ပြင်သစ်လက်ရွေးစင်အသင်းနည်းပြသစ်အဖြစ် ချိတ်ဆက်ဖော်ပြခံရနေတဲ့ ရီးရဲလ်မက်ဒရစ်နည်းပြဟောင်း ဇီဒန်းရဲ့အရင်းနှီးဆုံးမိတ်ဆွေစာရင်းမှာ သူမပါဝင်ဘူးလို့ လက်ရှိပြင်သစ်အသင်းနည်းပြဒက်စ်ချမ့်စ်က ယူဆနေပါတယ်။

၂၀၁၂ ခုနှစ်၊ ပြင်သစ်အသင်းကို စတင်တာဝန်ယူချိန်ကတည်းက ဒက်စ်ချမ့်စ်က ၂၀၁၈ ကမ္ဘာ့ဖလားချန်ပီယံဆု ရရှိအောင် လမ်းပြပေးခဲ့သလို ယူရို-၂၀၁၆ နဲ့ ၂၀၂၂ ကမ္ဘာ့ဖလားပြိုင်ပွဲတွေမှာ ဖိုင်နယ်တက်ရောက်နိုင်အောင် ဦးဆောင်နိုင်ခဲ့ပါတယ်။ အခုလိုအောင်မြင်မှုတွေ ရရှိခဲ့ပေမယ့် ၂၀၂၆ ကမ္ဘာ့ဖလားပြိုင်ပွဲအပြီးမှာတော့ ရာထူးမှနုတ်ထွက်တော့မယ်လို့ ဒက်စ်ချမ့်က အတည်ပြုကြေညာထားပါတယ်။ ရာထူးထွက်ခွာမှုအတွက် အချိန်ဇယားအတိအကျရှိလာခဲ့မှုနဲ့အတူ ဒက်စ်ချမ့်စ်ရဲ့နေရာမှာ ဘယ်သူဆက်ခံမလဲဆိုတဲ့ ထင်ကြေးပေးမှုတွေလည်း မြင့်တက်လာခဲ့ပါတယ်။

ရီးရဲလ်မက်ဒရစ်နဲ့အတူ အံ့အားသင့်စရာအောင်မြင်မှုတွေ ရယူနိုင်ခဲ့ခြင်းကြောင့် ဇီဒန်းကိုလည်း ပြင်သစ်အသင်းရဲ့အနာဂတ်နည်းပြတစ်ဦးအဖြစ် ကာလရှည်ရှုမြင်ထားခဲ့ကြပါတယ်။ စပိန်ဘီလူးကြီးတွေကို ပထမအကြိမ်၊ နှစ်နှစ်ခွဲကြာတာဝန်ယူခဲ့စဉ်ကာလအတွင်း ချန်ပီယံလိဂ်ဆုဖလားသုံးကြိမ်ဆက်အောင်နိုင်မှုနဲ့ ဇီဒန်းက ဘောလုံးကမ္ဘာရဲ့အကောင်းဆုံးနည်းဗျူဟာရှင်တစ်ဦးအဖြစ် ဂုဏ်သတင်းတည်ဆောက်နိုင်ခဲ့ပါတယ်။ အခုအချိန်မှာတော့ ဒက်စ်ချမ့်စ်ရဲ့ထွက်ခွာမှု အတိအကျသိရှိလာနိုင်ခြင်းနဲ့အတူ ဇီဒန်းကို ပြင်သစ်လက်ရွေးစင်အသင်းနည်းပြသစ်ရာထူးအတွက် ရေပန်းအစားဆုံးပုဂ္ဂိုလ်အဖြစ် မြင်တွေ့လာရပါတယ်။

ဇီဒန်းနဲ့ ဒက်စ်ချမ့်စ်တို့က ဂျူဗင်တပ်စ်၊ ပြင်သစ်လက်ရွေးစင်အသင်းတို့မှာ အသင်းဖော်တွေအဖြစ် ဖြတ်သန်းခဲ့ကြပေမယ့် သူတို့နှစ်ဦးအကြား ပြိုင်ဆိုင်မှုတွေ ရှိခဲ့တယ်ဆိုတဲ့ကောလာဟလတွေလည်း ထွက်ပေါ်ခဲ့ဖူးပါတယ်။ ဒါပေမယ့် လတ်တလော Le Figaro နဲ့ပြုလုပ်တဲ့ အင်တာဗျူးအစီအစဉ်တစ်ခုမှာ ဒက်စ်ချမ့်စ်က သူတို့နှစ်ဦးအကြား ရင်းနှီးမှုသိပ်မရှိပေမယ့် ခါးသီးပြိုင်ဘက်တွေဆိုတဲ့ အယူအဆကို ပြတ်ပြတ်သားသားပယ်ချလိုက်ပြီး အပြန်အလှန်လေးစားမှုရှိကြတယ်လို့ အခိုင်အမာပြောကြားခဲ့ပါတယ်။

ပြင်သစ်လက်ရွေးစင်အသင်းနည်းပြက “ မှန်းဆလို့ရတဲ့ နောက်ထပ်အတွေးအခေါ်အကြံအစည်ကောင်းတစ်ရပ် ဖြစ်ပါတယ်။ ကျွန်တော်တို့နှစ်ဦးလုံးက နှစ်ကာလအတော်ကြာ အတူတူဖြတ်သန်းခဲ့ဖူးပါတယ်။ ကျွန်တော်တို့နှစ်ဦးအကြားမှာ အပြန်အလှန်လေးစားမှုတွေ ရှိနေကြဆဲပါပဲ။ စကားမစပ်….နောက်ဆုံးအကြိမ် ကျွန်တော်တို့နှစ်ဦးတွေ့ခဲ့ချိန် အချင်းချင်းစကားပြောဖြစ်သလို နှစ်ဦးလုံးရဲ့အောင်မြင်မှုတွေကို အပြန်အလှန်အသိအမှတ်ပြုခဲ့ကြပါတယ်။ ကျွန်တော်က သူ့ရဲ့အရင်းနှီးဆုံးမိတ်ဆွေတွေထဲမှာ မပါဝင်ပါဘူး။ ကျွန်တော်တို့နှစ်ဦးလုံးမှာ ကိုယ်ပိုင်ဘဝဖြတ်သန်းမှုလမ်းကြောင်းတွေ ရှိကြပေမယ့် ဘာတွေပဲဖြစ်ဖြစ်၊ အချင်းချင်းအကြားမှာ လေးစားမှုတော့ အမြဲတမ်းရှိနေပါလိမ့်မယ်”လို့ ပြောပါတယ်။

၂၀၂၆ ကမ္ဘာ့ဖလားပြိုင်ပွဲပြီးဆုံးသွားချိန်မှာ အားလုံးစောင့်မျှော်နေတဲ့ အသွင်ကူးပြောင်းမှုတစ်ခု ဖြစ်လာဖို့ရှိ၊မရှိ ဇီဒန်းနဲ့ ပြင်သစ်ဘောလုံးအဖွဲ့ချုပ်တို့ဆီ အများရဲ့စောင့်ကြည့်မှုတွေ ရောက်ရှိလာပါလိမ့်မယ်။ တကယ်လို့ ဇီဒန်းသာ ဒီတာဝန်ကို လက်ခံခဲ့မယ်ဆိုရင် သူ့ရဲ့ထူးခြားတဲ့အတွေးအခေါ်တွေ နိုင်ငံ့လက်ရွေးစင်အသင်းဆီ သယ်ဆောင်လာချိန် ဒက်စ်ချမ့်စ်ချမှတ်ခဲ့တဲ့ အမြင့်မားဆုံးစံနှုန်းတွေကိုလည်း ဆက်လက်ထိန်းသိမ်းသွားရမယ့် စိန်ခေါ်မှုတစ်ခုနဲ့ ရင်ဆိုင်သွားရပါလိမ့်မယ်။