လူကာကူအတွက် ချစ်ခြင်းမေတ္တာတွေ လိုအပ်နေတယ်လို့ ရှင်းပြလိုက်တဲ့ ရိုးမားနည်းပြမော်ရင်ဟို
ယနေ့မနက်ပိုင်း၊ အိမ်ကွင်းမှာ အမ်ပိုလီကို ၇-၀ ဂိုးဖြင့် အနိုင်ရရှိခဲ့တဲ့ပွဲစဉ်အတွင်း ရိုးမားအတွက် ပွဲဦးထွက်သွင်းဂိုး ရယူပေးခဲ့တဲ့ ချဲလ်ဆီးအငှားကစားသမား လူကာကူဟာ ချစ်ခြင်းမေတ္တာတွေ ခံစားရဖို့ လိုအပ်နေတယ်လို့ နည်းပြမော်ရင်ဟိုက ရှင်းပြလိုက်ပါတယ်။ ပြီးခဲ့တဲ့ဩဂုတ်လနှောင်းပိုင်းမှာ လူကာကူက ဆရာဟောင်းဖြစ်တဲ့ မော်ရင်ဟိုနဲ့ ဖုန်းပြောဆိုပြီးနောက် ချဲလ်ဆီးမှ ရိုးမားဆီ တစ်ရာသီအငှားစာချုပ်နဲ့ပြောင်းရွှေ့ဖို့ သဘောတူညီခဲ့ပါတယ်။
ပြီးခဲ့တဲ့ဘောလုံးရာသီနှစ်ခုမှာ တည်ငြိမ်တဲ့စွမ်းဆောင်ရည်ပိုင်းပြသနိုင်ဖို့ ရုန်းကန်ခဲ့ရတဲ့ ဘယ်လ်ဂျီယံလက်ရွေးစင် တိုက်စစ်မှူးရဲ့ စွမ်းဆောင်ရည်ကောင်းတွေကို ဘယ်လိုထုတ်ယူရမလဲဆိုတာ အမ်ပိုလီကို ဂိုးပြတ် အနိုင်ရရှိခဲ့တဲ့ပွဲစဉ်အပြီး နည်းပြမော်ရင်ဟိုက ရှင်းပြခဲ့ပါတယ်။ ဒါ့အပြင် အင်တာမီလန်ကလည်း တိုက်စစ်လက်နက်ပေါကြွယ်ဝနေလို့ လူကာကူအပေါ် စိတ်ဆိုးဒေါသထွက်နေစရာအကြောင်း မရှိပါဘူးလို့ အရွှမ်းဖောက်ခဲ့ပြန်ပါတယ်။
DAZN သတင်းဌာနနဲ့တွေ့ဆုံချိန် မော်ရင်ဟိုက "ကျွန်တော် သူပျော်ရွှင်နေတာကို တွေ့ပါတယ်။ လူကာကူက ပျော်ရွှင်နေဖို့၊ ချစ်ခြင်းမေတ္တာတွေ ခံစားရဖို့ လိုအပ်သလို လိုလည်းလိုချင်ခဲ့ပါတယ်။ သူ ဒီအသင်းဆီ ရောက်ရှိလာပြီးနောက် သူ့လိုကစားသမားမျိုး အသင်းက လိုအပ်နေတယ်ဆိုတာ ချက်ချင်းဆိုသလိုပဲ ခံစားမိခဲ့ပါတယ်။ ကျွန်တော့်အမြင် လူကာကူက တကယ်ပျော်ရွှင်နေသလို အနိုင်ရရှိမှုကိုလည်း ကြိုက်နှစ်သက်ပါတယ်။ ဒါက သူ့သဘာဝပါ။ အင်တာမီလန်ကတော့ ဒေါသထွက်နေဖို့ မလိုအပ်ပါဘူး။ ဘာကြောင့်လဲဆိုတော့ သူတို့က မီလန်ဒါဘီမှာ ဂိုးပြတ်အနိုင်ရရှိခဲ့သလို တိုက်စစ်မှူးများစွာနဲ့အတူ သာမန်ထက်ပိုတဲ့ အသင်းတစ်ခုလည်း ရှိနေလို့ပါ။ လူကာကူကို လိုအပ်ခဲ့တဲ့ သူတို့ရဲ့နည်းပြဟောင်းအတွက်ပဲ အင်တာပရိသတ်တွေ ပျော်ရွှင်ပေးရပါမယ်"လို့ ပြောပါတယ်။
၂၀၂၁ ခုနှစ်၊ သြဂုတ်လအတွင်း အင်တာမီလန်မှ ချဲလ်ဆီးဆီ ပြောင်းရွှေ့ကြေးပေါင် ၉၈ သန်းဖြင့် ရောက်ရှိလာပြီးနောက် အရပ် ၆ ပေ ၃ လက်မရှိတိုက်စစ်မှူးဟာ ပြိုင်ဘက်ခံစစ်ဧရိယာအတွင်း တည်ငြိမ်မှုကင်းမဲ့တဲ့စွမ်းဆောင်ရည်တွေကြောင့် ဝေဖန်ခံခဲ့ရပါတယ်။ အသက်-၃၀ နှစ်အရွယ်တိုက်စစ်မှူးက ၂၀၂၁-၂၀၂၂ ဘောလုံးရာသီမှာ ချဲလ်ဆီးအတွက် ၁၅ ဂိုးပဲ သွင်းယူနိုင်ခဲ့သလို ပြီးခဲ့တဲ့ဘောလုံးရာသီမှာလည်း အင်တာမီလန်ဆီ အငှားကစားသမားအဖြစ် ရောက်ရှိလာကာ ၁၄ ဂိုးသာ သွင်းယူခဲ့ပါတယ်။ အကယ်၍ ကြံ့ခိုင်မှုသာပြည့်ဝနေပြီး မော်ရင်ဟိုကလည်း သူ့ရဲ့ပုံစံကောင်းကို ဖော်ထုတ်ပေးနိုင်မယ်ဆိုရင် လူကာကူက ထိပ်တန်းပြိုင်ပွဲတစ်ခုမှာ အားကောင်းမောင်းသန်ပေါ်ထွက်လာဖို့ ရှိနေပါတယ်။
ရိုးမားက လာမယ့်ကြာသပတေးနေ့မှာ ယူရိုပါလိဂ်ပွဲစဉ်အဖြစ် မော်လ်ဒိုဗာကလပ် ရှရစ်ဖ်နဲ့ ယှဉ်ပြိုင်ကစားရဖို့ ရှိပြီး အသင်းရဲ့တိုက်စစ်ပိုင်းကို လူကာကူကပဲ ဦးဆောင်လာဖွယ်ရှိနေပါတယ်။
