အာဆင်နယ်အသင်းဟာ လက်စတာစီးတီးအသင်းရဲ့ ဆယ်ကျော်သက်ကစားသမား ဂျရမီမွန်ဂါကို ခေါ်ယူဖို့ နီးစပ်နေပြီဖြစ်ပြီး ဒါဟာ သူတို့ရဲ့ ပထမဆုံး နွေရာသီ အပြောင်းအရွှေ့လည်း ဖြစ်လာမှာပါ။

talkSPORT နဲ့ The Standard တို့ရဲ့ ဖော်ပြချက်အရ ပရီမီယံလိဂ်ချန်ပီယံ အာဆင်နယ်အသင်းဟာ လက်စတာစီးတီးရဲ့ အလားအလာရှိတဲ့ လူငယ်ကစားသမား မွန်ဂါကို ခေါ်ယူဖို့ ဆွေးနွေးမှုတွေ အတော်လေး အဆင့်မြင့်နေပြီဖြစ်ပြီး သူဟာ မြောက်လန်ဒန်ကို ပြောင်းရွှေ့ဖို့ အဆင်သင့်ဖြစ်နေပါပြီ။

အသက် ၁၆ နှစ်အရွယ် မွန်ဂါဟာ တကယ့်ကို ပါရမီရှိတဲ့ ကစားသမားတစ်ဦးဖြစ်ပြီး ပရီမီယံလိဂ်မှာ ၇ ပွဲအထိ ကစားပေးထားနိုင်သလို ပြီးခဲ့တဲ့ရာသီ ချန်ပီယံရှစ်ပြိုင်ပွဲမှာလည်း လက်စတာအတွက် ၂၇ ပွဲအထိ ပါဝင်ကစားပေးခဲ့ပါတယ်။

ချန်ပီယံရှစ် အမှတ်ပေးဇယားမှာ ရမှတ် ၄၆ မှတ်နဲ့ အဆင့် ၂၃ နေရာမှာ ရပ်တည်ခဲ့တာကြောင့် လိဂ်ဝမ်းကို တန်းဆင်းသွားခဲ့ရတဲ့ လက်စတာအသင်းကနေ မွန်ဂါဟာ ရာသီသစ်မစခင်မှာပဲ အသင်းပြောင်းဖို့ ဆန္ဒရှိနေတာပါ။

The Metro ရဲ့ အဆိုအရ လက်စတာအသင်းဟာ မွန်ဂါအတွက် ပြောင်းရွှေ့ကြေးကို ပေါင် ၁၀ သန်းကနေ ၁၅ သန်းကြားမှာ အလိုရှိနေပြီး အာဆင်နယ်ကတော့ အဲ့ဒီဈေးနှုန်းအပေါ် ဆွေးနွေးညှိနှိုင်းနေတယ်လို့ သိရပါတယ်။

ဇူလိုင် ၁၀ ရက်နေ့မှာ သူဟာ အသက် ၁၇ နှစ် ပြည့်တော့မှာဖြစ်လို့ အဲ့ဒီအချိန်ကျမှသာ ပြောင်းရွှေ့ကြေးရရှိမှာဖြစ်ပြီး လိဂ်ဝမ်းကနေ ပြန်တက်နိုင်ဖို့ ကြိုးစားနေတဲ့ လက်စတာအတွက်တော့ အဲ့ဒီငွေကြေးက တကယ်ကို လိုအပ်နေတာပါ။

အာဆင်နယ်ဟာ သူတို့ရဲ့ ပရီမီယံလိဂ်ချန်ပီယံဆုကို ကာကွယ်နိုင်မယ့် အသင်းတစ်သင်းဖြစ်လာဖို့ တည်ဆောက်နေတာဖြစ်ပြီး အက်စတွန်ဗီလာက မော်ဂန်ရော်ဂျာနဲ့ ဘုန်းမောက်က ဂျူနီယာ အီလီ ခရူပီတို့ကိုလည်း စိတ်ဝင်စားနေပါတယ်။

မွန်ဂါကို ခေါ်ယူတာဟာ အာတီတာရဲ့ စီမံကိန်းအတွက် ပထမဆုံးခြေလှမ်းဖြစ်ပြီး လေဗာကူဆင်၊ လိုက်ပ်ဇစ်နဲ့ စီးရီးအေက ရိုးမားအသင်းတို့ကပါ စိတ်ဝင်စားမှု မြင့်တက်နေတာကြောင့် အာဆင်နယ်အနေနဲ့ အမြန်ဆုံး အဆုံးသတ်ဖို့ လိုအပ်နေပါတယ်။