အက်ဖ်အေ ဖလားကို အနိုင်ရတာဟာ မန်စီးတီးရဲ့ ညံ့ဖျင်းတဲ့ ရာသီကို ပြန်လည်ကောင်းမွန်စေမှာ မဟုတ်ဘူးလို့ အီလ်ကေး ဂန်ဒိုဂန်က ထင်နေပါတယ်။ မန်စီးတီးအသင်းဟာ ပြီးခဲ့တဲ့ပွဲစဉ်မှာ အက်စတွန်ဗီလာကို ၂-၁ နဲ့ အနိုင်ရရှိခဲ့တာကြောင့် ပရီးမီးယားလိဂ် အမှတ်ပေးဇယားမှာ အဆင့် ၃ မှာ ရပ်တည်နေပေမယ့် အမှတ်ပေးဇယားကိုဦးဆောင်နေတဲ့ လီဗာပူးထက် တစ်ပွဲပိုကစားထားပြီး ၁၈ မှတ်အထိ ကွာဟနေပါတယ်။

တနင်္ဂနွေနေ့မှာတော့ သူတို့ဟာ အက်ဖ်အေ ဖလား နောက်ဆုံးဗိုလ်လုပွဲကို သုံးကြိမ်ဆက်တိုက် တက်ရောက်နိုင်ဖို့ ဝင်ဘာလေမှာ နော်တင်ဟမ် ဖောရက်စ်နဲ့ ရင်ဆိုင်ရမှာ ဖြစ်ပါတယ်။ချန်ပီယံလိဂ်မှာလည်း နောက်ဆုံး ၃၂ သင်းအဆင့်မှာ ရီးရဲလ်မက်ဒရစ်ကို ရှုံးနိမ့်ခဲ့ရတာကြောင့် အက်ဖ်အေ ဖလားဟာ စံချိန်မမီတဲ့ ရာသီကို ပြည်တွင်းဆုဖလားတစ်ခုခုနဲ့ အဆုံးသတ်ဖို့ မန်စီးတီးရဲ့ နောက်ဆုံးမျှော်လင့်ချက် ဖြစ်ပါတယ်။ သို့သော်လည်း အဲဒီလိုဖြစ်လာရင်တောင် ဂန်ဒိုဂန်က ဒါကို အောင်မြင်မှု လို့ သတ်မှတ်မှာ မဟုတ်ပါဘူး။

"အတိတ်က ပြခဲ့တာတွေအရ ဒါဟာ ကျွန်တော်တို့ ကိုယ့်ကိုကိုယ် သတ်မှတ်ထားတဲ့ စံနှုန်းမဟုတ်ပါဘူး" လို့ ဂန်ဒိုဂန်က ESPN ကို ပြောကြားခဲ့ပါတယ်။ "တစ်ရာသီလုံးမှာ ကျွန်တော်တို့အသင်းက အရာရာဟာ လုံလောက်မှုမရှိဘူးဆိုတာ သိပါတယ်။ အဲဒါကို ပြောင်းလဲလို့မရပါဘူး ကျွန်တော်တို့ လက်ခံပြီး ကိုယ့်ကိုကိုယ် ရိုးသားရုံပါပဲ။ ကိုယ့်ကိုကိုယ် ဝန်ခံဖို့ အရေးကြီးပါတယ်"

"ကျွန်တော်တို့အတွက် ပန်းတိုင်နှစ်ခု ကျန်ပါသေးတယ်။ တစ်ခုက လာမယ့်နှစ်မှာ ချန်ပီယံလိဂ်ဝင်ခွင့်ရဖို့ သေချာပေါက်ပါပဲ ဒါဟာ အသင်းအတွက်ရော ကျွန်တော်တို့ ကစားသမားတွေအတွက်ပါ အလွန်အရေးကြီးပါတယ်" "နောက်တစ်ခုက အက်ဖ်အေ ဖလား ဗိုလ်လုပွဲကို တက်ရောက်ဖို့ ကြိုးစားဖို့ပါ။ကျွန်တော်တို့အတွက် ဝင်ဘာလေကို ပြန်သွားမှာဖြစ်ပြီး အဲဒါက အမြဲတမ်း အထူးခြားဆုံးပါပဲ"

"ခက်ခဲမယ်ဆိုတာ သိပေမယ့် ကလပ်ကမ္ဘာ့ဖလားနဲ့အတူ ဒီရာသီမှာ ဆုဖလားရဖို့ တစ်ခုတည်းသော အခွင့်အရေး ဖြစ်လာမှာပါ။ ကျွန်တော်တို့ အဲဒါအတွက် ကြိုးစားသွားပါမယ်" လို့ သူက ပြောပါတယ်။ ဖောရက်စ်က မတ်လမှာ အိမ်ကွင်းတွင်  မန်စီးတီးကို ၁-၀ ဂိုးနဲ့ အနိုင်ရခဲ့တာကြောင့် ဂန်ဒိုဂန်ဟာ တနင်္ဂနွေနေ့မှာ အဲဒါမျိုး ထပ်ဖြစ်တာကို ခွင့်မပြုနိုင်ဘူးဆိုတာ သိပါတယ်။ "ပရီးမီးယားလိဂ်ရဲ့ စံနှုန်းက အရမ်းမြင့်ပါတယ်"

"အသင်းအားလုံးကို ကြည့်ရင် ကမ္ဘာပေါ်မှာ ဒီလို စံနှုန်းရှိတဲ့ လိဂ်မရှိပါဘူး။ ပွဲတိုင်းက အရမ်းခက်ခဲပါတယ်။ အက်ဖ်အေ ဖလားက အဲဒါကို ထင်ဟပ်နေပြီး ဒါကြောင့် ဒီအသင်းတွေ အဲဒီမှာ ရောက်နေတာပါ။ အသင်းတိုင်းနဲ့ ကစားရတာ အရမ်းခက်ခဲပါတယ်" "သူတို့ကွင်းမှာ ကျွန်တော်တို့ ရှုံးခဲ့တဲ့အချိန်မှာ ကျွန်တော်တို့ရဲ့ ကစားပုံအဆင့် မမီခဲ့ဘူး၊ အဲဒါကို ကျွန်တော် ဆိုလိုတာပါ။ ပရီးမီးယားလိဂ်မှာ အပြစ်ပေးခံရပါတယ်။ အရင်က ကျွန်တော်တို့ ၇၀၊ ၈၀ ဒါမှမဟုတ် ၉၀ ရာခိုင်နှုန်းနဲ့ ကစားပြီး ပွဲတွေ အနိုင်ရနိုင်ပေမယ့် အခုတော့ အရမ်းတောင်းဆိုမှုများပါတယ်။ သူတို့လုပ်တဲ့အရာတွေကို သူတို့ တကယ် ကောင်းကောင်းလုပ်ပါတယ်"

"သူတို့က လာမယ့်ရာသီ ချန်ပီယံလိဂ်ဝင်ခွင့်ရနိုင်ပြီး အရည်အသွေးကောင်းတွေ အများကြီးရှိပါတယ်။ သူတို့ကို ကျွန်တော်တို့ ရှုံးခဲ့တဲ့အချိန်မှာ ကျွန်တော်တို့ဘက်က လုံလောက်မှုမရှိဘူးဆိုတာ ကျွန်တော်တို့ သိပါတယ်။ ဗိုလ်လုပွဲကို တက်ရောက်ချင်ရင် ကျွန်တော်တို့ ပိုကောင်းအောင် လုပ်ရပါမယ်" လို့ ဂန်ဒိုဂန်က ပြောပါတယ်။