ရိန်းဂျားစ်ကိုရှုံးနိမ့်ကာ ယူရိုပါလိဂ်ပြိုင်ပွဲမှ ထွက်ခွာခဲ့ရပေမယ့် ဖီနာဘာချီကို ပိုမိုကောင်းမွန်တဲ့အသင်းလို့ မော်ရင်ဟိုက ရှင်းပြခဲ့ပြီး Ibrox ကွင်းကြီးအတွင်း သူ့အသင်းအတွက် ပယ်နယ်တီအခွင့်အရေးသုံးကြိမ်တိုင် ငြင်းပယ်ခံရမှုမှာ ၂၀၂၃ ယူရိုပါလိဂ်ဗိုလ်လုပွဲအပြီး သူ့ရဲ့ပွဲပယ်ပြစ်ဒဏ်ကြောင့်မဟုတ်ဘဲ ကျပန်းကိစ္စတစ်ခုသာ ဖြစ်စေဖို့ မျှော်လင့်မိတယ်လို့ ထုတ်ဖော်ပြောဆိုခဲ့ပါတယ်။

ပေါ်တူဂီသားနည်းပြက ရိုးမားအသင်းကိုကိုင်တွယ်ချိန် ဆီဗီလာကို ပယ်နယ်တီအဆုံးအဖြတ်ဖြင့် အရေးနိမ့်ခဲ့တဲ့ ၂၀၂၃ ယူရိုပါလိဂ်ဗိုလ်လုပွဲအပြီး ကွင်းလယ်ဒိုင်အန်သိုနီတေလာကို ‘ကျက်သတုန်းကောင်’လို့ ခေါ်ဝေါ်ခဲ့ပါတယ်။ အခုတစ်ကြိမ်၊ Ibrox ကွင်းကြီးအတွင်း ယှဉ်ပြိုင်ကစားခဲ့တဲ့ နောက်ဆုံး ၁၆ သင်းရှုံးထွက်ပွဲစဉ်မှာ ဖီနာဘာချီက သာမန်ပွဲကစားချိန်အတွင်း ဝ-၂ ဂိုးဖြင့် အနိုင်ရရှိခဲ့ပေမယ့် နှစ်ကျော့ပေါင်းရလဒ်သုံးဂိုးစီသရေဖြင့် ပယ်နယ်တီအဆုံးအဖြတ်ခံယူပြီးနောက် ရိန်းဂျားစ်တို့ နောက်တစ်ဆင့်တက်လှမ်းသွားနိုင်ခဲ့ပါတယ်။

မော်ရင်ဟိုက “ဥရောပပြိုင်ပွဲတွေမှာ ကျွန်တော်ကြုံတွေ့နေရတဲ့အရာတွေအားလုံးက ဘူဒါပတ်ဖိုင်နယ်ပွဲစဉ်ရဲ့ အကျိုးဆက်မဟုတ်ဖို့ပဲ မျှော်လင့်မိပါတယ်။  အဲ့ဒီဗိုလ်လုပွဲအပြီး၊ ကျွန်တော့်ရဲ့ပွဲပယ်ပြစ်ဒဏ်ပြည့်ပြီးချိန်ကတည်းက စတုတ္ထဒိုင်တစ်ဦးတည်းသာ မြင်တွေ့ခဲ့တဲ့ ဖြစ်ရပ်တစ်ခုနဲ့အတူ ပေါ်ပေါက်လာတဲ့ ပွဲချိန် ၁၂၀ မိနစ်၊ ပယ်နယ်တီပြစ်ဒဏ်ကြောင့် ကျွန်တော်တို့တွေ ချန်ပီယံလိဂ်ပြိုင်ပွဲနဲ့ လွဲချော်ခဲ့ရပါတယ်။ ဒါ ကျွန်တော်တို့ ကြုံတွေ့ခဲ့ရတဲ့အရာပါ။

ဒီနေ့မှာလည်း ဒီနေရာအထိ ကျွန်တော်တို့လာရောက်ကစားပြီး VAR လည်း အကောင်းဆုံးစွမ်းဆောင်ခဲ့တယ်လို့ သတ်မှတ်ပါတယ်။ သူက ပယ်နယ်တီသုံးကြိမ်မှာ တစ်လုံးတစ်လေကိုတောင် မမြင်တွေ့ခဲ့ပါဘူး။ ဒါက ကျပန်းဖြစ်စဉ်တစ်ခုလို့သာ မျှော်လင့်မိပါတယ်။ ပွဲပယ်ပြစ်ဒဏ်ကိုလည်း ကျွန်တော် ကျခံပြီးပါပြီ။ ဒါတွေအားလုံး ပြီးဆုံးသွားပြီလို့ပဲ မျှော်လင့်မိပါတယ်။ ကံဆိုးမှုတစ်ခုဖြစ်စေဖို့ပဲ ကျွန်တော် ဆုတောင်းမိပါတယ်”လို့ ပြောပါတယ်။
ဆက်လက်ပြီး မော်ရင်ဟိုက “ သာမန်ပွဲကစားချိန်အတွင်း အနိုင်ရလဒ်နဲ့ ကျွန်တော်တို့ ထိုက်တန်ခဲ့ပါတယ်။ အချိန်ပိုမှာလည်း ကျွန်တော်တို့ အနိုင်ရရှိဖို့ ထိုက်တန်ပါတယ်။ ဖီနာဘာချီက ပိုကောင်းတဲ့အသင်း ဖြစ်ပါတယ်။

ပထမအကျော့ပွဲစဉ်နဲ့ပတ်သက်လို့ အရိုးသားဆုံးပြောရရင် ကျွန်တော်တို့ အမှားတွေကျူးလွန်မိပြီး အရှုံးရလဒ်နဲ့ထိုက်တန်ပါတယ်။ ဒါပေမယ့် ဒီနေ့ပွဲစဉ်မှာတော့ ကျွန်တော်တို့အသင်းက ပိုကောင်းတဲ့အသင်း ဖြစ်တယ်လို့ အရိုးသားဆုံးပြောပါရစေ။ ကွင်းလယ်ဒိုင်နဲ့ VAR ကတော့ ကျွန်တော်တို့တွေ ပယ်နယ်တီအဆုံးအဖြတ်ခံယူသင့်တယ်လို့ ဆုံးဖြတ်ခဲ့ပါတယ်”လို့ ပြောပါတယ်။ အလားတူ မော်ရင်ဟိုက ဘီလ်ဘာအိုကို ရှုံးနိမ့်ခဲ့တဲ့ သူ့အသင်းဟောင်း ရိုးမားအကြောင်းကိုလည်း မှတ်ချက်ပေးလာခဲ့ပါတယ်။ ဘီလ်ဘာအိုက နောက်တစ်ဆင့်မှာ ရိန်းဂျားစ်နဲ့ ရင်ဆိုင်ကစားရပါမယ်။

မော်ရင်ဟိုက “ ဘောလုံးမှာ ဘာမဆိုဖြစ်နိုင်ပါတယ်။ ဒါပေမယ့် ကျွန်တော်လည်း အုပ်စုအဆင့်မှာ ဘီလ်ဘာအိုနဲ့ ရင်ဆိုင်ခဲ့ဖူးပါတယ်။ ဘီလ်ဘာအိုက အသင်းကောင်းတစ်ခုဖြစ်ပြီး ယူရိုပါလိဂ်ဗိုလ်လုပွဲကိုလည်း သူတို့အိမ်ကွင်းမှာပဲ ကျင်းပမှာပါ။ ရိုးမားအသင်း ဘာတွေဖြစ်ပျက်သွားသလဲဆိုတာ ကျွန်တော် မသိပါဘူး။ ဒါပေမယ့် ရိုးမားက ပွဲချိန်အစောပိုင်းမှာပဲ ကစားသမားတစ်ဦးလျော့သွားခဲ့ပါတယ်။ ဒါကြောင့် ရိန်းဂျားစ်သာ ဘီလ်ဘာအိုကို ထပ်မံကျော်ဖြတ်နိုင်မယ်ဆိုရင် အံ့မခန်းစရာဖြစ်လာလိမ့်မယ်လို့ ထင်ပါတယ်။ ရိန်းဂျားစ်ကိုလည်း ဂုဏ်ပြုပါတယ်။ ဒါပေမယ့် ကျွန်တော့်အတွက် ကျွန်တော့်အသင်းကသာ အရာရာတိုင်းနဲ့ ထိုက်တန်တယ်လို့ ထင်ပါတယ်။ သူတို့အတွက် ကျွန်တော် ဂုဏ်ယူမိပါတယ်”လို့ ပြောပါတယ်။