လိုက်ပ်ဇစ်နှင့် ဟက်ဒါဖီးလ်တို့တွင် အငှားသွားရောက်ကစားခဲ့ပြီးနောက် စမစ်ရိုဟာ အာဆင်နယ်သို့ ပြန်လည် ရောက်ရှိခဲ့သော်လည်း ပြီးခဲ့တဲ့ ၂ ရာသီမှာ ပုံမှန်ပွဲထွက်ခွင့် ရရှိဖို့အတွက် ရုန်းကန်ခဲ့ရတာဖြစ်ပါတယ်။ ဒူးနှင့် ခြေကျင်းဝတ်တို့မှာ ဒဏ်ရာရရှိခဲ့တာကြောင့် ပြီးခဲ့တဲ့ရာသီပရီးမီးယားလိဂ်တွင် ၃ ပွဲသာ ပွဲထွက်ကစားခဲ့ရပြီး အရန်ခုံကနေ လူစားဝင်ကစားသမားအဖြစ် ၁၀ ပွဲသာ ကစားခဲ့ရပါတယ်။

အာဆင်နယ်ဟာ ဒီနွေရာသီမှာ အသင်းရှိပိုလျှံနေတဲ့ ကစားသမားတွေကို ရောင်းချဖို့ နားစွင့်နေတာဖြစ်ပြီး အဲ့ဒီထဲမှာ စမစ်ရိုဝီလည်း ပါဝင်နေပါတယ်။ Daily Telegraph ရဲ့ ဖော်ပြချက်အရ အသင်းရဲ့တိုက်စစ်အင်အားကို ဖြည့်တင်းလိုနေတဲ့ မာကိုဆေးလ်ဗားရဲ့ ဖူလ်ဟမ်ဟာ အင်္ဂလန်နိုင်ငံသားကို အရခေါ်ယူလိုနေပါတယ်။

စမစ်ရိုဟာ အက်စတွန်ဗီလာရဲ့ပစ်မှတ်ဖြစ်ခဲ့ဖူးသလို ပြီးခဲ့တဲ့နွေရာသီတုန်းက ချဲလ်ဆီးအသင်းဟာ အသက် ၂၃ နှစ်အရွယ် ကစားသမားကို ကမ်းလှမ်းခဲ့သော်လည်း ကိုးလ်ပါလ်မားကိုသာ ခေါ်ယူခဲ့တာဖြစ်ပါတယ်။ "သူ့ကို ကျွန်တော် အရမ်းသဘောကျပါတယ်။ လေ့ကျင့်ရေးမှာလည်း အရမ်းထူးချွန်ပြီး ပွဲစဉ်တွေမှာ ကစားဖို့ အသင်းနဲ့သင့်လျော်တယ်လို့ထင်ပါတယ်" "ကစားသမားတစ်ဦးအနေနဲ့ သူ့ကို ကျွန်တော် သဘောကျပါတယ်။ သူ့ရဲ့လှုပ်ရှားပုံတွေကို ကြည့်ရတာ သဘောကျပါတယ်။ သူ့ကိုရပ်တန့် တားဆီးဖို့ဆိုတာက ခက်ခဲပြီး အသင်းအနိုင်ရရှိဖို့အတွက် သူက အများကြီး အကူအညီပေးပါတယ်" လို့ နည်းပြက စမစ်ရိုဝီနဲ့ပတ်သက်ပြီး ပြောကြားလိုက်ပါတယ်။

ရမ်စ်ဒေးလ်၊ တီယာနေး၊ အန်ကီတီယာတို့ကလည်း ဒီနွေရာသီမှာ အသင်းကနေ ထွက်ခွာဖွယ်ရှိနေတာဖြစ်ပြီး ဆုဖလားကို အမှတ်ကျဉ်းမြောင်းစွာဖြင့်လက်လွှတ်ခဲ့ရပြီးနောက် အာတီတာက အသင်းကို ပြန်လည်တည်ဆောက်လိုနေတာဖြစ်ပါတယ်။

ပြီးခဲ့တဲ့ရာသီမှာ ရမ်စ်ဒေးလ်ဟာ ပွဲထွက်ခွင့်ကို ဒေးဗစ်ရာယာထံ ဆုံးရှုံးခဲ့ရတာဖြစ်ပြီး အင်္ဂလန်လက်ရွေးစင်ဂိုးသမားကို နယူးကာဆယ်က ခေါ်ယူဖို့ စိတ်ဝင်စားနေပါတယ်။ ဒါပေမဲ့ အာဆင်နယ်က တောင်းဆိုထားတဲ့ ပေါင်သန်း ၃၀ ကိုတော့ နယူးကာဆယ်က မပေးလိုနေတာပါ။

လာမယ့်လအတွင်း အာဆင်နယ်ဟာ အနည်းဆုံး ကစားသမား ၃ ဦးအထိ ခေါ်ယူဖို့ မျှော်လင့်နေပြီး အဲ့ဒီထဲမှာတော့ ဆက်စ်ကိုဟာ အသင်းရဲ့ဦးစားပေး ပစ်မှတ်ဖြစ်ပါတယ်။