ချဲလ်ဆီးဟာ ပေါ်တူဂီကလပ် စပို့တင်းလစ္စဘွန်းကြယ်ပွင့် ဂျီယိုဗာနီကွမ်ဒါကို ခေါ်ယူဖို့အတွက် သဘောတူညီမှုရရှိခဲ့ပြီးနောက် နောက်ထပ်ကွင်းလယ်ကြယ်ပွင့်ကစားသမားတစ်ဦးဖြစ်တဲ့ ဒါရီယိုအက်ဆူဂိုကိုပါ ပေါင် ၁၈.၅ သန်းနဲ့ထပ်မံခေါ်ယူဖို့ သဘောတူညီမှုရထားတယ်လို့ သတင်းတွေထွက်ပေါ်လာပါတယ်။ 

နာမည်ကျော်ဂျာနယ်လစ် ဘန်ယာကော့ဘ်ရဲ့အဆိုအရ ချဲလ်ဆီးဟာ အက်ဆူဂိုကို ၇ နှစ်သက်တမ်းရှိစာချုပ်တစ်ရပ် ချုပ်ဆိုသွားမှာဖြစ်ပြီး ကစားသမားအနေနဲ့ အသင်းမှာဆက်လက်နေထိုင်ဖို့ နောက်ထပ်အပိုတစ်နှစ်ရွေးချယ်ခွင့်ရသွားဦးမယ်လို့သိရပါတယ်။ လက်ရှိသဘောတူညီချက်အရတော့ စပို့တင်းလစ္စဘွန်းဟာ ချဲလ်ဆီးထံမှ အပိုဆုကြေးတော့ရရှိသွားမှာဟုတ်ပါဘူး။ 

မကြာသေးမီရက်ပိုင်းအတွင်းမှာပဲ ချဲလ်ဆီးဟာ စပို့တင်းလစ္စဘွန်းရဲ့ အသက်-၁၇ နှစ်အရွယ်ပါရမီရှင်ကစားသမားလေး ကွမ်ဒါကို ပေါင် ၄၂ သန်းနဲ့ခေါ်ယူဖို့ သဘောတူညီမှုရရှိထားတာလည်းဖြစ်ပါတယ်။ ဒါကြောင့် အန်ဇိုမာရက်စ်ကာရဲ့အသင်းဟာ လာမယ့် ၂၀၂၅-၂၆ ရာသီအတွက် ကြိုတင်ပြင်ဆင်မှုတွေကို အခုကတည်းက စတင်လုပ်ဆောင်နေပြီလို့ဆိုရမှာဖြစ်ပါတယ်။
 
အသက်-၂၀ နှစ်အရွယ် အက်ဆူဂိုက လက်ရှိအချိန်မှာတော့ လက်စ်ပါးမက်စ်မှာ အငှားစာချုပ်နဲ့သွားရောက်ကစားနေတာဖြစ်ပြီး သတင်းတွေအရ ချဲလ်ဆီးဟာ ပေါ်တူဂီသားကို ၁၈ လကြာအထိ စောင့်ကြည့်နေခဲ့တာဖြစ်တယ်လို့လည်းသိရပါတယ်။ အပြောင်းအရွှေ့သတင်းတွေရဲ့တစ်ဖက် လာမယ့်တနင်္ဂနွေနေ့မှာ အန်ဇိုမာရက်စ်ကာရဲ့ချဲလ်ဆီးဟာ ခက်ခဲတဲ့ပရီးမီးယားလိဂ်ပွဲစဉ်အဖြစ် လန်ဒန်မြို့ခံပြိုင်ဘက် အာဆင်နယ်နဲ့ယှဉ်ပြိုင်သွားရမှာဖြစ်ပါတယ်။