစဉ်တွေရဲ့ အကြီးမားဆုံးအနိုင်ရရှိသူစာရင်းမှာ ပါဝင်လာခဲ့ပါတယ်။

အခုပွဲစဉ်အတွက် အဆုံးအဖြတ်သွင်းဂိုးကို ပယ်နယ်တီမှတဆင့် သွင်းယူပေးခဲ့တဲ့ အိုဆီမန်ကိုယ်တိုင်လည်း ပွဲပြီးဆုံးချိန်မှာ ပွဲစဉ်အလိုက်အကောင်းဆုံးကစားသမားဆုကို လက်ခံရရှိခဲ့ပါတယ်။ အခုပွဲစဉ်ရလဒ်ပိုင်းကြောင့် အိုဆီမန်နဲ့ သူ့ရဲ့ကလပ်အသင်းဖော်တွေက ဖရန့်ဖတ်နဲ့ ချန်ပီယံလိဂ်အုပ်စုအဖွင့်ပွဲစဉ်မှာရရှိခဲ့တဲ့ ဂိုးပြတ်ရှုံးနိမ့်ခြင်းခါးသီးမှုအရသာကို အဝေးဆီ လွှင့်ပစ်နိုင်ခဲ့ပါတယ်။

လက်ရှိမှာတော့ ဂါလာတာစာရေးက ချန်ပီယံလိဂ်အုပ်စုအဆင့်ပွဲစဉ်ခြောက်ခုကစားရဖို့ ကျန်ရှိပြီး သူတို့ရင်ဆိုင်ရမယ့်ပြိုင်ဘက်တွေကတော့ ဘိုဒိုဂလင့်၊ မိုနာကို၊ အေဂျက်စ်၊ ယူနီယံစိန့်ဂီလွိုက်စ်၊ အက်သလက်တီကိုမက်ဒရစ်နဲ့ မန်စီးတီးတို့ပဲ ဖြစ်ပါတယ်။ လီဗာပူးနဲ့ပွဲစဉ်မှာ အထင်ကြီးလောက်စရာစွမ်းဆောင်ရည်ပြသပြီးနောက် အိုဆီမန်က ချန်ပီယံလိဂ်ပြိုင်ပွဲမှာ တက်နိုင်သလောက် နိုင်ပွဲတွေရယူပြီး ဂါလာတာစာရေးနဲ့အတူ အမြင့်ဆုံးအထိ တက်လှမ်းနိုင်ဖို့အတွက် စိတ်ဆန္ဒပြင်းပြနေပြီလို့ ထုတ်ဖော်ပြောကြားခဲ့ပါတယ်။

အိုဆီမန်က “ ချန်ပီယံလိဂ်ဆိုတာ ကမ္ဘာပေါ်မှာ အကြီးကျယ်ဆုံး၊ အခမ်းနားဆုံးပြိုင်ပွဲတစ်ရပ်ဖြစ်ပြီး ကျွန်တော်တို့လည်း တက်နိုင်သလောက် ရှေ့ဆီခရီးဆက်ချင်ပါတယ်။ ဒီရည်မှန်းချက်ကို ပြီးမြောက်အောင် လုပ်ဆောင်ဖို့အတွက် ကျွန်တော်တို့အသင်းမှာ အရည်အသွေးကောင်းတွေ အမှန်တကယ်ရှိပါတယ်။ဒါက လွယ်တော့မလွယ်ပါဘူး။ ရောက်ရှိလာမယ့်ပွဲစဉ်တိုင်းကို ဂရုတစိုက်ယှဉ်ပြိုင်သွားရပါမယ်။ ကျွန်တော်တို့အတွက် လက်ကျန်ပွဲစဉ်အချို့ရှိနေပြီး အဆင်သင့်ဖြစ်နေရပါမယ်။ ဒီကလပ်အသင်းနဲ့အတူ သမိုင်းသစ်ရေးထိုးနိုင်ဖို့အတွက် ကျွန်တော်တို့တွေ အစွမ်းကုန်ပေးဆပ်ကာ ကြိုးစားသွားရပါမယ်”လို့ ပြောပါတယ်။ ၂၁ ရာစုဆီကူးပြောင်းလာပြီးနောက်ပိုင်း ဂါလာတာစာရေးက အမြင့်ဆုံးအဖြစ် ချန်ပီယံလိဂ်ကွာတားဖိုင်နယ်အဆင့်အထိသာ တက်လှမ်းနိုင်ခဲ့ပါတယ်။