ဘရိုက်တန်ကိုအနိုင်ရပြီးနောက် ဗီလာနည်းပြ အမ်မရီက ရက်ရှ်ဖို့ဒ်ကို တိုက်စစ်မှာ ဝက်တ်ကင်းနဲ့အတူထားဖို့ စီစဉ်ထားတယ်လို့ ပြောကြားလိုက်ပါတယ်။ ရက်ရှ်ဖို့ဒ်ဟာ ပြီးခဲ့တဲ့အပတ်တုန်းက ပရက်စ်တန်ကိုအနိုင်ရခဲ့တဲ့ အက်ဖ်အေဖလားပွဲမှာ ၂ ဂိုးသွင်းယူနိုင်ခဲ့သလို အခုလည်း ဘရိုက်တန်ကို ၃ ဂိုးပြတ်အနိုင်ရခဲ့တဲ့ပွဲမှာ ၁ ဂိုးထပ်သွင်းနိုင်ခဲ့ပါတယ်။

ယူနိုက်တက်ကနေ အငှားလာကစားနေတဲ့ အင်္ဂလန်သားဟာ ဗီလာအသင်းကိုပြောင်းလာပြီးကတည်းက ၃ ဂိုးသွင်း ၊ ၄ ဂိုးဖန်တီးထားနိုင်ခဲ့ပါတယ်။ ဝက်တ်ကင်းက  ဘရိုက်တန်နဲ့ပွဲမှာ တိုက်စစ်ကို ရက်ရှ်ဖို့ဒ်နဲ့အတူ တွဲဖက်ဦးဆောင်လာခဲ့ပြီး အမ်မရီက နောက်ပွဲတွေမှာလည်း အခုလိုမျိုးထပ်မံမြင်တွေ့ချင်နေပါတယ်။

“သူ့အတွက် ဆက်သွားပါဆိုတဲ့ မက်ဆေ့ချ်ပေးချင်ပါတယ်။ မိနစ်ပိုကစားခွင့်ရလာတာက သူ့ရဲ့ရုပ်ပိုင်းဆိုင်ရာအတွက် ပိုကောင်းလာတာကို ဆိုလိုတာပါ။ သူဂိုးပိုသွင်းလာနိုင်ပါတယ်။ ကျွန်တော်တို့ သူ့ကိုတိုက်စစ်မှူးအဖြစ် ထားကစားနေတာပါ။ ပြီးတော့ ဝက်တ်ကင်းနဲ့အားပြိုင်ဖို့ ကြိုးစားနေတာပါ။ သူတို့ ၂ ယောက်အတူတူကစားနိုင်ပါတယ်။

သူ့မှာ အရည်အချင်းကောင်းတွေရှိနေပါတယ်။ လက်ရှိအချိန်မှာ သူက အကောင်းဆုံးယုံကြည်မှုရနေပါတယ်။ တနင်္ဂနွေနေ့မှာ သူ့ကို တိုက်စစ်မှူးအဖြစ်ထားဖို့ စီစဉ်ခဲ့ပါတယ်။ ပြီးတော့ သူ ၂ ဂိုးသွင်းနိုင်ခဲ့ပြီး နောက်တစ်ကြိမ် အဲ့လိုထားကစားဖို့ ဆုံးဖြတ်ခဲ့တော့လည်း ဂိုးထပ်သွင်းနိုင်ခဲ့ပါတယ်။ ဗီလာမှာ သူထိပ်တန်းအဆင့်ရောက်လာမလားဆိုတာတော့ စိန်ခေါ်မှုပါ။ ကျွန်တော်တို့အသင်းအတွင်းမှာလည်း စိန်ခေါ်မှုရှိခဲ့ပါတယ်။ အခုအနေအထားအရ သူက ပိုပိုကောင်းလာနေပါတယ်။

ကျွန်တော်တို့ကစားဟန် နဲ့ တောင်းဆိုမှုတွေကိုလည်း နားလည်လာပါတယ်။ ပြိုင်ပွဲတစ်ခုချင်းစီမှာ ပြိုင်ဘက်ကိုရင်ဆိုင်ရတာ ဘယ်လောက်ခက်ခဲလဲဆိုတာ သူသိပါတယ်။ သူ့အရည်အချင်း နဲ့ စွမ်းရည်က အသင်းအတွက် အရမ်းအရေးပါပါတယ်။ ဂိုးတွေအပြင် ဂိုးဖန်တီးမှုတွေပါ လိုအပ်သလို အခြားကစားသမားတွေနဲ့ ပေါင်းစပ်နိုင်မှုလည်း လိုအပ်ပါတယ်။ သူတို့ကြားမှာ နားလည်မှုပိုကောင်းလာဖို့က သူ့ကိုထားကစားတဲ့နေရာက အရေးပါပါတယ်”လို့ အမ်မရီက ဖြေကြားခဲ့ပါတယ်။