အင်္ဂလန်လက်ရွေးစင်နည်းပြသစ် သောမတ်စ်တူချယ်လ်က သူ့အနေနဲ့ အင်္ဂလန်အသင်းကို ကိုင်တွယ်ရင်း နိုင်ငံတော်သီချင်းကို ဆိုဖို့ရှိမရှိကို ရှင်းလင်းပြောကြားလာခဲ့ပါတယ်။ 
ချဲလ်ဆီးနည်းပြဟောင်းဟာ ယခုအခါမှာ အင်္ဂလန်လက်ရွေးစင်အသင်းကို စတင်ဦးဆောင်တော့မှာဖြစ်ပြီး မတ်လ ၂၁ ရက်နဲ့ ၂၄ ရက်နေ့တွေမှာ အယ်လ်ဘေးနီးယား၊ လက်ဗီယာတို့နဲ့ယှဉ်ပြိုင်သွားရမယ့် ကမ္ဘာ့ဖလား ခြေစစ်ပွဲစဉ်တွေမှာ စတင်ကိုင်တွယ်သွားမှာဖြစ်ပါတယ်။
 
ဂါရတ်ဆောက်ဂိတ်ထွက်ခွာသွားပြီးနောက်ပိုင်းမှာ နည်းပြလက်မဲ့ဖြစ်နေတဲ့ အင်္ဂလန်ကို လူငယ်အသင်းနည်းပြ လီကာစလေက ယာယီနည်းပြအဖြစ်အချိန်အနည်းငယ်ကိုင်တွယ်ခဲ့ပေမယ့် အမြဲတမ်းနည်းပြအဖြစ်သို့ ရွေးချယ်ခံခဲ့ရခြင်းမရှိတာကြောင့် တူချယ်လ်ကို အမြဲတမ်းနည်းပြအဖြစ် ခန့်အပ်ခဲ့တာဖြစ်ပါတယ်။  လီကာစလေဟာ အင်္ဂလန်နိုင်ငံမှာ မွေးဖွားခဲ့ပေမယ့် အသင်းကိုတာဝန်ယူကိုင်တွယ်ရချိန်မှာတော့ နိုင်ငံတော်သီချင်းကို သီဆိုခဲ့ခြင်းမရှိပါဘူး။ ယခုအခါ တူချယ်လ်ဟာ အင်္ဂလန်အသင်းရဲ့ ပထမဆုံးဂျာမန်သားနည်းပြဖြစ်လာခဲ့ပေမယ့် သူဟာ အင်္ဂလန်နိုင်ငံတော်သီချင်းကို သီဆိုသွားဖို့အစီအစဉ်ရှိကြောင်း ပြောကြားလာခဲ့ပါတယ်။ 

ဂျာမန်သားက “ပထမဆုံးပြောချင်တာကတော့ ဒီနိုင်ငံတော်သီချင်းက အရမ်းစွမ်းအားကြီးပြီး စိတ်ခံစားမှုမြင့်တက်စေသလို၊ အဓိပ္ပာယ်လည်းအများကြီးရှိတဲ့သီချင်းတစ်ပုဒ်ပါ။ အင်္ဂလန်အသင်းကို ကိုင်တွယ်ရမယ်ဆိုတာ ကျွန်တော့်အတွက်တော့ ဂုဏ်ယူစရာအကောင်းဆုံးအခိုက်အတန့်ပါပဲ။ နိုင်ငံသီချင်းက အဓိပ္ပာယ်ရှိပေမယ့် ကျွန်တော့်အနေနဲ့ ဒီသီချင်းကိုသီဆိုဖို့ အခွင့်အရေးရပြီဆိုမှ သီဆိုသွားမှာပါ။ ဒီသီချင်းကို ဒီအတိုင်းပဲ ဆိုလိုက်လို့မရပါဘူး။ ဒါကြောင့် ကျွန်တော့်ရဲ့ပထမဆုံးပွဲတွေမှာ ဒီသီချင်းကိုမဆိုဖို့ ဆုံးဖြတ်ထားပါတယ်”

“ကျွန်တော့်အနေနဲ့ အသင်းကို ရလဒ်ကောင်းတွေပုံဖော်ပေးနိုင်ပြီဆိုရင်တော့နိုင်ငံတော်သီချင်းကိုသီဆိုဖို့ အခွင့်အရေးရှိပြီလို့ သတ်မှတ်သွားမှာပါ။ ပရိသတ်တွေ၊ ကစားသမားတွေနဲ့ အသင်းရဲ့တာဝန်ရှိသူတွေက ကျွန်တော်ဟာ ဒီသီချင်းကိုသီဆိုဖို့ထိုက်တန်တယ်လို့ ထင်လာတဲ့အချိန်ကျရင် ကျွန်တော်ဆိုသွားမှာပါ” လို့ပြောကြားခဲ့ပါတယ်။ သောကြာနေ့ကပြုလုပ်ခဲ့တဲ့ သတင်းစာရှင်းလင်းပွဲအတွင်း ဂျာမနီဘာသာနဲ့ မေးခွန်းထုတ်ခဲ့တဲ့ ဂျာမန်သတင်းထောက်တဲ့ မေးခွန်းကို တူချယ်လ်ဟာ ပြန်လည်ဖြေကြားခဲ့ခြင်းမရှိဘဲ အင်္ဂလန်ကို လေးစားတဲ့အနေနဲ့  အင်္ဂလိဂ်ဘာသာကိုသာအသုံးပြုဖို့ ပြန်လည်တုံ့ပြန်ခဲ့ပါတယ်။ အခုလို ဂျာမန်သားရဲ့တုံ့ပြန်မှုကို အင်္ဂလန်ပရိသတ်တွေအနေနဲ့ အတော်လေးကျေနပ်အားရခဲ့ကြပြီး ချီးကျူးပြောဆိုမှုတွေ ပြုလုပ်ခဲ့ကြပါတယ်။