အာဆင်နယ်နည်းပြ မီကယ် အာတီတာက ဂျူရီယန်တင်ဘာနဲ့ ဘင်ဝှိုက်တို့ရဲ့ ကြံ့ခိုင်မှုအခြေအနေနဲ့ပတ်သက်ပြီး အကောင်းမြင်တဲ့အကြောင်းပြောကြားခဲ့ပြီး အဲဗာတန်နဲ့ ဒီနေ့ည ပရီးမီးယားလိဂ်ပွဲစဉ်မှာ ပါဝင်ကစားနိုင်ခြေရှိတယ်လို့ ပြောကြားခဲ့ပါတယ်။ ဒီသတင်းက လာမယ့်အပတ်မှာ ရီးရဲလ်မက်ဒရစ်နဲ့ ကွာတားဖိုင်နယ်ပွဲစဉ်ကစားရမယ့် အာဆင်နယ်အတွက် အားတက်စရာဖြစ်စေပါတယ်။

အာတီတာဟာ ဖူလ်ဟမ်အသင်းကို အနိုင်ရရှိခဲ့တဲ့ပွဲစဉ်မှာ တင်ဘာနဲ့ နောက်ခံလူ ဂါဘရီရယ်တို့ ဒဏ်ရာရရှိခဲ့တာကြောင့် ခံစစ်ပိုင်းမှာ ကစားသမားတွေ ဒဏ်ရာရရှိမှုနဲ့ ရင်ဆိုင်နေရပါတယ်။ ဘင်ဝှိုက်ကတော့ ဒူးဒဏ်ရာကြောင့် ကစားနိုင်ခဲ့ခြင်းမရှိခဲ့ပါဘူး။ အဲဒီနောက်ပိုင်းမှာ ဂါဘရီရယ်ကတော့ ဒဏ်ရာပြင်းထန်တာကြောင့် ရာသီကုန်အထိ အနားယူရမှာဖြစ်သလို နိုင်ငံအသင်းနဲ့ကစားရင်း ဒဏ်ရာရရှိခဲ့တဲ့ ရီကာဒို ကာလာဖီယိုရီလည်း ဒဏ်ရာကြောင့် အနားယူနေရပါတယ်။

အဓိကကစားသမားတွေ ဒဏ်ရာရရှိနေတာကြောင့် အာတီတာဟာ ဘင်ဝှိုက်နဲ့ တင်ဘာတို့ အမြန်ဆုံးပြန်လာနိုင်ဖို့ မျှော်လင့်နေပြီး အထူးသဖြင့် ရီးရဲလ်မက်ဒရစ်နဲ့ ချန်ပီယံလိဂ်ကွာတားဖိုင်နယ်ပထမအကျော့ကို ရက်အနည်းငယ်အကြာမှာ ကစားရမှာဖြစ်တာကြောင့်ပါ။ စပိန်ကလပ်နဲ့ယှဉ်ပြိုင်ကစားရမယ့်ပွဲစဉ်မှာ ခံစစ်ပိုင်းကစားသမားတွေ အင်အားမပြည့်စုံမှာကို အာဆင်နယ်နည်းပြက စိုးရိမ်နေပါတယ်။

ဒါပေမဲ့ အဲဗာတန်အသင်းနဲ့ ယှဉ်ပြိုင်ကစားမယ့်ပွဲစဉ်အတွက် သောကြာနေ့ကပြောကြားရာမှာ အာတေတာက ဘင်ဝှိုက်နဲ့ တင်ဘာတို့ဟာ ပွဲကစားနိုင်ခြေရှိတယ်လို့ အားတက်စရာစကားပြောကြားခဲ့ပါတယ်။ "ဟုတ်ပါတယ်၊ ကစားနိုင်ခြေရှိပါတယ်။ ပြီးခဲ့တဲ့အပတ်က ကစားသမား ၄ ယောက်လောက် ဆုံးရှုံးခဲ့ရတာကတော့ တော်တော်လေးကိုကြီးမားတဲ့တာဝန်ပါပဲ။ ဒါပေမဲ့ ဘင်နဲ့ ဂျူရီယန်တို့ ဘယ်လိုရှိမလဲဆိုတာ စောင့်ကြည့်ရပါမယ်"လို့ အာတီတာက ပြောပါတယ်။

အာတီတာကတော့ က ဘင်ဝှိုက်ကို ရီးရဲလ်မက်ဒရစ်နဲ့ပွဲစဉ်မတိုင်ခင်မှာ ကစားခွင့်ပေးဖို့လိုပြီး အကယ်၍ သူတို့ကစားသမားတွေကို အစောပိုင်းကစားခွင့်ပေးလိုက်ရင်လည်း နောက်ထပ်ဒဏ်ရာတွေရရှိလာနိုင်ပါတယ်။ အာတီတာက"ကျွန်တော်တို့မှာ အဲဒီလိုအခြေအနေမျိုးတွေ အနည်းငယ်ရှိနေပါတယ်။ ဒါကြောင့် ဘယ်ကစားသမားတွေကို ဘယ်လောက်ကြာအောင် ကစားခွင့်ပေးမလဲဆိုတာကို ဒီနေ့ည ဒါမှမဟုတ် နက်ဖြန်မနက်ပိုင်းမှာ ဆုံးဖြတ်ရပါလိမ့်မယ်"လို့ ထပ်လောင်းပြောကြားခဲ့ပါတယ်။

ဘင်ဝှိုက်ကလွဲရင် ညာနောက်ခံလူနေရာမှာ ကစားမယ့်သူမရှိတာကြောင့် လိုအပ်လာပါက သောမတ်စ်ပါတေးကို အစားထိုးအသုံးပြုရဖို့ရှိပါတယ်။ အာတီတာကလည်း အဲဒီအခြေအနေရှိတယ်လို့ အတည်ပြုပြောကြားခဲ့ပြီး ကွင်းလယ်ကစားသမား ဒီကလန်ရိုက်စ်ကို နောက်ခံလူနေရာမှာ ထည့်သွင်းအသုံးပြုဖို့လည်း အသင့်ရှိတယ်လို့ ဆိုပါတယ်။ 

အာတီတာက "အခြေအနေအရ ဖြေရှင်းနိုင်တဲ့နည်းလမ်းတွေ အနည်းငယ်ရှိပါတယ်။ အဲဒီနည်းလမ်းအတိုင်း ဘယ်လောက်ထိ သွားရမလဲဆိုတာကတော့ မျှော်လင့်ပါတယ်၊ အဲလောက်ထိ မသွားရဖို့မျှော်လင့်ပါတယ်။ ဒါပေမဲ့ နည်းလမ်းတွေတော့ရှိပါတယ်။ အကယ်၍ လိုအပ်လာခဲ့ရင်တော့ ဒီကလန်ရိုက်စ်ကို ကစားခိုင်းမှာပါ" လို့ ပြောကြားခဲ့ပါတယ်။