ပရီးမီးယားလိဂ်ဇယားထိပ်က အာဆင်နယ်နည်းပြ မီကယ်အာတီတာက ဒီဇန်နဝါရီ အပြောင်းအရွှေ့ဟာ ငြိမ်သက်နေမယ်လို့ လူအများက ထင်ကြေးပေးထားကြပေမဲ့ တကယ့်ကို အဆင်ပြေမယ့် အခွင့်အရေးမျိုးသာ ပေါ်လာခဲ့ရင် ပြတ်ပြတ်သားသား လုပ်ဆောင်သွားဖို့ အဆင်သင့်ရှိနေတယ်လို့ ပြောကြားလိုက်ပါတယ်။ 

အမှတ်ပေးဇယား ထိပ်ဆုံးမှာ (၆) မှတ်အသာနဲ့ ဦးဆောင်နေတဲ့ အာဆင်နယ်ဟာ အခုချိန်ထိတော့ လူငယ်ကစားသမားတစ်ဦးကို အငှားချတာလောက်ပဲ လုပ်ဆောင်ထားပါသေးတယ်။ ဒါပေမဲ့ အာတီတာကတော့ မဖြစ်မနေပိုက်ဆံသုံးဖို့ထက် မဟာဗျူဟာမြောက် အဆင်သင့်ဖြစ်နေဖို့က ပိုအရေးကြီးတယ်လို့ အလေးပေး ပြောကြားခဲ့ပါတယ်။  အာတီတာက"အကောင်းဆုံး အခြေအနေကတော့ ကျွန်တော်တို့ လုပ်ငန်းစဉ်တွေကို အတိအကျဖြစ်အောင် လိုအပ်သလောက် အချိန်ပေးပြီး လုပ်ဆောင်တာပါပဲ။ တကယ့် လက်တွေ့မှာတော့ တစ်ခါတလေ အခွင့်အရေးတစ်ခုခု ပေါ်လာတဲ့အခါမှာ ချက်ချင်း လုပ်ဆောင်ရတာမျိုးတွေလည်း ရှိပါတယ်" လို့ ဆိုပါတယ်။ 

ဒီစကားအရ အာဆင်နယ်အနေနဲ့ ကစားသမားသစ် ဝယ်ဖို့ ဖိအားတွေ မရှိနေပေမဲ့ အသင်းရဲ့ ရေရှည်မျှော်မှန်းချက်နဲ့ ကိုက်ညီပြီး အပြောင်းအလဲကြီးကြီးမားမား ဖြစ်စေနိုင်မယ့် ကစားသမားမျိုးကိုတော့ မျက်ခြေမပြတ် စောင့်ကြည့်နေတယ်ဆိုတာ အတည်ပြုပေးလိုက်တာပါပဲ။ အာတီတာရဲ့ မှတ်ချက်တွေထဲမှာ အဓိက အရေးပါတဲ့ အချက်ကတော့ ကစားသမားတစ်ယောက်ရဲ့ စိတ်ဓာတ်ပိုင်းဆိုင်ရာဟာ ညှိနှိုင်းလို့မရတဲ့ အရေးကြီးဆုံးအချက် ဖြစ်တယ်ဆိုတာပါပဲ။ 

အသင်းရဲ့ ကစားသမားသစ် ခေါ်ယူမှု လုပ်ငန်းစဉ်တွေထဲမှာ ပစ်မှတ်ထားတဲ့ ကစားသမားဟာ ပေးထားတဲ့ တာဝန်ကို ကျေပွန်အောင် ထမ်းဆောင်နိုင်ပါ့မလား၊ အသင်းရဲ့ လက်ရှိ ယဉ်ကျေးမှုနဲ့ရော တစ်သားတည်း ဖြစ်နိုင်ပါ့မလား ဆိုတာတွေကို အသေးစိတ် ခွဲခြမ်းစိတ်ဖြာ လေ့လာတာတွေ ပါဝင်တယ်လို့ အာတီတာက ဖွင့်ဟခဲ့ပါတယ်။  အာတီတာက"ဒါက မျှတအောင် ဆုံးဖြတ်ရမယ့် ကိစ္စပါ" လို့ သူက ရှင်းပြခဲ့ပြီး အရည်အချင်းရှိရုံတင် မလုံလောက်ဘူးလို့လည်း မှတ်ချက်ပြုခဲ့ပါတယ်။ 

အရင်တုန်းကလည်း နည်းစနစ်ပိုင်း အရမ်းကောင်းတဲ့ ကစားသမားတွေကို သူတို့ရဲ့ ကိုယ်ရည်ကိုယ်သွေးက အသင်းနဲ့ မကိုက်ညီမှာ စိုးရိမ်တာကြောင့် လက်လွှတ်ခဲ့ရတာမျိုးတွေ ရှိခဲ့တယ်လို့ အာတီတာက ဝန်ခံခဲ့ပါတယ်။