သောကြာနေ့နံနက်ကယှဉ်ပြိုင်ခဲ့တဲ့ တောင်အမေရိကဇုန် ကမ္ဘာ့ဖလားခြေစစ်ပွဲစဉ်မှာ ဘရာဇီးဟာ တောင်ပံကြယ်ပွင့် ဗင်နီစီးယက်စ်ဂျူနီယာရဲ့ အချိန်ပိုမိနစ်သွင်းဂိုးနဲ့ ကိုလံဘီယာကိုအနိုင်ရခဲ့ပါတယ်။ 

ယခုပွဲစဉ်မှာ ဘရာဇီးဟာ ပွဲအစ ၅ မိနစ်မှာပဲ ရာဖင်ဟာရဲ့ပင်နယ်တီသွင်းဂိုးနဲ့ ပွဲကိုစတင်ဦးဆောင်နိုင်ခဲ့ပြီး ကိုလံဘီယာအတွက် ပထမပိုင်းမှာပဲ လူးဝစ်ဒီယက်ဇ်က ချေပဂိုးပြန်သွင်းခဲ့ပါတယ်။ ဒုတိယပိုင်းမှာ ကိုလံဘီယာက ပွဲကိုစိုးမိုးပြီး ဘရာဇီးကိုဖိအားပေးကစားနိုင်ခဲ့ပေမယ့် ရီးရဲလ်မက်ဒရစ်တောင်ပံကြယ်ပွင့် ဗင်နီစီးယက်စ်ရဲ့ အဝေးကန်ချက်ကြောင့် ပွဲပြီးကာနီးမှ ရှုံးပွဲကြုံတွေ့ခဲ့တာဖြစ်ပါတယ်။ 

ယခုနိုင်ပွဲကြောင့် ဘရာဇီးဟာအုပ်စုရဲ့ ဒုတိယနေရာသို့တက်လှမ်းနိုင်ခဲ့ပြီး ပထမနေရာက အာဂျင်တီးနားနဲ့ ရမှတ် ၄ မှတ်သာကွာဟပါတော့တယ်။ တစ်ပွဲလျော့ အာဂျင်တီးနားကတော့ စနေနေ့မှာ ဥရုဂွေးကို သွားရောက်ယှဉ်ပြိုင်ရမှာဖြစ်ပြီး ဘရာဇီးကို အမှတ်ထပ်ဖြတ်သွားနိုင်မလား စောင့်ကြည့်ရပါမယ်။ ဒန်နီယယ်မူနို့ဇ်ရဲ့ ပြစ်ဒဏ်ကျူးလွန်မှုမှတစ်ဆင့် ရရှိလာခဲ့တဲ့ ပင်နယ်တီပြစ်ဒဏ်ဘောကို ရာဖင်ဟာက အမှားအယွင်းမရှိကန်သွင်းပြီး ဘရာဇီးအတွက် ဦးဆောင်ဂိုး စောစောစီးစီးစတင်သွင်းယူပေးခဲ့တာဖြစ်ပါတယ်။ ပထမပိုင်းပြီးကာနီးမှာတော့ ကိုလံဘီယာကြယ်ပွင့် ဂျိမ်းစ်ရိုဒရီဂွက်ဇ်က အသင်းဖော်လူးဝစ်ဒီယက်ဇ်အတွက် ဂိုးဖန်တီးမှုပြုလုပ်ခဲ့ပြီး လီဗာပူးတောင်ပံကစားသမားကလည်း အကောင်းဆုံးအသုံးချနိုင်ခဲ့ပါတယ်။ 

ပွဲကစားချိန် ၇၈ မိနစ်မှာတော့ ဘရာဇီးဂိုးသမား အလီဆန်ဘက်ကာတစ်ယောက် ပြိုင်ဘက်ကစားသမားနဲ့ ခေါင်းချင်းဝင်တိုက်မိပြီး ဒဏ်ရာပြဿနာကြုံတွေ့ခဲ့ရလို့ လူစားလဲခဲ့ရပါတယ်။ အလီဆန်ရဲ့ဒဏ်ရာပြဿနာကြောင့် ပွဲကို အချိန်အတော်ကြာရပ်နားခဲ့ရလို့ ယခုပွဲစဉ်မှာ နာကျင်အချိန်ပိုကို ၁၀ မိနစ်အထိသတ်မှတ်ခဲ့ရပါတယ်။ 

အဆိုပါ ၁၀ မိနစ်အတွင်းမှာပဲ ဗင်နီစီးယက်စ်က ဘရာဇီးရဲ့ကယ်တင်ရှင်ဖြစ်လာခဲ့ပြီး အရေးပါတဲ့အနိုင်ဂိုးကို အဝေးကန်ချက်နဲ့ သွင်းယူပေးခဲ့တာဖြစ်ပါတယ်။ သောကြောနေ့နံနက်ကယှဉ်ပြိုင်ခဲ့တဲ့ တောင်အမေရိကဇုန်ကမ္ဘာ့ဖလားခြေစစ်ပွဲအုပ်စုအတွင်း အခြားပွဲစဉ်တွေမှာတော့ ပါရာဂွေးက ချီလီကို ၁-၀ နဲ့အနိုင်ရခဲ့ပြီး ပီရူးက ဘိုလီဗီးယားကို ၃-၁ နဲ့ဂိုးပြတ်အနိုင်ရခဲ့ပါတယ်။