ဘိုင်ယန်မြူးနစ်နောက်ခံလူ အူပါမီကာနိုက သူငယ်ချင်းဖြစ်သူ ဒမ်ဘီလီတစ်ယောက် ဘော်လွန်းဒီအော်ဆုရတဲ့အပေါ် မျက်ရည်ကျခဲ့မိကြောင်း ပြောကြားလိုက်ပါတယ်။

Le Parisien နဲ့အင်တာဗျူးမှာ အူပါမီကာနိုက ပြင်သစ်အသင်းဖော်ဆုရတာကို ဂုဏ်ယူမိသလို ဝမ်းသာမျည်ရည်လည်းကျခဲ့တယ်လို့ ဖြေကြားခဲ့ပါတယ်။ အသက် ၂၈ နှစ်သားဟာ ပဲရစ်မြေမှာ အဆိုပါဆုကို ဘာစီလိုနာစတား ယာမဲလ် ၊ ပီအက်စ်ဂျီအသင်းဖော် ဗီတင်ဟာတို့ကိုကျော်ဖြတ်ကာရယူနိုင်ခဲ့တာဖြစ်ပါတယ်။

၂၀၂၄ - ၂၅ ရာသီမှာ ဒမ်ဘီလီဟာ ပီအက်စ်ဂျီနဲ့အတူ ချန်ပီယံလိဂ်အပါဝင် ဖလား ၃ လုံးရယူနိုင်ခဲ့ပြီး ၃၅ ဂိုးသွင်း ၊ ၁၄ ဂိုးဖန်တီးနိုင်ခဲ့ပါတယ်။ ငယ်ဘဝကျောင်းနေဖက် ဒမ်ဘီလီဆုရတဲ့အပေါ် အူပါမီကာနိုက “ကျွန်တော်တို့ အတူတူကျောင်းသွားခဲ့တာပါ။ ကွင်းအတူတူမှာကစားခဲ့ဖူးပါတယ်။ ကျွန်တော် သူနဲ့ CM1-CM2 မှာရင်ဆိုင်ကစားဖူးပါတယ်။ အရိုးသားဆုံးပြောရရင် ကျွန်တော့်မှာပြောစရာစကားလုံးမရှိတော့ပါဘူး။

သူက ကစားသမားကောင်းဖြစ်လာနိုင်တယ်ဆိုတာကို အားလုံးသိပါတယ်။ ဒါပေမယ့် အခုချိန်ထိလည်းဖြစ်နေဆဲပါ။ သူဘော်လွန်းဒီအော်ဆုကိုင်မြှောက်လိုက်ချိန်မှာ ကျွန်တော့်မျက်လုံးထဲမှာ မျက်ရည်တွေပြည့်နေခဲ့ပါတယ်။ ကျွန်တော် အဲ့ဆုပေးပွဲမှာရှိနေရမှာဖြစ်ပေမယ့် မလာနိုင်ခဲ့ပါဘူး။ သူ့အမေ ၊ သူ့မိသားစု ၊ သူ့သူငယ်ချင်း နဲ့ အားလုံးကိုကျေးဇူးတင်နေတာကိုမြင်ရတာ တကယ့်မှော်ဝင်အခိုက်အတန့်ပါ။

ခင်ဗျားသူငယ်ချင်းတွေနဲ့အတူ ကစားချိန်မှာ အဲ့တာက အံ့ဖွယ်ခရီးစဉ်တစ်ခုလိုပါပဲ။ Evreux မှာ လူတိုင်းအတူတူလာကြပါတယ်။ အာဖရိက ၊ တူရကီ ၊ လူတိုင်းလည်းပျော်ကြပါတယ်။
အဲ့တာက ခင်ဗျားကိုထူးခြားအောင်လုပ်ပေးနိုင်ပါတယ်။ ကျွန်တော်တို့မြို့ကနေ ဘော်လွန်းဒီအော်ဆုရတာက တကယ့်ကိုဂုဏ်ယူစရာပါ”လို့ အူပါမီကာနိုက ဖြေကြားခဲ့ပါတယ်။

ပြင်သစ်သားဟာ လက်ရှိမှာ တံကောက်ကြောဒဏ်ရာကိုကုသနေရပြီး ပီအက်စ်ဂျီက ဒူအေး နဲ့ ဒမ်ဘီလီဒဏ်ရာရရှိတာကြောင့် ပြင်သစ်ဘောလုံးအဖွဲ့ချုပ်ကို ဒေါသထွက်နေပါတယ်။
သတင်းတွေအရ ဒမ်ဘီလီဟာ ဒိုဟာမှာ ကုသမှုခံယူခဲ့ပြီးနောက် လာမယ့်အပတ်မှာ ပီအက်စ်ဂျီထံပြန်လာမယ်လို့ သိရပါတယ်။

ပြင်သစ်သားဟာ ဒဏ်ရာကြောင့် အသင်းဟောင်း ဘာစီလိုနာနဲ့ပွဲအပါအဝင် ပီအက်စ်ဂျီအသင်းရဲ့ပွဲစဉ် ၆ ပွဲကို လွဲချော်ထားခဲ့ပါတယ်။ ဒါပေမယ့်လည်း ပီအက်စ်ဂျီဟာ ဘာစီလိုနာကို ချန်ပီယံလိဂ်မှာအနိုင်ရခဲ့သလို လီဂူးဝမ်း ၇ ပွဲမှာလည်း ၅ ပွဲအနိုင်ရရှိကာ အဆင့် ၁ နေရာမှာ ရပ်တည်နေပါတယ်။