လာမယ့်ရာသီ၊ ချန်ပီယံလိဂ်ပြိုင်ပွဲဝင်ခွင့်တစ်နေရာအတွက် တိုက်ပွဲဝင်နေရမှုအပေါ် မသိမ်ငယ်မိသလို မန်စီးတီးအတွက် ခက်ခဲတဲ့ဘောလုံးရာသီတစ်ခုမှာ ချန်ပီယံလိဂ်ဝင်ခွင့်ရရှိမှုက ကြီးမားတဲ့အောင်မြင်မှုတစ်ခု ဖြစ်လာလိမ့်မယ်လို့ ပက်ဂွါဒီယိုလာက ပြောပါတယ်။
ပရီးမီးယားလိဂ်နောက်ဆုံးလေးကြိမ်ဆက်ချန်ပီယံ၊ ပက်ဂွါဒီယိုလာရဲ့အသင်းက အခုဘောလုံးရာသီ၊ လိဂ် ၁၀ ပွဲသာကစားရဖို့ကျန်ရှိချိန် အမှတ်ပေးဇယားပဉ္စမနေရာမှာ ရပ်တည်နေပါတယ်။

အခုဘောလုံးရာသီ၊ ဥရောပပြိုင်ပွဲတွေမှာ အင်္ဂလန်အခြေစိုက်ကလပ်အသင်းတွေ စွမ်းဆောင်ရည်ကောင်း ပြသနိုင်ခဲ့လို့ လာမယ့်ရာသီ၊ ချန်ပီယံလိဂ်ပြိုင်ပွဲကို ပရီးယားလိဂ်ကလပ်အသင်းငါးခုယှဉ်ပြိုင်ခွင့်ရရှိရန် အလားအလာကောင်းနေပါတယ်။ ဒါပေမယ့် ဒီကိစ္စက အမှတ်ပေးဇယားအဆင့်-၁၀ နေရာမှာရှိနေတဲ့ ဖူလ်ဟမ်နဲ့ အမှတ်ကွာဟမှုကျဉ်းမြောင်းနေတဲ့ မန်စီးတီးအတွက် အာမခံချက်ရရှိနိုင်ရေး ဝေးကွာနေပါတယ်။

မန်စီးတီးက နောက်ဆုံးကစားခဲ့တဲ့ ပရီးမီးယားလိဂ် ၁၉ ပွဲမှာ ကိုးပွဲအထိ ရှုံးနိမ့်ထားပြီး ပုံမှန်စွမ်းဆောင်ရည်ကောင်းတွေ ပြသနိုင်ဖို့ ရုန်းကန်နေရပါတယ်။ အီတီဟတ်ကွင်းမှာ ဘရိုက်တန်ကို ဧည့်ခံကစားရမယ့်ပွဲစဉ်မတိုင်ခင် ပက်ဂွါဒီယိုလာက “ဒါက တကယ့်တိုက်ပွဲကြီးတစ်ခုဖြစ်ပြီး ဒီနေရာမှာရှိနေရလို့ စိတ်မပျက်မိပါဘူး။ ကျွန်တော့်အမြင်အရ ဒီတိုက်ပွဲကို အောင်နိုင်ပြီး ချန်ပီယံလိဂ်ဝင်ခွင့်ကို ရရှိအောင် စွမ်းဆောင်နိုင်မယ်ဆိုရင် ကြီးမားတဲ့အောင်မြင်မှုတစ်ခု ဖြစ်လာပါလိမ့်မယ်။ ဒါကြောင့် စိန်ခေါ်မှုတစ်ခုလည်း ဖြစ်ပါတယ်။

တခါတလေ ဘောလုံးနဲ့ဘဝမှာ ဘယ်နေရာပဲဖြစ်ဖြစ်၊ ဖြစ်အောင်နေထိုင်ရတဲ့ အခိုက်အတန့်တွေ ရှိပါတယ်။ ဒီလိုအောင်မြင်မှုရရှိဖို့ဆိုတာ ကျွန်တော်တို့အပေါ်မှာပဲ မူတည်ပါတယ်။ ချန်ပီယံလိဂ်ဝင်ခွင့်ရရှိဖို့အတွက် အမှတ်တွေ အများကြီးစုဆောင်းဖို့မလိုအပ်သလို ပြိုင်ဘက်ခြေချော်မှုကိုလည်း စောင့်ဆိုင်းနေစရာ မလိုပါဘူး။ ဒါက ကျွန်တော်တို့နဲ့သာ သက်ဆိုင်ပြီး ချန်ပီယံလိဂ်ဝင်ခွင့်အတွက် ကျွန်တော်တို့ရဲ့အပြုအမူနဲ့ ကစားပုံပေါ်မှာပဲ အဓိကမူတည်နေပါတယ်”လို့ ပြောပါတယ်။ အခုသီတင်းပတ်အတွင်းမှာ ၂၀၁၂-၂၀၁၃ ဘောလုံးရာသီနောက်ပိုင်း၊ ပထမဆုံးအကြိမ်အဖြစ် မန်စီးတီးအသင်းမပါဝင်တဲ့ ချန်ပီယံလိဂ်နောက်ဆုံး ၁၆ သင်းရှုံးထွက်အဆင့်ပွဲစဉ်တွေကို မြင်တွေ့ခဲ့ရပါတယ်။

၂၀၂၃ ချန်ပီယံတွေက ရှုံးထွက်ပလေးအော့ဖ်မှာ ရီးရဲလ်မက်ဒရစ်ကို ရှုံးနိမ့်ပြီး ပြိုင်ပွဲမှထွက်ခွာခဲ့ရပါတယ်။ ပက်ဂွါဒီယိုလာက “ ကျွန်တော့်အတွက် စိတ်ပျက်စရာ၊ နောင်တရစရာ ဘာမှမရှိပါဘူး။ ကျွန်တော်တို့က အဲ့ဒီပြိုင်ပွဲထဲမှာ ရှိနေဖို့အတွက် မထိုက်တန်လို့ပဲ ဖြစ်ပါတယ်။
ဒီပြိုင်ပွဲကြီးက ဘယ်လောက်အထိ ထူးခြားခမ်းနားသလဲဆိုတာ ကျွန်တော့်ဆီ လာရှင်းပြနေဖို့ မလိုပါဘူး။ ဒါပေမယ့် အခုဘောလုံးရာသီမှာတော့ ကျွန်တော်တို့က ဆိုဖာပေါ်ထိုင်ပြီး ဝိုင်တစ်ခွက်နဲ့အတူ အားပေးနေတဲ့အဆင့်နဲ့ပဲ ထိုက်တန်ပါတယ်။

လာမယ့်ရာသီ၊ ချန်ပီယံလိဂ်ဝင်ခွင့်ရရှိရေး အကောင်းဆုံးလုပ်နိုင်ဖို့ပဲ မျှော်လင့်မိပါတယ်။ ကွင်းတွင်းမှာရှိနေချိန် ပိုကောင်းအောင် လုပ်နိုင်ဖို့လည်း မျှော်လင့်မိပါတယ်”လို့ ပြောပါတယ်။
ဘရိုက်တန်က မန်စီးတီးရဲ့လာမယ့်ရာသီချန်ပီယံလိဂ်ဝင်ခွင့်မျှော်လင့်ချက်ကို ခြိမ်းခြောက်နိုင်တဲ့ ပြိုင်ဘက်တွေထဲမှာ ပါဝင်ပါတယ်။ သူတို့တွေက ၁၉၈၁ ခုနှစ်နောက်ပိုင်း ပထမဆုံးအကြိမ်အဖြစ် အင်္ဂလန်ထိပ်တန်းလိဂ်နောက်ဆုံးလေးပွဲဆက် အနိုင်ရရှိအောင် စွမ်းဆောင်ရင်း မန်စီးတီးနဲ့တစ်မှတ်အကွာ၊ အမှတ်ပေးဇယားသတ္တမနေရာမှာ ရပ်တည်နေပါတယ်။

ပက်ဂွါဒီယိုလာက “ ကွင်းတွင်းကွင်းပြင် အကောင်းဆုံးလုပ်ဆောင်ပြနေတဲ့ကလပ်အသင်းတွေထဲမှာ ဘရိုက်တန်လည်း ပါဝင်တယ်လို့ ထင်ပါတယ်။ အမှတ်ပေးဇယားအလယ်(သို့မဟုတ်)အောက်နားမှာ ရပ်တည်နေတဲ့ ကလပ်အသင်းတွေ အများကြီးရှိပါတယ်။ ဒါပေမယ့် ဘရိုက်တန်ကတော့ နှစ်ပေါင်းများစွာကြာ စုဖွဲ့မှုပိုင်း၊ တည်ငြိမ်မှုပိုင်းနဲ့ပတ်သက်လို့ မယုံကြည်နိုင်လောက်စရာကောင်းတဲ့ ခြေလှမ်းတစ်ခု လျှောက်လှမ်းလာနိုင်ခဲ့ပါတယ်။
သူတို့လုပ်ဆောင်နေတဲ့အရာတွေက လျှို့ဝှက်ချက်တစ်ခု မဟုတ်ပါဘူး။ အကောင်းဆုံးအရာတွေကို လုပ်ဆောင်နေလို့ သူတို့တွေ အမှတ်ပေးဇယားရဲ့ဒီနေရာမှာ ထိုက်ထိုက်တန်တန်ရပ်တည်နေတာပါ”လို့ ပြောပါတယ်။