အမေရိကန်လက်ရွေးစင်နည်းပြ ပိုချက်တီနိုက သူ့ရဲ့အသင်းဟာ ၂ ပွဲဆက်တိုက်ရှုံးထားပေမယ့် ကမ္ဘာ့ဖလားပြိုင်ပွဲအတွက်သာ အဓိကထားပြီး ပြင်ဆင်နေတာဖြစ်လို့ အဆိုးမမြင်ကြဖို့နဲ့ ရှုံးပွဲတွေကိုလက်ခံကြဖို့ ပရိသတ်တွေကို တောင်းဆိုလာခဲ့ပါတယ်။ 

ကွန်ကာကက်ဖ်နေရှင်းလိဂ် ဆီမီးဖိုင်နယ်ပွဲစဉ်မှာ ပနားမားကို ၀-၁ နဲ့အရေးနိမ့်ပြီး တတိယနေရာလုပွဲသာယှဉ်ပြိုင်ခဲ့ရတဲ့ အမေရိကန်ဟာ အဆိုပါတတိယနေရာလုပွဲမှာလည်း ကနေဒါကို ၂-၁ နဲ့ထပ်မံရှုံးနိမ့်ခဲ့တာဖြစ်ပါတယ်။ ပိုချက်တီနိုရဲ့အသင်းဟာ ရလဒ်ပိုင်းသာမက ခြေစွမ်းပိုင်းကလည်း အားရစရာမရှိခဲ့ဘဲ ကနေဒါနဲ့ပွဲစဉ်မှာ ပထမပိုင်းအတွင်း ဂိုးပေါက်ကန်သွင်းချက် တစ်ကြိမ်သာပြုလုပ်နိုင်ခဲ့တာဖြစ်ပါတယ်။ 

လာမယ့် ၂၀၂၆ ကမ္ဘာ့ဖလားပြိုင်ပွဲကို အိမ်ရှင်အဖြစ် ပူးတွဲလက်ခံကျင်းပသွားမယ့် အမေရိကန်အနေနဲ့ နောက်နှစ် ဇွန်လ ကမ္ဘာ့ဖလားအဖွင့်ပွဲစဉ်မှာ‌တော့ လက်ရှိခြေစွမ်းမျိုးကို ပြောင်းလဲသွားနိုင်ဖို့လိုအပ်နေပါတယ်။ နည်းပြ ပိုချက်တီနိုကတော့ သူ့ရဲ့အသင်းဟာ ကမ္ဘာ့ဖလားပြိုင်ပွဲမှာတော့ ပိုကောင်းတဲ့ပုံစံမျိုး ပြသနိုင်မယ်လို့ယုံကြည်ကြောင်း ပြောကြားခဲ့ပါတယ်။ 

အာဂျင်တီးနားသားနည်းပြက "ကမ္ဘာ့ဖလားမှာပါဝင်ယှဉ်ပြိုင်ဖို့ မတူညီတဲ့အသင်းတွေက မတူညီတဲ့ပုံစံတွေနဲ့ကြိုးစားနေကြပါတယ်။ ကမ္ဘာ့ဖလားပြိုင်ပွဲမရောက်မချင်း ဘယ်သူမှ ကောင်းနေမှာတော့မဟုတ်ပါဘူး။ ဒါကြောင့် ပရိသတ်တွေကိုပြောချင်တာက အသင်းကို အဆိုးမမြင်ကြဖို့ပါ။ ဒီလိုရှုံးပွဲတွေကဖြစ်တတ်ပါတယ်။ ကျွန်တော်တို့ရဲ့အဓိက ပန်းတိုင်က ကမ္ဘာ့ဖလားပါ"

"ရှုံးတဲ့အခါမှာ ကျွန်တော်တို့နာကျင်ရတယ်ဆိုပေမယ့် လက်ခံနိုင်ဖို့လည်းလိုပါတယ်။ ပရိသတ်တွေ စိတ်ပျက်မှာကိုတော့ ကျွန်တော်မလိုချင်ပါဘူး။ အနိုင်မရတဲ့အတွက် အားလုံးစိတ်ပျက်နေကြပါတယ်။ အသင်းမှာ ကစားသမားကောင်းတွေရှိလို့ အဆိုးမြင်ဖို့ကိုတော့ ကျွန်တော်ခွင့်မပြုပါဘူး။ ပြီးခဲ့တဲ့ကြာသပတေးနေ့နဲ့ ဒီနေ့လိုရလဒ်မျိုး ထပ်မကြုံတွေ့ရဖို့ ကျွန်တော်တို့ အတတ်နိုင်ဆုံး စွမ်းဆောင်သွားပါမယ်" လို့ပြောကြားခဲ့ပါတယ်။ 

ဆက်လက်ပြီး လာမယ့်နှစ် ကမ္ဘာ့ဖလားပြိုင်ပွဲမှာလည်း အသင်းက ဒီလိုပုံစံအတိုင်းဖြစ်နေဦးမယ်ဆိုရင်တော့ အခက်အခဲတွေရှိလာမှာဖြစ်ကြောင်းကို ပိုချက်တီနိုက "ကျွန်တော်တို့မှာ ဒီလိုအခြေအနေအတိုင်းပဲ နောက်နှစ်မှာလည်း ဆက်ဖြစ်နေရင် သေချာပါတယ်။ ကျွန်တော်တို့ ပြဿနာတက်ပါပြီ။ ဒါပေမယ့် ကျွန်တော်တို့မှာ အချိန် ၁ နှစ်တောင်ကျန်နေသေးလို့ ပိုကောင်းတဲ့ နည်းဗျူဟာတွေနဲ့ အသင်းကိုတည်ဆောက်ဖို့ အချိန်ရပါသေးတယ်။ ဒီနေ့မှာရှုံးနိမ့်ခဲ့တဲ့ပုံစံမျိုး တစ်နှစ်အတွင်းမှာ ထပ်မကြုံရဖို့ ကြိုးစားသွားရပါမယ်" လို့ပြောကြားခဲ့ပါတယ်။ 

အမေရိကန်အသင်းခေါင်းဆောင် ခရစ်ရှင်ပူလီဆစ်ကလည်း "အသင်းမှာ ပြောင်းလဲဖို့လိုအပ်တာတွေရှိပါတယ်။ ဒီနေ့မှာရှုံးခဲ့လို့ အရမ်းစိတ်ပျက်မိပါတယ်။ အသင်းက အကောင်းဆုံးပုံစံမှာရှိမနေပါဘူး။ ကလပ်အသင်းတွေကိုပြန်သွားပြီး နိုင်ငံအသင်းအတွက် ဘယ်လိုအကောင်းဆုံးပုံစံနဲ့ပြန်လာနိုင်ရမလဲဆိုတာ စဉ်းစားသွားရပါမယ်။ ကျွန်တော်တို့ တိုးတက်ဖို့လိုအပ်နေပါတယ်။ ပြန်လာနိုင်ဖို့ကြိုးစားသွားရမှာဖြစ်ပြီး လောလောဆယ်မှာတော့ အသင်းရဲ့ပုံစံအတွက် ကျွန်တော့်မှာအဖြေမရှိပါဘူး" လို့ပြောကြားခဲ့ပါတယ်။