ချဲလ်ဆီးနည်းပြ အန်ဇိုမာရက်စ်ကာက ကလပ်ကမ္ဘာ့ဖလားဗိုလ်လုပွဲမှာ အနိုင်ရရှိပြီး တစ်လမပြည့်သေးခင်မှာ ပြန်လည်စတင်ရတဲ့အခြေအနေကြောင့် အသင်းရဲ့ ရာသီကြိုပြင်ဆင်မှုတွေဟာ "အရမ်းရှုပ်ထွေးတယ်" လို့ ပြောကြားခဲ့ပြီး အခုနှစ်ရဲ့ထူးခြားတဲ့အချိန်ဇယားကြောင့် အသင်းအတွက် စိန်ခေါ်မှုတွေရှိနေတယ်လို့ ဆိုပါတယ်။ စတန်းဖို့ဒ်ဘရစ်ချ်မှာ လေဗာကူဆင်ကို ၂-၀ ဂိုးနဲ့ အနိုင်ရရှိခဲ့ပေမဲ့လည်း လာမယ့်ရာသီအတွက် ပြင်ဆင်ရတာတွေခက်ခဲတယ်လို့ မာရက်စ်ကာက ဝန်ခံခဲ့ပါတယ်။ 

မာရက်စ်ကာက"ဒီလိုမျိုးဖြစ်တာက ပထမဆုံးအကြိမ်ဖြစ်တာကြောင့် ဘယ်လိုလုပ်ရမယ်ဆိုတာ ကျွန်တော်တို့မသိပါဘူး။ ဒါက အရမ်းရှုပ်ထွေးပါတယ်" လို့ ပွဲအပြီးမှာပြောကြားခဲ့ပါတယ်။ အသင်းက လေ့ကျင့်ခန်းစတာရက်ပဲရှိသေးတာကြောင့် ရာသီအနားယူချိန်မရှိသလိုခံစားနေရတယ်လို့လည်း ဆိုပါတယ်။ ပွဲဦးထွက်ကစားသမား အက်စ်တီဗာအိုရဲ့သွင်းဂိုးနဲ့ ဒုတိယပိုင်းလူစားလဲဝင်ရောက်လာတဲ့ ဂျာအိုပက်ဒရိုရဲ့သွင်းဂိုးတွေကြောင့် လေဗာကူဆင်ကို အနိုင်ရရှိခဲ့ပေမဲ့ မာရက်စ်ကာကတော့ ရှေ့မှာခက်ခဲတဲ့ပွဲစဉ်တွေစောင့်ကြိုနေတယ်လို့ အလေးအနက်ပြောကြားခဲ့ပါတယ်။ 

"ကျွန်တော်တို့အနေနဲ့ ရာသီကြိုလေ့ကျင့်မှုတွေ မလုပ်နိုင်ပါဘူး၊ အချိန်မရှိလို့ပါ။ တနင်္ဂနွေနေ့မှာ နောက်ထပ်ကစားရမယ့်ပွဲရှိသေးတယ်၊ ပြီးရင် တရားဝင်ပွဲစဉ်တွေစရတော့မယ်။ ဒါက အရမ်းရှုပ်ထွေးပါတယ်" လို့ မာရက်စ်ကာက ထပ်လောင်းပြောကြားခဲ့ပါတယ်။ ချဲလ်ဆီးအသင်းဟာ လာမယ့်ပွဲအဖြစ် အေစီမီလန်အသင်းနဲ့ကစားရမှာဖြစ်ပြီး လာမယ့်သီတင်းပတ်မှာတော့ ပရီးမီးယားလိဂ်ပွဲစဉ်အဖြစ် ခရစ္စတယ်ပဲလေ့စ်အသင်းနဲ့ ရင်ဆိုင်ရမှာဖြစ်ပါတယ်။