နယ်သာလန်လက်ရွေးစင်နည်းပြ ရော်နယ်ကိုးမန်းက အက်သလက်တီကိုမက်ဒရစ်ကို ၂-၄ နဲ့အနိုင်ရခဲ့တဲ့ ဘာစီလိုနာရဲ့ပွဲစဉ်ကို လွဲချော်ခဲ့တဲ့ အသင်းရဲ့ကွင်းလယ်လူ ဖရန်ကီဒီဂျောင်ရဲ့အခြေအနေကို အသိပေးပြောကြားလာခဲ့ပြီး ကစားသမားဟာ ဒဏ်ရာပြဿနာကြုံတွေ့နေတာမဟုတ်ဘူးလို့ဆိုပါတယ်။

ဘာစီလိုနာနည်းပြဟန်ဆီဖလစ်က သူ့အနေနဲ့ ဒီဂျောင်ကို အက်သလက်တီကိုနဲ့ပွဲစဉ်မှာ ပွဲထုတ်ဖို့စီစဉ်ထားခဲ့ပေမယ့် ကစားသမားဟာ နေမကောင်းဖြစ်နေတာကြောင့် လူစာရင်းကနေထုတ်ပယ်ခဲ့ရတယ်လို့ ဆိုပါတယ်။ ရော်နယ်ကိုးမန်းအနေနဲ့ စွယ်စုံရကွင်းလယ်လူကို နယ်သာလန်လူစာရင်းအတွက် ရွေးချယ်ထားခဲ့တာဖြစ်ပြီး လောလောဆယ်မှာတော့ ကစားသမားဟာ ဒဏ်ရာပြဿနာကြုံတွေ့နေရတာမဟုတ်ဘဲ ဖျားနာနေတာဖြစ်တယ်လို့ အသိပေးလာခဲ့ပါတယ်။ 

သတင်းစာရှင်းလင်းပွဲမှာ ကိုးမန်းက "အက်သလက်တီကိုနဲ့ပွဲစဉ်မတိုင်မီမှာပဲ ဖရန်ကီဒီဂျောင်က နေမကောင်းဖြစ်ခဲ့ပါတယ်။ သူ့ကို မက်ဒရစ်ကနေ ဘာစီလိုနာကို ပြန်ခိုင်းခဲ့ပြီး ကြံ့ခိုင်မှုပြန်လည်တည်ဆောက်စေခဲ့ပါတယ်။ လောလောဆယ်မှာတော့ သူနေမကောင်းဖြစ်နေတုန်းပါ"

"သူမကစားနိုင်လို့ ကျွန်တော့်အနေနဲ့ ထိတ်လန့်တာမျိုးတော့မဖြစ်ပါဘူး။ ဘာကြောင့်လဲဆိုတော့ ဒါက ဖြစ်နိုင်တာပဲလေ။ ဘာစီလိုနာနည်းပြကလည်း ဒီဂျောင်က ဒဏ်ရာပြဿနာကြုံတွေ့တာမဟုတ်ကြောင်း ကျွန်တော့်ကို ပြောခဲ့ပါတယ်။ ဒါကြောင့် ဒဏ်ရာထက်စာရင်တော့ အခုလိုအခြေအနေက ပိုကောင်းပါတယ်" လို့ပြောကြားခဲ့ပါတယ်။ 

ဒီဂျောင်မပါဝင်နိုင်ခဲ့တာကြောင့် ဘာစီလိုနာရဲ့ကွင်းလယ်မှာ မာ့ခ်ကာဆာဒိုက ပါဝင်ကစားခဲ့ပေမယ့် ကံမကောင်းစွာဘဲ ကာဆာဒိုဟာ ဒူးခေါင်းဒဏ်ရာပြဿနာကြုံတွေ့ခဲ့ရပြီး ရာသီကုန်အထိ အနားယူသွားရမယ်လို့သိရပါတယ်။ နယ်သာလန်အသင်းဟာ နေရှင်းလိဂ်ကွာတားဖိုင်နယ်ပွဲစဉ်တွေအဖြစ် စပိန်အသင်းနဲ့ ၂ ကျော့ကစားသွားရမှာဖြစ်ပြီး ဒီဂျောင်အနေနဲ့ နိုင်ငံအသင်းနဲ့ အချိန်မီပြန်လည်ချိတ်ဆက်နိုင်ဖို့ မျှော်လင့်နေမှာဖြစ်ပါတယ်။