နာပိုလီနည်းပြ အန်တိုနီယိုကွန်တီက အသင်းရဲ့ပရိသတ်တွေအနေနဲ့ ယခုနွေရာသီအတွင်း အသင်းသို့စတင်ရောက်ရှိလာခဲ့တဲ့ ကွင်းလယ်လူကယ်ဗင်ဒီဘရိုင်းအပါအဝင် အခြားကစားသမားသစ်တွေကို စိတ်ရှည်ရှည်နဲ့ အချိန်ပေးသွားရမယ်လို့ သတိပေးပြောကြားလာခဲ့ပါတယ်။ 

ပြီးခဲ့တဲ့အပတ်က ဆက်ဆူအိုလိုနဲ့ယှဉ်ပြိုင်ခဲ့တဲ့ စီးရီးအေအဖွင့်ပွဲမှာ ကစားသမားသစ်တွေဖြစ်တဲ့ ဒီဘရိုင်းနဲ့ လော်ရန်ဇိုလူကာတို့ စတင်ပွဲထွက်ကစားခဲ့ကြပါတယ်။ ပေါင်ဒဏ်ရာရနေတဲ့ အဓိကတိုက်စစ်မှူး ရိုမီလူလူကာကူမပါဝင်ပေးမယ့် နာပိုလီဟာ ဒီဘရိုင်း၊ စကော့မက်တိုမီနေးတို့ရဲ့သွင်းဂိုးတွေနဲ့ ဆက်ဆူအူလိုကို ၂ ဂိုးပြတ်အနိုင်ရခဲ့တာကြောင့် အဖွင့်လှခဲ့ပါတယ်။ 

ယခုအခါမှာ ကွန်တီက "တိုးတက်ချင်တဲ့လူအတွက် အခွင့်အရေး‌ဆိုတာ အမြဲတမ်းရှိပါတယ်။ ကျွန်တော့်အနေနဲ့ ဒီညနေ လေ့ကျင်းရေးကွင်းကအခြေအနေကို သဘောကျခဲ့ပြီး ကစားသမားသစ်တွေအပေါ်မှာ မှန်ကန်တဲ့ချဉ်းကပ်မှုတွေပြုလုပ်နိုင်ခဲ့ပါတယ်။ ပြီးခဲ့တဲ့ရာသီကလို ကွင်းလယ် ၃ ယောက်တွဲကစားကွက်နဲ့ ထပ်ကစားနိုင်ဖို့ စမ်းသပ်မှုတွေပြုလုပ်နေပါတယ်။ ဒါပေမယ့် ဒီဘရိုင်းလိုကစားသမားဝင်လာတော့ သိပ်မခက်ခဲပါဘူး"

"အသင်းမှာ စိတ်ဝင်စားစရာကောင်းတဲ့အချက်တွေရှိနေပါတယ်။ အချို့နေရာတွေမှာတော့ အခုထက်ပိုပြီး မြန်မြန်ကစားနိုင်ဖို့လိုနေပါသေးတယ်။ ကစားသမားသစ်တွေကို အသင်းမှာအသားကျဖို့ အချိန်ပေးရပါဦးမယ်။ ဒီရာသီမှာ ချန်ပီယံလိဂ်ဝင်ခွင့်နဲ့ ဆုဖလားအတွက်ယှဉ်ပြိုင်နိုင်တဲ့အသင်းက ၇-၈ သင်းလောက်ရှိပါတယ်။ ဒီရာသီက ပိုခက်လာမှာပါ။ ဒီတော့ အသင်းကို အကောင်းဆုံးတည်ဆောက်နိုင်ဖို့ ကြိုးစားရပါမယ်" လို့ပြောကြားခဲ့ပါတယ်။ 

လာမယ့်တနင်္ဂနွေနေ့မှာတော့ နာပိုလီဟာ ဒုတိယမြောက်စီးရီးအေပွဲစဉ်အဖြစ် ကာဂလီယာရီနဲ့ ယှဉ်ပြိုင်သွားရမှာဖြစ်ပါတယ်။