ပါချိုအပေါ် အပြည့်အဝ ယုံကြည်ထားတဲ့ အင်းနရစ်
ပီအက်စ်ဂျီအသင်း စထရာဘိုးနဲ့ သရေကျခဲ့တဲ့ပွဲအပြီး သတင်းစာရှင်းလင်းပွဲမှာ အသက် ၂၄ နှစ်အရွယ် ဝီလီယံ ပါချိုဟာ လူးဝစ် အန်းနရစ် အတွက် ဆွေးနွေးစရာ ခေါင်းစဉ်တစ်ခု ဖြစ်ခဲ့ပါတယ်။ စပိန်လက်ရွေးစင်အသင်း နည်းပြဟောင်းဟာ သူ့အသင်း အဝေးကွင်းမှာ အမှတ်ဆုံးရှုံးပြီး စိတ်ပျက်ဖွယ်ရာ ရလဒ်ထွက်ပေါ်ခဲ့ပေမယ့် အီကွေဒေါ လက်ရွေးစင် နောက်ခံလူကို ချီးကျူးစကားတွေ အပြည့်အဝ ဆိုခဲ့ပါတယ်။
အိုင်းထရက် ဖရန့်ဘတ် နောက်ခံလူဟောင်းဟာ ၂၀၂၄ ခုနှစ် နွေရာသီမှာ ပီအက်စ်ဂျီသို့ ရောက်လာကတည်းက ခြေစွမ်းထက်မြက် နေခဲ့တာပါ။ ပီအက်စ်ဂျီဟာ အသက် ၂၄ နှစ်အရွယ် ကစားသမားကို အံ့အားသင့်ဖွယ်ရာ ပြောင်းရွှေ့ကြေး ယူရို သန်း ၄၀ နဲ့ ခေါ်ယူခဲ့တာဖြစ်ပါတယ်။ သူ လီဂူးဝမ်း ချန်ပီယံအသင်းကို ရောက်လာတုန်းက လူသိနည်းသေးတဲ့ ကစားသမားတစ်ယောက် ဖြစ်ခဲ့ပေမယ့် ပြင်သစ်မြို့တော်ကလပ်က ဒီဗဟိုနောက်ခံလူအတွက် ဘာကြောင့် ဒီလောက်များတဲ့ ပြောင်းရွှေ့ကြေးကို ပေးချေခဲ့သလဲဆိုတာကို အခုအခါမှာ သက်သေပြနိုင်ခဲ့ပါပြီ။
ပါချိုဟာ ပီအက်စ်ဂျီသို့ ရောက်ရှိလာပြီးနောက်ပိုင်း ၆၅ ပွဲအထိ ကစားထားပြီး ဖြစ်ပါတယ်။ သူ့ရဲ့ ဗဟိုနောက်ခံလူအကြောင်း ပြောရာမှာ လူးဝစ် အန်းနရစ်က "သူရှိနေရင် ပွဲက အဆင်ပြေသွားမယ်ဆိုတာ သိနေရတယ်၊ သံသယတွေ နည်းသွားတယ်၊ သူက တခြားကစားသမားတွေကိုပါ ပိုကောင်းအောင် မြှင့်တင်ပေးနိုင်တယ်" လို့ ပြောကြားခဲ့ပါတယ်။
နောက်ခံလူအပေါ် ချီးကျူးခဲ့ပေမယ့် ပီအက်စ်ဂျီ နည်းပြကတော့ သူ့ကို ကမ္ဘာ့အကောင်းဆုံး နောက်ခံလူအဖြစ် သတ်မှတ် ကြေညာဖို့ကိုတော့ ငြင်းဆန်ခဲ့ပါတယ်။
