ဒဏ်ရာမှပြန်သက်သာလာပြီးနောက် ဘာစီလိုနာအတွက် ရာဖင်ဟာပြန်လည်ကစားပေးလာနိုင်ခြင်းကို ဟန်စီဖလစ်ခ် ဝမ်းမြောက်ဝမ်းသာဖြစ်နေပါတယ်။ ပြီးခဲ့တဲ့ဘောလုံးရာသီ၊ ဘာစီလိုနာအတွက် အထူးခြေစွမ်းပြခဲ့တဲ့ ရာဖင်ဟာက ဒဏ်ရာပြဿနာအနည်းငယ်ကြောင့် အခုနှစ်ဘောလုံးရာသီ၊ ကာလအများစုကို လွဲချော်ခဲ့ရပါတယ်။ ဒါပေမဲ့ ယမန်နေ့(စနေနေ့)ပွဲစဉ်မှာတော့ ဘရာဇီးတိုက်စစ်မှူးက အံ့မခန်းပုံစံဖြင့် ပြန်လည်ပါဝင်လာခဲ့ပါတယ်။ သူက ဒါနီအိုလ်မိုရဲပထမဂိုးကို ဖန်တီးပေးခဲ့ပြီး အလာဗက်စ်ကို ဘာစီလိုနာတို့ ၃-၁ ဂိုးဖြင့် အနိုင်ရရှိအောင် အကောင်းဆုံးကူညီပေးခဲ့ပါတယ်။

အခုနိုင်ပွဲကြောင့် ဘာစီလိုနာက တစ်ပွဲကစားဖို့ကျန်ရှိနေသေးတဲ့ ရီးရဲလ်မက်ဒရစ်ထက် နှစ်မှတ်အသာရကာ လာလီဂါအမှတ်ပေးဇယားထိပ်ဆုံးနေရာဆီ တက်လှမ်းလာခဲ့ပါတယ်။ ဒါ့အပြင် ဟန်စီဖလစ်ခ်ကိုယ်တိုင်လည်း သူအားကိုးရတဲ့ အဓိကတိုက်စစ်လက်နက်တစ်ခု ပြန်လည်ရရှိလာလို့ ဝမ်းမြောက်ဝမ်းသာဖြစ်နေခဲ့ပါတယ်။

ဟန်စီဖလစ်ခ်က “ ရာဖင်ဟာဆိုတာ ကျွန်တော်တို့အသင်းရဲ့ကစားဟန်မှာ တက်ကြွမှုအပေးနိုင်ဆုံး ကစားသမားတစ်ဦး ဖြစ်ပါတယ်။ ကျွန်တော်တို့ သူ့ကို လက်လွှတ်ဆုံးရှုံးခဲ့ရပါတယ်။ သူက အသင်းအတွက် စိတ်ခွန်အားတွေ အများကြီးယူဆောင်ပေးလာလို့ ကျွန်တော့်အတွက် ရာဖင်ဟာက အရေးကြီးပါတယ်။ သူကိုယ်တိုင် ပြိုင်ဘက်ကိုဖိအားပေးဖို့ စတင်လိုက်ပြီဆိုရင် အားလုံးက အသင်းကစားကွက်မှာ ပါဝင်ဖို့အတွက် အဆင်သင့်ဖြစ်နေပါပြီ။ သူ ပြန်လာနိုင်ဖို့ဆိုတာ အရမ်းအရေးကြီးသလို လာမယ့်ပွဲစဉ်တွေမှာလည်း သူက အလွန်အရေးပါလာလိမ့်မယ်ဆိုတာ သေချာပါတယ်။ အခုအချိန်မှာတော့ ဒီသုံးမှတ်အတွက် ကျွန်တော် ပျော်ရွှင်မိပါတယ်”လို့ ပြောပါတယ်။

ဒါပေမဲ့ ပွဲအစပိုင်းမှာ အလာဗက်စ်အတွက် ပါဘလိုအိုင်ဘန်နက်ဇ်ရဲ့ဦးဆောင်ဂိုးသွင်းယူမှုနဲ့အတူ ဘာစီလိုနာရဲ့ကစားဟန်အပေါ် ဟန်စီဖလစ်ခ်ကိုယ်တိုင်လည်း အပြည့်အဝအားရကျေနပ်နေခြင်း မရှိခဲ့ပါဘူး။

ဘာစီလိုနာအသင်းနည်းပြက “ သုံးမှတ်အပြည့်ရရှိခဲ့လို့ ကျွန်တော် ပျော်ရွှင်မိပါတယ်။ ဒါပေမဲ့ ကျွန်တော်တို့မှာ တိုးတက်လာရမယ့်အရာတွေ အများကြီးရှိနေပါသေးတယ်။ အခွင့်အရေးတွေ အများကြီးရရှိခဲ့ပေမယ့် အကောင်းဆုံးအဆုံးမသတ်နိုင်ခဲ့ပါဘူး။ ဒီအပိုင်းကပဲ ကျွန်တော်တို့တွေ တိုးတက်လာအောင် အများကြီးလုပ်သွားရမယ့်အရာ ဖြစ်ပါတယ်”လို့ ဆက်ပြောပါတယ်။ ဘာစီလိုနာက လာမယ့်ကြားရက်မှာ အက်သလက်တီကိုမက်ဒရစ်နဲ့ ပွဲကြီးပွဲကောင်းကို ဆင်နွှဲသွားရပါမယ်။