ဂျူဗင်တပ်စ်အသင်းနည်းပြသီယာဂိုမော့တာက မန်စီးတီးအသင်းကိုအနိုင်ယူခဲ့တဲ့ ချန်ပီယံလိဂ်ပွဲစဉ်အပြီး သူ့ရဲ့ကစားသမားတွေအပေါ် ကျေနပ်အားရမှုအပြည့် ရှိနေခဲ့ပါတယ်။ အခုပွဲစဉ်မှာ ဂျူဗင်တပ်စ်က ဗလာဟိုဗစ်၊ မက်ကင်နီးတို့ရဲ့သွင်းဂိုးတွေနဲ့ ပရီးမီးယားလိဂ်ချန်ပီယံတွေကို အနိုင်ယူခဲ့ပါတယ်။

ပွဲစဉ်အပြီး Amazon Prime Video Italia နဲ့တွေ့ဆုံချိန် မော့တာက “ကျွန်တော်တို့အသင်းက စိတ်ဝိညာဉ်၊ နှလုံးသားတွေနဲ့ ကစားခဲ့ပါတယ်။ ဒါပေမယ့် ကျွန်တော်တို့ရဲ့စိတ်ထဲမှာလည်း မှန်ကန်တဲ့အရာတွေ လုပ်ဆောင်ဖို့ ဆန္ဒရှိခဲ့ပါတယ်။ပွဲမစတင်ခင်အချိန်ကတည်းက ခံစစ်ကို ပုံမှန်ထက်ပိုပြီး အာရုံစိုက်သွားရမယ်ဆိုတာ ကျွန်တော်တို့ သိထားခဲ့ပါတယ်။ ဒါပေမယ့် ကျွန်တော်တို့က ဒီအလုပ်ကို အသင်းတစ်ခုအဖြစ် အတူတကွ လုပ်ဆောင်ခဲ့ကြတာပါ။ တိုက်စစ်ပိုင်းမှာဆိုရင်လည်း ကျွန်တော်တို့တွေ အတူတကွ အချိန်ကိုက်တိုက်စစ်ဆင် ကစားနိုင်ခဲ့ပါတယ်။ ဒါ ကျွန်တော်တို့ လုပ်ခဲ့တဲ့အရာဖြစ်ပါတယ်။

ထိုက်တန်တဲ့နိုင်ပွဲတစ်ခုပါ။ ကစားသမားတွေလည်း အကောင်းဆုံးစွမ်းဆောင်နိုင်ခဲ့ပြီး အသင်းမှာ ဒဏ်ရာမှ ပြန်လာတဲ့ကစားသမားအချို့လည်း ရှိနေပါတယ်။ ဒါဟာ ကျွန်တော်တို့အသင်းရဲ့ဆေးဘက်ဆိုင်ရာအဖွဲ့က ကစားသမားတွေ ပုံစံကောင်းပြန်ရရှိလာအောင် အကောင်းဆုံးလုပ်ဆောင်နေတယ်လို့ အဓိပ္ပါယ်ရပါတယ်။ အရန်ခုံပေါ်မှာရှိနေသူတိုင်းက အသင်းအတွက် အကောင်းဆုံးစွမ်းဆောင်ပေးနိုင်ပါတယ်”လို့ ပြောပါတယ်။