ချဲလ်ဆီးဟာ အငှားစာချုပ်နဲ့ခေါ်ယူထားခဲ့တဲ့ မန်ချက်စတာယူနိုက်တက်တောင်ပံကစားသမား ဂျေဒန်ဆန်ချိုကို ရာသီကုန်မှာ အပြီးသတ်ဝယ်ယူသွားမှာမဟုတ်ဘဲ အိုးလ်ထရက်ဖို့ဒ်သို့ ပြန်လည်စေလွှတ်သွားနိုင်တယ်လို့ သတင်းတွေက ဖော်ပြလာခဲ့ပါတယ်။ 

မန်ချက်စတာယူနိုက်တက်နည်းပြဟောင်း အဲရစ်တန်ဟက်နဲ့ ပုဂ္ဂိုလ်ရေးဆိုင်ရာသဘောထားမတိုက်ဆိုင်မှုတွေရှိခဲ့တဲ့ ဆန်ချိုဟာ ပြီးခဲ့တဲ့နွေရာသီမှာ ယူနိုက်တက်မှထွက်ခွာလာပြီး ပြိုင်ဘက်ပရီးမီးယားလိဂ်ကလပ် ချဲလ်ဆီးသို့ အငှားစာချုပ်နဲ့ ပြောင်းရွှေ့ခဲ့တာဖြစ်ပါတယ်။ စာချုပ်ပါသဘောတူညီချက်တွေအရ ချဲလ်ဆီးအနေနဲ့ ရာသီကုန်မှာ ပရီးမီးယားလိဂ်အမှတ်ပေးဇယားရဲ့အဆင့် ၁၄ နဲ့အထက်ရပ်တည်နိုင်ပြီး ပြောင်းရွှေ့ကြေးပေါင် ၂၅ သန်းဝန်းကျင်ပေးချေမယ်ဆိုရင် ဆန်ချိုကို အပြီးသတ်ခေါ်ယူနိုင်မှာဖြစ်ပါတယ်။ 

လက်ရှိအချိန်မှာ ချဲလ်ဆီးဟာ အမှတ်ပေးဇယားရဲ့ အဆင့် ၄ နေရာမှာရပ်တည်နေတာကြောင့် ဆန်ချိုဟာ ရာသီကုန်မှာ ယူနိုက်တက်နဲ့အပြီးသတ်လမ်းခွဲနိုင်ချေရှိတယ်လို့ဆိုကြပေမယ့် Daily mail ရဲ့ဖော်ပြချက်အရ အင်္ဂလန်သားဟာ အိုးလ်ထရက်ဖို့ဒ်သို့ပြန်ရောက်ဖို့ ဖြစ်နိုင်ချေရှိတယ်လို့သိရပါတယ်။ ဒါ့အပြင် အနောက်လန်ဒန်ကလပ် ချဲလ်ဆီးဟာ လာမယ့်နွေရာသီအပြောင်းအရွှေ့ဈေးကွက်မှာ တောင်ပံကစားသမားသစ်ခေါ်ယူဖို့အတွက် ရီးရဲလ်ဘက်တစ်ကြယ်ပွင့် ဂျီးဆပ်ရိုဒရီဂွက်ဇ်ကိုလည်း ပစ်မှတ်ထားနေတာဖြစ်ပါတယ်။ 

ဆန်ချိုအနေနဲ့ ချဲလ်ဆီးသို့အပြီးသတ်ပြောင်းရွှေ့မယ်ဆိုပါက ပုဂ္ဂိုလ်ရေးဆိုင်ရာသဘောတူညီချက်တွေကို လက်ခံသွားဖို့လိုပြီး လောလောဆယ်မှာတော့ သတင်းတွေအရ တောင်ပံကစားသမားဟာ အဆိုပါ သဘောတူညီချက်တွေကို လက်ခံခြင်းမရှိသေးဘူးလို့သိရပါတယ်။ ၂၀၂၁ ခုနှစ်မှာ ဆန်ချိုကို ဒေါ့မွန်မှ ပေါင် ၇၃ သန်းပေးချေပြီးဝယ်ယူခဲ့တဲ့ယူနိုက်တက်ကလည်း ပြောင်းရွှေ့ကြေးပေါင် ၁၇ သန်းကို ဂျာမန်ကလပ်ထံပေးချေဖို့ကျန်ရှိနေသေးတာကြောင့် ချဲလ်ဆီးကို ပေါင် ၂၅ သန်းဝန်းကျင်နဲ့အပြီးသတ်ရောင်းချမယ့်အစား အသင်းမှာပဲ ဆက်လက်ထိန်းသိမ်းဖို့ စီစဉ်သွားနိုင်ပါတယ်။ 

ယူနိုက်တက်မှာ တစ်ပတ်လုပ်ခပေါင် ၂ သိန်းခွဲနဲ့ ၅ နှစ်စာချုပ်ချုပ်ဆိုထားတဲ့ ဆန်ချိုရဲ့စာချုပ်ဟာ ၁၆ လအထိသက်တမ်းကျန်ရှိနေသေးတာလည်းဖြစ်ပါတယ်။ သို့သော်လည်း လက်ရှိအချိန်မှာတော့ ကစားသမားရဲ့ တစ်ပတ်လုပ်ခပေါင် ၂ သိန်းခွဲထဲမှ ၁ သိန်းကို ချဲလ်ဆီးဘက်က ပေးချေနေတာဖြစ်ပါတယ်။ ဒါကြောင့် ကစားသမားသာ အိုးလ်ထရက်ဖို့ဒ်သို့ပြန်ရောက်လာပါက ယူနိုက်တက်အနေနဲ့ ပေါင် ၂ သိန်းခွဲအပြည့်ပေးချေသွားရမှာဖြစ်လို့ ဘဏ္ဍာရေးဆိုင်ရာ အခက်အခဲတွေရှိလာနိုင်ပါတယ်။ 

ဆန်ချိုရဲ့ ပြန်လာနိုင်ချေဟာ တန်ကြေးမြင့် ကစားသမားသစ်တွေခေါ်ယူပြီး ယူနိုက်တက်ကိုတည်ဆောက်ဖို့ပြင်ဆင်နေတဲ့ INEOS အဖွဲ့အတွက် ကြီးမားတဲ့စိန်ခေါ်မှုဖြစ်လာနိုင်ချေရှိပါတယ်။ နွေရာသီအပြောင်းအရွှေ့ကာလရောက်ရှိဖို့နီးစပ်လာတာနဲ့အမျှ ချဲလ်ဆီးအနေနဲ့ ဆန်ချိုကို အပြီးသတ်ခေါ်ယူသွားမလား ယူနိုက်တက်ကပဲ ပြန်လည်ခေါ်ယူသွားရမလားဆိုတာ စောင့်ကြည့်သွားရဦးမှာဖြစ်ပါတယ်။