ဒေါ့မွန်အသင်းရဲ့ အားကစားဒါရိုက်တာ ဆီဘက်ရှန်က မန်ချက်စတာယူနိုက်တက်ကနေ အငှားစာချုပ်နဲ့ခေါ်ယူထားခဲ့တဲ့ တောင်ပံကစားသမား ဂျေဒန်ဆန်ချိုကို အသင်းမှာ ဆက်လက်ထိန်းသိမ်းထားနိုင်ဖို့ မလွယ်ကူဘူးလို့ ဝန်ခံပြောကြားလာခဲ့ပါတယ်။ 

ဆန်ချိုဟာ ပြီးခဲ့တဲ့စက်တင်ဘာလမှာ အဲရစ်တန်ဟက်ရဲ့ယူနိုက်တက်စီနီယာအသင်းကနေ ထုတ်ပယ်ခံခဲ့ရတာကြောင့် ဇန်နဝါရီလမှာတော့ အသင်းဟောင်းဒေါ့မွန်ထံသို့ အငှားနဲ့ ပြန်လည်ပြောင်းရွှေ့လာခဲ့တာဖြစ်ပါတယ်။ 

ဒေါ့မွန်နဲ့ပြန်လည်ချိတ်ဆက်ပြီးနောက်မှာတော့ အင်္ဂလန်သားဟာ ပုံမှန်ခြေစွမ်းပြန်လည်ရရှိလာခဲ့ပြီး ချန်ပီယံလိဂ်ဗိုလ်လုပွဲအထိ တက်ရောက်နိုင်ခဲ့တာကြောင့် အသင်းဟောင်းဘက်က ကစားသမားကို ဆက်လက်သက်တမ်းတိုးနိုင်ဖို့ စိတ်အားထက်သန်နေတာဖြစ်ပါတယ်။ သို့သော်လည်း ၂၀၂၁ ခုနှစ်မှာ ဆန်ချိုကို ဒေါ့မွန်ကနေ ပေါင် ၇၃ သန်းနဲ့ခေါ်ယူထားခဲ့တဲ့ ယူနိုက်တက်အနေနဲ့ ကစားသမားရဲ့အနာဂတ်နဲ့ပတ်သက်ပြီး ဆုံးဖြတ်ချက်ချနိုင်တဲ့ အနေအထားကို ပိုင်ဆိုင်ထားတာဖြစ်ပါတယ်။ 

ရီးရဲလ်မက်ဒရစ်ကိုရှုံးနိမ့်ခဲ့တဲ့ ချန်ပီယံလိဂ်ပွဲစဉ်မတိုင်ခင် ဆန်ချိုရဲ့အနာဂတ်နဲ့ပတ်သက်ပြီး မေးမြန်းမှုပြုလုပ်ခဲ့ရာ ဆီဘက်ရှန်က “ရိုးရိုးသားသားပြောရမယ်ဆိုရင် ကျွန်တော်လည်း အခုထိမသိသေးပါဘူး။ သူ့ကို လွန်ခဲ့တဲ့ ၆ လလောက်က ပြန်ရလိုက်တာ အရမ်းကောင်းပါတယ်။ သူက ကျွန်တော်တို့အသင်းရဲ့ အရည်အသွေးကို တိုးတက်စေပြီး အခုလို ဗိုလ်လုပွဲကိုတက်လာနိုင်တာလည်း သူ့ရဲ့စွမ်းဆောင်ရည်တွေကြောင့် ပါပါတယ်”

“နောက်ပိုင်းမှာတော့ ရှင်းရှင်းလင်းလင်း ဆုံးဖြတ်ချက်ချသွားမှာပါ။ သူက ယူနိုက်တက်နဲ့ စာချုပ်သက်တမ်းကျန်ရှိနေပါသေးတယ်။ ကျွန်တော်တို့မှာ အပြီးသတ်ဝယ်ယူခွင့်လည်းမပါတာကြောင့် သူ့ကိုဆက်ထိန်းထားဖို့ဆိုရင်တော့ ညှိနှိုင်းမှုတွေပြုလုပ်ရပါဦးမယ်။ အလုပ်ဖြစ်မလား မဖြစ်မလားတော့ မသိသေးပါဘူး။ ဒါပေမယ့် ဒီညမှာ သူ ၁ ဂိုး ၂ ဂိုးလောက်သွင်းနိုင်မယ်ဆိုရင်တော့ ပိုပြီး တန်ကြေးမြင့်လာမှာပါ” လို့ပြောကြားခဲ့ပါတယ်။

တစ်ချိန်တည်းမှာပဲ ယူနိုက်တက်နောက်ခံလူဟောင်း ရီယိုဖာဒီနန်က ဆန်ချိုဟာ အိုးလ်ထရက်ဖို့ဒ်မှာ မျက်နှာမရခဲ့ပေမယ့် သူ့ရဲ့ မှန်ကန်တဲ့စရိုက်ကို ဒေါ့မွန်မှာ ပြသနိုင်ခဲ့တယ်လို့ ထောက်ခံပြောကြားလာခဲ့ပါတယ်။ ဖာဒီနန်က “သူ့အကြောင်း ကျွန်တော်တို့အများကြီးပြောခဲ့ပြီးပါပြီ။ တော်တော်များများကအပျက်သဘောဆောင်ပေမယ့် ကျွန်တော်ကတော့ သူ့အနေနဲ့ ခက်ခဲတဲ့အချိန်တွေကို ဖြတ်သန်းခဲ့ရတယ်လို့ထင်ပါတယ်။ မှားမှားမှန်မှန် ဝေဖန်ခံခဲ့ရပါတယ်။ သူနဲ့ တန်ဟက်ကြားမှာဖြစ်ခဲ့တဲ့ပြဿနာက ဘယ်သူမှား ဘယ်သူမှန်တယ်ဆိုတာကို ငြင်းခုန်ရမယ့် ပြဿနာမျိုးပါ။ ဒါပေမယ့် သူက ပြင်းပြင်းထန်ထန်ဝေဖန်ခဲ့ရတာကြောင့် ယုံကြည်မှုကျဆင်းသွားခဲ့ပါတယ်။ ပြီးတော့ အသင်းဖော်တွေနဲ့ လေ့ကျင့်ခွင့်မရှိတာ ကစားသမားတစ်ယောက်အတွက် အရမ်းခက်ခဲပါတယ်။ ကျွန်တော်ကတော့ သူ့မှာ ကိုယ်ရည်ကိုယ်သွေးရှိတယ်လို့ ယုံကြည်ပါတယ်” လို့ပြောကြားခဲ့ပါတယ်။