ယမန်နေ့ညပိုင်း၊ လိဒ်ကို နောက်ကျသွင်းဂိုးအပါအဝင် ၃-၂ ဂိုးဖြင့် အနိုင်ယူပြီးနောက် မန်စီးတီးကြယ်ပွင့်ဖိုဒန်က သူ့ရဲ့စိတ်ပိုင်းဆိုင်ရာသက်သောင့်သက်သာရှိသွားမှုကို မဖုံးကွယ်ထားနိုင်ခဲ့ပါဘူး။ အခုပွဲစဉ်ရဲ့ပထမဆုံးမိနစ်မှာတင် အသက်-၂၅ နှစ်အရွယ်ဖိုဒန်က အဖွင့်ဂိုးကို သွင်းယူခဲ့သလို ပွဲချိန် ၂၅ မိနစ်မှာလည်း ဂျီဗာဒီအောလ်က ဒုတိယမြောက်ဦးဆောင်ဂိုး သွင်းယူခဲ့ပါတယ်။ ဒါပေမဲ့ လိဒ်က ကဲလ်ဗက်လီဝင်၊ အန်မီချာတို့ရဲ့သွင်းဂိုးတွေနဲ့ ပွဲစဉ်ဆီ ပြန်လာခဲ့ပြီး လတ်တလောရုန်းကန်နေရမှုကို အကောင်းဆုံးဖြေရှင်းနိုင်ဖို့ ကြိုးစားခဲ့ပါတယ်။

ဒီတစ်ကြိမ်မှာလည်း အချိန်မှန်၊ နေရာမှန်ရောက်ရှိနေတဲ့ ဖိုဒန်ရဲ့ကျေးဇူးကြောင့် ပွဲချိန် ၉၁ မိနစ်အနိုင်ဂိုးနဲ့အတူ မန်စီးတီးတို့ အနိုင်သုံးမှတ်အပြည့် ရရှိခဲ့ပါတယ်။ ပွဲစဉ်အပြီး ဖိုဒန်က သူတို့အသင်းအနိုင်ရလဒ်အတွက် မယုံကြည်နိုင်လောက်အောင် ဖြစ်မိတယ်လို့ ဝန်ခံခဲ့ပြီး ရူးသွပ်ချင်စရာ အကြမ်းတမ်းဆုံးပွဲစဉ်တွေအနက် တစ်ခုအဖြစ် ညွှန်းဆိုသွားခဲ့ပါတယ်။

ဖိုဒန်က “ ဒီကွင်းရဲ့ ရူးသွပ်ချင်စရာ အကြမ်းတမ်းဆုံးပွဲစဉ်တွေအနက် တစ်ခု ဖြစ်သွားခဲ့ပါပြီ။ ပထမပိုင်းပွဲချိန်အတွင်းမှာဆိုရင် ကျွန်တော်တို့တွေ ပွဲစဉ်ကို အပြည့်အဝထိန်းချုပ်နိုင်ခဲ့ပါတယ်။ ဒုတိယပိုင်းပွဲချိန်တွေမှာတော့ ပြိုင်ဘက်ကိုယ်တိုင် သူတို့ရဲ့ကစားပုံကို ပြောင်းလဲခဲ့ပြီး ကျွန်တော်တို့တွေ အလိုက်သင့်မကစားနိုင်ခဲ့ပါဘူး။ စိတ်ပျက်စရာကောင်းတဲ့ အခိုက်အတန့်တစ်ခု ဖြစ်ပါတယ်။ ဒါပေမဲ့ ခေတ္တခဏလောက်အနားရရှိချိန် နည်းပြကိုယ်တိုင် ကျွန်တော်တို့ကို စုစည်းခဲ့ပြီး ပြိုင်ဘက်ရဲ့ကစားကွက်နဲ့ လိုက်လျောညီထွေဖြစ်အောင် လုပ်ပေးခဲ့ပါတယ်။ ဒီနောက်မှာ အခွင့်အရေးအနည်းငယ်ရရှိလာပြီး နောက်ဆုံးမှာတော့ ကျွန်တော်ရရှိထားတဲ့ နေရာလွတ်အနည်းငယ်နဲ့အတူ ဂိုးပေါက်ကိုရှာဖွေတွေ့ရှိခဲ့ပါတယ်။ ဒီရလဒ်အတွက် ကျွန်တော်တို့ ကျေနပ်မိပါတယ်”လို့ ပြောပါတယ်။