ဝီလ်ဆင်ထွက်ခွာမယ်လို့ အတည်ပြုလာတဲ့ နယူးကာဆယ်
စာချုပ်သက်တမ်းကုန်ဆုံးပြီးနောက် တိုက်စစ်မှူး ဝီလ်ဆင်တစ်ယောက် အသင်းကနေထွက်ခွာမယ်လို့ အတည်ပြုလိုက်ပါတယ်။
အဆိုပါသတင်းကို နယူးကာဆယ်ဘက်က အတည်ပြုခဲ့တာဖြစ်ပြီး ဝီလ်ဆင်ဟာ ၂၀၂၀ တုန်းက ပေါင်သန်း ၂၀ နဲ့ ဘုန်းမောက်အသင်းထံကနေပြောင်းရွှေ့လာခဲ့တာဖြစ်ပါတယ်။ နယူးကာဆယ်အတွက် ဝီလ်ဆင်တစ်ယောက် ပွဲ ၁၃၀ ပါဝင်ကစားခဲ့ကာ ၄၉ ဂိုးသွင်း ၊ ၁၁ ဂိုးဖန်တီးနိုင်ခဲ့ပေမယ့် ပြီးခဲ့တဲ့ရာသီတုန်းက တစ်ဂိုးမှမသွင်းယူနိုင်ခဲ့တာဖြစ်ပါတယ်။ အခုချိန်မှာတော့ ဝီလ်ဆင်အနေနဲ့ အသင်းသစ်ရှာဖွေနေပြီး လိဒ်ယူနိုက်တက် နဲ့ ဘန်လေတို့က ချိတ်ဆက်နေပါတယ်။ ၂ သင်းစလုံးက ပရီးမီးယားလိဂ်ကိုတန်းတက်လာတာကြောင့် တိုက်စစ်ပိုင်းကို အားဖြည့်ချင်နေပါတယ်။ နယူးကာဆယ်ဘက်က ဝီလ်ဆင်ရဲ့ဆုံးဖြတ်ချက်ကို အတည်ပြုခဲ့ပါတယ်။
“ဝီလ်ဆင်တစ်ယောက် အသင်းအတွက် ၅ ရာသီကစားပေးပြီးနောက် ထွက်ခွာတော့မှာပါ။ ၂၀၂၀ ဝက်စ်ဟမ်းနဲ့ပွဲဦးထွက်မှာ ဂိုးသွင်းယူနိုင်ပြီးကတည်းက ကျောနံပတ် ၉ ကိုဝတ်ဆင်ပြီး အသင်းအတွက် အများကြီးအကျိုးပြုခဲ့ပါတယ်။ သူလုပ်ဆောင်ပေးခဲ့တာတွေအတွက် ကျေးဇူးတင်နေမှာပါ။ အနာဂတ်မှာ အောင်မြင်ပါစေလို့ ဆုတောင်းပေးပါတယ်”လို့ နယူးကာဆယ်ဘက်က ကြေညာချက်ထုတ်ပြန်ခဲ့ပါတယ်။ ဝီလ်ဆင်ဟာ ရာသီသစ်မတိုင်ခင် အသင်းသစ်ရှာဖွေရမှာဖြစ်ပြီး နယူးကာဆယ်က ဇူလိုင် ၁၉ ရက်နေ့မှာ ဆဲလ်တစ်နဲ့ ခြေစမ်းပွဲကန်မှာဖြစ်ပါတယ်။
