မန်စီးတီးက ဝုဗ်ကွင်းလယ်လူ မာသီးယက်စ်နူနက်စ်အတွက် နောက်ဆုံးအကြိမ်အဖြစ် ပေါင် ၅၂ သန်းတန် တိုးမြှင့်ကမ်းလှမ်းမှုတစ်ခုကို လုပ်ဆောင်ခဲ့ပါတယ်။ လတ်တလောမှာ နည်းပြပက်ဂွါဒီယိုလာ မပါဝင်နိုင်တဲ့ ပရီးမီးယားလိဂ်ချန်ပီယံတွေက ရှက်ဖီးယူနိုက်တက်ကို အဝေးကွင်းမှာ အနိုင်ယူနိုင်ခဲ့ပေမယ့် ကွင်းလယ်ကစားသမားအင်အား နည်းပါးနေဆဲလို့ ရှုမြင်ခံထားရပါတယ်။

ပြီးခဲ့တဲ့သီတင်းပတ်အတွင်း ပေါ်တူဂီလက်ရွေးစင်ကွင်းလယ်လူအတွက် မန်စီးတီးရဲ့ ပေါင် ၄၇ သန်းတန် ကမ်းလှမ်းမှုကို ဝုဗ်ဘက်က ပယ်ချခဲ့ပါတယ်။ ဒါပေမယ့် မန်ချက်စတာအခြေစိုက်ကလပ်က ဝုဗ်တို့လက်ခံနိုင်လောက်မယ့် ပမာဏမျိုးနဲ့ နောက်တစ်ကြိမ်ကမ်းလှမ်းမှုတစ်ရပ်ကို ပြုလုပ်လာခဲ့တာပါ။

နူနက်စ်က အခုသီတင်းပတ်ကုန် အဲဗာတန်ကို ခက်ခက်ခဲခဲအနိုင်ရခဲ့တဲ့ပွဲစဉ်အတွက် အသင်းလူစာရင်းမှာ မပါဝင်လာခဲ့ပါဘူး။ သူက ဘရိုက်တန်ကို အရေးနိမ့်ခဲ့တဲ့ပွဲစဉ်မှာ ထုတ်ပယ်ခံခဲ့ရလို့ ပွဲပယ်ပြစ်ဒဏ်ကျခံနေရပါတယ်။ အခုလို မန်စီးတီးရဲ့ကြိုးပမ်းမှုတွေနဲ့ အတူ အသက်-၂၅ နှစ်အရွယ်ကစားသမားဟာ ဝုဗ်အသင်းအတွက် ပြန်လည်ကစားပေးတာမျိုး မရှိနိုင်တဲ့ အခြေအနေတွေနဲ့လည်း နီးစပ်လာနေပါတယ်။

ဝုဗ်ဘက်ကတော့ မန်စီးတီးအကယ်ဒမီထွက်ကစားသမားတွေဖြစ်တဲ့ မက်အာတီ၊ တွမ်မီဒွိုင်လ်တို့ရဲ့ ခြေစွမ်းအပေါ် စိတ်ဝင်စားနေပေမယ့် နူနက်စ်အတွက် ဆွေးနွေးမှုတွေမှာ ဒီကစားသမားတွေကို ရွေးချယ်စရာအဖြစ် ထည့်သွင်းထားတာမျိုး မဟုတ်ပါဘူး။ ပြီးခဲ့တဲ့နှစ်မှာ စပို့တင်းလစ္စဘွန်းမှ ဝုဗ်ဆီ ကလပ်စံချိန်တင်ပြောင်းရွှေ့ကြေး ပေါင် ၃၈ သန်းဖြင့် ရောက်ရှိလာတဲ့ နူနက်စ်က ပရီးမီးယားလိဂ်ကလပ်နဲ့ တစ်နှစ်သက်တမ်းတိုးခွင့်ရှိမယ့် လေးနှစ်စာချုပ် ချုပ်ဆိုထားပါတယ်။

အခုလိုစာချုပ်သက်တမ်းအခြေအနေတွေအရ ဝုဗ်ဟာ နူနက်စ်ရဲ့ အပြောင်းအရွှေ့အတွက် စိတ်ကြိုက်ဆွေးနွေးနိုင်ဖွယ်ရှိပြီး နည်းပြ ဂယ်ရီအိုနေးလ်ကလည်း သတ်မှတ်ဈေးနှုန်းမရရင် အသင်းဘက်က ကစားသမားကို လက်လွှွတ်သွားဖို့မရှိဘူးလို့ ဖွင့်ဟလာပါတယ်။

လတ်တလောသတင်းစာရှင်းလင်းပွဲတစ်ခုအတွင်း အိုနေးလ်က “စာချုပ်သက်တမ်း ၄ ၊ ၅နှစ်လောက် ကျန်ရှိနေသေးတဲ့ နူနက်စ်က ကျွန်တော်တို့အသင်းအတွက် အရေးပါတဲ့ကစားသမားတစ်ဦးဖြစ်ပါတယ်။ ဒါပေမယ့် ကစားသမားအတွက် ထိုက်တန်မယ့် ပြောင်းရွှေ့ကြေးတန်ဖိုးအထိ မရောက်လာဘူးလို့ ယူဆခဲ့တာကြောင့် ကမ်းလှမ်းမှုတစ်ခုကို ကျွန်တော်တို့ ပယ်ချခဲ့ပါတယ်။ ဒီကမ်းလှမ်းမှုရဲ့အသေးစိတ်အချက်အလက်တွေကို ကျွန်တော်မသိခဲ့ရပေမယ့် နူနက်စ်အတွက် သတ်မှတ်ထားတဲ့ဈေးနှုန်းမျိုး မဟုတ်တာတော့ ကျွန်တော်ကောင်းကောင်းသိပါတယ်။ ကျွန်တော်က နည်းပြချုပ်ပါ။ ကျွန်တော်က အသင်းနဲ့အတူ ကစားခွင့်ရရှိမယ့် ကစားသမားတွေကို လမ်းပြပေးနေပါတယ်။ နူနက်စ်ကတော့ အခုသီတင်းပတ်မှာ ပါဝင်ကစားနိုင်ဖို့ မရှိပါဘူး”လို့ ပြောပါတယ်။

အခုနွေရာသီ၊ဘာစီလိုနာဆီ ဂမ်ဒိုဂန်ထွက်ခွာသွားမှုနဲ့အတူ ဒီဘရိုင်းရဲ့ကာလရှည်ဒဏ်ရာ ရရှိမှုတွေကြောင့် မန်စီးတီးဟာ ကွင်းလယ်ကစားသမားသစ် ခေါ်ယူနိုင်ဖို့ လိုအပ်နေပါတယ်။

တဖက်မှာလည်း အီတီဟတ်ကလပ်က ပေါ်တူဂီကြယ်ပွင့်အတွက် ဈေးပိုပေးရမယ့်ကိစ္စအပေါ် သတိကြီးကြီးထားကိုင်တွယ်သုံးသပ်နေပြီး ဒီလိုအခြေအနေမျိုးဖြစ်လာခဲ့မယ်ဆိုရင် ကစားသမားကို ခေါ်ယူနိုင်ဖို့ လက်ရှောင်သွားပါလိမ့်မယ်။