ယနေ့ည စိန့်ပေါ်လီအသင်းကို ဘွန်ဒက်စ်လီဂါအိမ်ကွင်းပွဲစဉ်အဖြစ် လက်ခံကစားတဲ့အခါ ဘိုင်ယန်မြူးနစ်ဆီကနေ အပြုသဘောဆောင်တဲ့ တုံ့ပြန်မှုမျိုး လိုချင်နေတယ် လို့ နည်းပြ ဗင်းဆင့်ကွန်ပနီက ပြောပါတယ်။ ဘိုင်ယန်ဟာ ဗုဒ္ဓဟူးနေ့က ချန်ပီယံလိဂ်မှာ ပရီးမီးယားလိဂ် အမှတ်ပေးဇယားထိပ်ဆုံးက အာဆင်နယ်ကို ၃-၁ နဲ့ ရှုံးနိမ့်ခဲ့ပြီးနောက် ဒီရာသီ ပြိုင်ပွဲစုံ ပထမဆုံးအကြိမ် ရှုံးပွဲကြုံတွေ့ခဲ့ရတာပါ။ ဘွန်ဒစ်လီဂါ အမှတ်ပေးဇယားထိပ်ဆုံးမှာ ၆ မှတ်ဖြတ်ပြီး ဦးဆောင်နေတဲ့ ကွန်ပနီကတော့ Allianz Arena မှာ ကစားမယ့် လိဂ်ပွဲစဉ်မှာ လမ်းကြောင်းမှန်ပေါ် ပြန်ရောက်ဖို့ မျှော်လင့်နေပါတယ် လို့ သိရပါတယ်။

ကွန်ပနီက"သုံးရက်အကြာမှာ ကျွန်တော်တို့ ဘာလုပ်နိုင်တယ် ဆိုတာ ပြသခွင့်ရတာ ကောင်းပါတယ်။ ကျွန်တော်တို့ ဘယ်တော့မှ မရှုံးချင်ပါဘူး၊ အရှုံးကိုလက်ခံပေမဲ့ မကြိုက်ပါဘူး။ ဒါပေမဲ့ ဒါက ရာသီရဲ့ အဆင့်တစ်ခုမှာ တုံ့ပြန်မှုအကြောင်းပါ၊ အာဆင်နယ်နဲ့ ပွဲအကြောင်းနဲ့ အခု စိန့်ပေါ်လီအကြောင်းပါ။ အခိုက်အတန့်ကောင်းတွေအတွက် ကျွန်တော်တို့ ပြင်ဆင်ထားရပါမယ်၊ ဒါမှ ကျွန်တော်တို့ အဲဒီမှာ ရှိနေပြီး နိုင်ပွဲရမှာပါ။ သူတို့ ၈ ပွဲ ရှုံးထားရင်တောင် မလွယ်ကူဘူးဆိုတာ ကျွန်တော်တို့ သိပါတယ်။ ဘိုင်ယန်နဲ့ပွဲက သူတို့အတွက် ကွာခြားနိုင်ပါတယ်။ ခင်ဗျားတို့ အောက်ဆုံးရောက်နေတဲ့အချိန်မှာ ဒီလိုပွဲမျိုးက ဖိအားနည်းပါတယ်" လို့ ပြောခဲ့ပါတယ်။

အာဆင်နယ်ရဲ့ တတိယဂိုးမှာ အမှားလုပ်ခဲ့တယ်လို့ ဝေဖန်ခံနေရတဲ့ မန်နူရယ်နူရာကိုလည်း ကွန်ပနီက ကာကွယ်ပြောဆိုခဲ့ပါတယ်။ ကွန်ပနီက"ဘာအမှားတွေ ရှိခဲ့လို့လဲ။ ကျွန်တော့်မှာ ဒီကိစ္စနဲ့ ပတ်သက်ပြီး မတူညီတဲ့ အမြင်ရှိပါတယ်။ ဂိုးသမားတစ်ယောက်အနေနဲ့ ခင်ဗျား ဘာလုပ်သင့်သလဲ။ သူ ခင်ဗျားဆီကို တစ်ယောက်ချင်း ထိပ်တိုက်တွေ့ဖို့ ပြေးလာတဲ့အထိ စောင့်နေသင့်သလား။ ဒါမှမဟုတ် ပြေးထွက်ပြီး ကိုယ့်လုပ်ဖော်ကိုင်ဖက်ကို ကူညီပြီး နေရာယူပေးချင်သလား။

ကျွန်တော် နည်းနည်း အံ့သြမိပါတယ်။ ဒါက အမှားတစ်ခု ဖြစ်ခဲ့တယ်လို့ ကြားရတာ ဒါပထမဆုံးပါပဲ။ ဂိုးသမား လဲဖို့ ကျွန်တော်တို့ ဆုံးဖြတ်မယ်ဆိုရင် မန်နူနဲ့ အမြဲတမ်း တိုင်ပင်ပါတယ်။ အခု ကျွန်တော်တို့ အဲဒီလို မလုပ်ထားပါဘူး၊ အသင်းအတွက် ဘာက အကောင်းဆုံးလဲ ဆိုတာ ကျွန်တော် စဉ်းစားရပါမယ်" လို့ ပြောပါတယ်။