အိုးထရက်ဖို့ဒ်နည်းပြဟာ ယူနိုက်တက်ရဲ့ ၂၀၂၄-၂၅ ရာသီ စွမ်းဆောင်ရည် ကျဆင်းခဲ့ပြီးနောက် အရေးကြီးသော နွေရာသီကို ရင်ဆိုင်နေရပါတယ်။ တစ်ချိန်က အင်္ဂလန်တွင် အကြီးဆုံးနှင့် အအောင်မြင်ဆုံး အသင်းဖြစ်ခဲ့တဲ့ ယူနိုက်တက်ဟာ ပရီးမီးယားလိဂ်အမှတ်ပေးဇယားတွင် အဆင့် ၁၅ နေရာသာ ရပ်တည်နိုင်ခဲ့ပြီး ချန်ပီယံလိဂ်ဝင်ခွင့် နေရာများနှင့် ဝေးကွာကာ တန်းဆင်းဇုန်နှင့် ပိုမိုနီးကပ်ခဲ့ပါတယ်။

ယူနိုက်တက်ဟာ ဥရောပတွင် ပိုမိုကောင်းမွန်စွာ ကစားနိုင်ခဲ့ပြီး ယူရိုပါလိဂ် ဖိုင်နယ်သို့ အံ့အားသင့်ဖွယ် တက်ရောက်နိုင်ခဲ့သော်လည်း ဘီလ်ဘာအိုတွင် ပြုလုပ်ခဲ့တဲ့ ဗိုလ်လုပွဲ၌ တော့တင်ဟမ်ကို ရှုံးနိမ့်ခဲ့ပါတယ်။ အာမိုရင်က ယခုနွေရာသီတွင် သူ့ရဲ့ကိုယ်ပိုင် ကစားသမား အများအပြားကို ခေါ်ယူလိုနေပြီး ဝုလ်ဗာဟမ်တန်မှ ယူနိုက်တက်သို့ ပြောင်းရွှေ့ရန် နီးစပ်နေတဲ့ မက်သီယပ်စ်ကွန်ညာမှ စတင်မှာဖြစ်ပါတယ်။

စပို့တင်းလစ္စဘွန်း နည်းပြဟောင်းက တိုက်စစ်မှူးအသစ် ခေါ်ယူရန်နှင့် အခြားသော နေရာများတွင် လူစာရင်းကို အားဖြည့်ရန်လည်း လိုလားသော်လည်း ထိုသို့ပြုလုပ်ရန်အတွက် ကစားသမား အများအပြား ထွက်ခွာခွင့်ပြုရန် ဖိအားပေးခံရနိုင်ပါတယ်။ ယူနိုက်တက်ဟာ နာပိုလီနှင့် ချဲလ်ဆီးတို့ စိတ်ဝင်စားနေတဲ့ ဂါနာချို နှင့် အင်္ဂလန် ကွင်းလယ်လူ ကော့ဘီ မိုင်းနူး အပါအဝင် ကစားသမား အများအပြားအတွက် ကမ်းလှမ်းမှုများကို လက်ခံရန် အသင့်ရှိနေပါတယ်။

ပရီးမီးယားလိဂ် တိုက်စစ်မှူးဟောင်း ခရစ် ဆပ်တန်က ယူနိုက်တက်တွင် ထပ်မံ ထွက်ခွာသင့်တဲ့ ကစားသမား ခြောက်ဦးကို အမည်တပ် ပြောကြားခဲ့ပါတယ်။ ယူနိုက်တက်ဟာ ပြီးခဲ့တဲ့ နွေရာသီတွင် ဘိုင်ယန်မြူးနစ်မှ ခေါ်ယူခဲ့တဲ့ ဒီလစ်ဂ် အပြင် နောက်ခံလူ လုခ်ရှော၊ ကွင်းလယ်လူ ကက်စ်မဲရိုး နှင့် အူဂါတီ တို့ကိုလည်း ရောင်းထုတ်ရမယ်လို့ ဆပ်တန်က ပြောပါတယ်။

ရုန်းကန်နေရတဲ့ တိုက်စစ်မှူးများဖြစ်တဲ့ ဟွိုက်လန်းနှင့် ဇက်ခ်ဇီ တို့ကလည်း ယခုနွေရာသီတွင် ယူနိုက်တက်ရဲ့ ရောင်းထုတ်ရမယ့် စာရင်းထဲမှာ ပါဝင်သင့်တယ်လို့ ဆပ်တန်က ဆိုပါတယ်။ ယခုလို အရှက်ရဖွယ်ရာ ရာသီအပြီးတွင် မန်ချက်စတာ ယူနိုက်တက်အတွက် နောက်ထပ်ရွေးချယ်စရာ တစ်ခုမှာ ၎င်းတို့ နိုဝင်ဘာလက အဲရစ် တန်ဟက်ဂ်ရဲ့ နေရာတွင် အစားထိုး ခန့်အပ်ခဲ့သော အာမိုရင်ကို ထုတ်ပယ်ရန် ဖြစ်ပါတယ်။

သို့သော်လည်း ဆာဂျင်မ်ရက်ကလစ်ဖ်က အမ်မိုရင်ကို အိုးထရက်ဖို့ဒ်တွင် အခြေအနေများ ပြောင်းလဲရန် အချိန်ပိုပေးလိုပြီး ဆပ်တန်ကလည်း ထိုဆုံးဖြတ်ချက်ကို သဘောတူပါတယ်။ "ရူဘင်အာမိုရင်က မလိုက်လျောပါဘူး သူ ဘယ်တော့မှ မပြောင်းဘူးလို့ သူပြောပါတယ်" လို့ ဆပ်တန်က ထပ်လောင်းပြောကြားခဲ့ပါတယ်။ "ယူနိုက်တက်မှာ သူ့ရဲ့အချိန်ကို အောင်မြင်ဖို့ဆိုရင် သူ့ရဲ့ စတိုင်လ်နဲ့ ကိုက်ညီတဲ့ ကစားသမားတွေနဲ့ ခေါ်ယူပေးဖို့ လိုပါတယ်"

"ပြဿနာက သူတို့ ဘယ်လောက်သုံးဖို့ ရှိမှန်း ကျွန်တော် မသိပါဘူး။ ယူနိုက်တက်က အခု ပိုက်ဆံ အလွန်အကျွံ သုံးစွဲနေတာ မဟုတ်ဘူး၊ ဒါ့အပြင် ကစားသမားကြီးတွေက အဲဒီကို သွားချင်ပါ့မလား။ ဒါပေမယ့် သူတို့ သူ့ကို ကူညီသရွေ့ အမ်မိုရင်ကို ကျွန်တော် ထားရှိပါလိမ့်မယ်" လို့ ဆပ်တန်က ပြောကြားခဲ့ပါတယ်။

ကလပ်ရဲ့ နောက်ဆုံး ပရီးမီးယားလိဂ် ပွဲစဉ်အပြီးတွင် ယူနိုက်တက် ပရိသတ်များကို မိန့်ခွန်းပြောကြားရာ၌ အာမိုရင်က အိုးထရက်ဖို့ဒ်သို့ ကောင်းသောနေ့ရက်များ ပြန်လည် ဆောင်ကြဉ်းပေးမည်ဟု ကတိပြုခဲ့ပါတယ်။ "ပထမဆုံးအနေနဲ့ ဒီရာသီအတွက် ကျွန်တော် တောင်းပန်ချင်ပါတယ်။ ကျွန်တော့်နဲ့ အသင်းအပေါ် ခင်ဗျားတို့ အရမ်း စိတ်ပျက်နေမယ်ဆိုတာ ကျွန်တော် သိပါတယ်"

"ဒုတိယအနေနဲ့ ကျေးဇူးတင်ကြောင်း ပြောချင်ပါတယ်။ ဒီရာသီမှာ ခင်ဗျားတို့ရဲ့ အားပေးမှုအတွက် ကျွန်တော်တို့ အလွန်ကျေးဇူးတင်ပြီး ပွဲများစွာမှာ ကျွန်တော်တို့ကို အားပေးဖို့ ခက်ခဲခဲ့တယ်ဆိုတာ ကျွန်တော် သိပါတယ်" "ဒါပေမယ့် အခုတော့ ကျွန်တော်တို့ ရွေးချယ်မှု လုပ်ရပါမယ်။ အတိတ်မှာပဲ ဆက်နေမလား။ ဘာလို့လဲဆိုတော့ ဒီရာသီက အတိတ်ဖြစ်သွားပြီ။ ပြီးသွားပြီ။ ကျွန်တော်တို့ တစ်ယောက်နဲ့တစ်ယောက် တိုက်ခိုက်မလား၊ ဒါမှမဟုတ် အတူတူ ပူးပေါင်းပြီး ရှေ့ဆက်မလား"

"ခြောက်လအကြာ၊ ကျွန်တော် တာဝန်ယူခဲ့တဲ့ ပထမသုံးပွဲအပြီးမှာ ကျွန်တော်တို့ နှစ်ပွဲနိုင်၊ တစ်ပွဲသရေ ရခဲ့ပြီး မုန်တိုင်းလာတော့မယ်လို့ ကျွန်တော် ပြောခဲ့ပါတယ်။ ဒါပေမယ့် ဒီလို ဆိုးရွားတဲ့ရာသီအပြီး ဒီနေ့မှာတော့ ကောင်းသောနေ့ရက်တွေ ရောက်တော့မယ်လို့ ကျွန်တော် ပြောချင်ပါတယ်"

"ကမ္ဘာပေါ်မှာ ဘယ်အခြေအနေ ဘယ်လိုဘေးဆိုးကိုမဆို ကျော်လွှားနိုင်တယ်ဆိုတာ အတိတ်က သက်သေပြခဲ့တဲ့ ကလပ်တစ်ခု ရှိတယ်ဆိုရင် အဲဒါက ကျွန်တော်တို့ ကလပ်ပါပဲ။ မန်ချက်စတာ ယူနိုက်တက် ဘောလုံးကလပ်ပါ" "အခု ကျွန်တော့် ကစားသမားတွေကိုလည်း တောင်းပန်ချင်ပါတယ်။ တစ်ခါတလေ ကျွန်တော် မမျှတခဲ့ပေမယ့် ခင်ဗျားတို့နဲ့ အမြဲတမ်း ရိုးသားဖို့ ကြိုးစားခဲ့ပါတယ်။ အများကြီး ကျေးဇူးတင်ပါတယ်။ နောက်ရာသီမှာ တွေ့မယ်" လို့ အာမိုရင်က ပြောကြားခဲ့ပါတယ်။