အင်္ဂလန်နည်းပြသောမတ်စ်တူချယ်က လတ်ဗီးယားကို ၃-၀ ဂိုးဖြင့် အနိုင်ရရှိခဲ့တဲ့ပွဲစဉ်အတွင်း သူစိတ်ပျက်မိတဲ့ အခိုက်အတန့်တွေရှိတယ်လို့ ဝန်ခံခဲ့ပေမယ့် ဒါဟာ စီမံခန့်ခွဲမှုလုပ်ငန်းရဲ့ပုံမှန်အစိတ်အပိုင်းတစ်ရပ်သာ ဖြစ်တယ်လို့ အခိုင်အမာပြောဆိုခဲ့ပါတယ်။ အင်္ဂလန်လက်ရွေးစင်အသင်းက ဝင်ဘာလေကွင်းမှာကစားရတဲ့ ကမ္ဘာ့ဖလားခြေစစ်ပွဲစဉ်အတွင်း ရီစီဂျိမ်းစ်၊ ဟယ်ရီကိန်း၊ အီဇီတို့ရဲ့သွင်းဂိုးတွေနဲ့ သုံးဂိုးပြတ်အနိုင်ရရှိခဲ့ပါတယ်။

ရလဒ်ပိုင်းက သံသယဖြစ်စရာမရှိပေမယ့် အင်္ဂလန်ကတော့ ပြိုင်ဘက်လတ်ဗီးယားကို ပြတ်ပြတ်သားသားအသာစီးရရှိအောင် မကစားနိုင်ဘဲ အခွင့်အရေးတွေဖန်တီးနိုင်ဖို့ ရုန်းကန်ခဲ့ရပါတယ်။ ပွဲချိန်အများစုမှာ လတ်ဗီးယားက ခံစစ်ကိုသာ အာရုံစိုက်ပိတ်ဆို့ကစားခဲ့ပြီး အင်္ဂလန်အသင်းကိုယ်တိုင်လည်း ပြိုင်ဘက်ကိုဖြိုခွဲနိုင်ရေး ရုန်းကန်ခဲ့ရပါတယ်။ ဒါကြောင့် ကွင်းဘေးစည်းမှာ စိတ်ပျက်လက်ပျက်ဖြစ်နေတဲ့ တူချယ်ကိုလည်း အခိုက်အတန့်အချို့မှာ မြင်တွေ့ခဲ့ရပါတယ်။

တူချယ်ကိုယ်တိုင်ကလည်း သူစိတ်ပျက်နေမိတဲ့အကြောင်း အတိအလင်းဝန်ခံခဲ့ပေမယ့် မျှော်လင့်ထားတာထက် ပိုပြီး အလုပ်တွေပိုမိုလုပ်ဆောင်သွားရနိုင်တယ်ဆိုတဲ့ အကြံပြုချက်ကိုတော့ ပယ်ချသွားခဲ့ပါတယ်။ ပွဲပြီးသတင်းစာရှင်းလင်းပွဲအတွင်း တူချယ်က “ မဟုတ်ဘူး၊ လုံးဝမဟုတ်ပါဘူး။ ဒါပေမယ့် တခါတရံမှာ အခွင့်အရေးတစ်ခုကို မြင်တွေ့ပေမယ့် ကိုယ့်ရဲ့ကစားသမားတွေက ဒီအခွင့်အရေးကောင်းကို မမြင်တွေ့ဘူးလို့ ခံစားမိတယ်ဆိုတာ နည်းပြတစ်ဦးအတွက် ပုံမှန်အခြေအနေတစ်ရပ်သာ ဖြစ်ပါတယ်။

ကျွန်တော်လည်း နှစ်ကြိမ်လောက်တော့ စိတ်ပျက်မိခဲ့ပါတယ်။ ဘာကြောင့်လဲဆိုတော့ ကျွန်တော်က အမြင့်ဘောမှတဆင့် အခွင့်အလမ်းရရှိလိမ့်မယ်လို့ ခံစားမိလို့ပါပဲ။ တစ်ကြိမ်က ဟယ်ရီကိန်းအနီး အရမ်းမြင့်မားတဲ့ အမြင့်ဘောပေးပို့မှုဖြစ်ပြီး နောက်တစ်ကြိမ်ကတော့ ဗဟိုကွင်းလယ်ဧရိယာအနားမှာ ဖြစ်ပါတယ်။ ဒီအမြင့်ဘောပေးပို့မှုတွေကို ကျွန်တော်တို့ အသုံးမချနိုင်ခဲ့ဘူးလို့ ခံစားမိပြီး ဒီအခွင့်အရေးတွေကို အသုံးချနိုင်ဖို့အတွက် စုစည်းမှုအားနည်းနေတာမျိုးလည်း ဖြစ်ကောင်းဖြစ်နိုင်ပါတယ်။

ဒါပေမယ့် အဲ့ဒီလိုအခြေအနေတွေက ပုံမှန်ပါပဲ။ စက္ကန့်ပိုင်းလောက်စိတ်ပျက်မိပြီး ကိုယ့်ရဲ့ကစားသမားတွေကို ထပ်ပြီး တွန်းအားပေးသွားရပါမယ်။ ဒါက ပုံမှန်ပါပဲ။ ကျွန်တော်တို့အချင်းချင်းအကြားမှာ ဒီလိုကိစ္စတွေကို သင်ယူသွားဖို့ လိုအပ်ပါတယ်။ ဒီကစားသမားတွေကို ပထမဆုံးအကြိမ်ကိုင်တွယ်ရတာဖြစ်လို့ သူတို့တွေ ဘယ်လိုပြုမူတက်သလဲ၊ ဘာကိုကြိုက်နှစ်သက်သလဲ၊ ဖိအားတွေကိုဘယ်လိုတုံ့ပြန်သလဲ၊ နေရာယူမှုအပြင် ဘောလုံးပိုင်ဆိုင်ထားချိန်နဲ့ ဘောလုံးဆုံးရှုံးသွားချိန်တွေမှာ ဘာတွေလုပ်ဆောင်သလဲဆိုတာကို ကျွန်တော်ကိုယ်တိုင်နားလည်နေစေဖို့ လိုအပ်ပါတယ်။ ဒါတွေက ယေဘုယျအားဖြင့် သာမန်အခြေအနေတစ်ရပ်သာဖြစ်ပြီး အသင်းကိုလည်း ကျွန်တော် ရှင်းပြခဲ့ပါတယ်။

ကြိုးစားအားထုတ်မှု၊ စိတ်နေစိတ်ထားနဲ့ ရလဒ်ပိုင်းအတွက် ကျွန်တော် ကျေနပ်မိပါတယ်။ ကျွန်တော်တို့တွေ အနိုင်ရရှိဖို့မျှော်လင့်ခဲ့ပြီး အားလုံးလည်း အနိုင်ရလဒ်ကို မျှော်လင့်ခဲ့တာပါ။ ဒါပေမယ့် အလုပ်တွေတော့ အများကြီးလုပ်သွားရပါဦးမယ်”လို့ ပြောပါတယ်။ အင်္ဂလန်လက်ရွေးစင်နည်းပြဘဝပွဲဦးထွက်ကာလမှာ အယ်လ်ဘေးနီးယား၊ လတ်ဗီးယားတို့ကို နှစ်ပွဲဆက်အနိုင်ရရှိခဲ့လို့ တူချယ်အတွက် ကျေနပ်လောက်စရာစတင်မှုတစ်ခု ဖြစ်ခဲ့ပါတယ်။

တူချယ်လက်အောက် အင်္ဂလန်လက်ရွေးစင်အသင်းက ဇွန်လအတွင်း အန်ဒိုရာနဲ့ ကမ္ဘာ့ဖလားခြေစစ်ပွဲစဉ်၊ ဆီနီဂေါနဲ့ ခြေစမ်းပွဲစဉ်တွေကို ဆက်လက်ယှဉ်ပြိုင်ကစားရပါမယ်။