ခရစ္စတီယာနိုရော်နယ်ဒိုက စက်တင်ဘာ ၂၃ ရက် (ဗုဒ္ဓဟူးနေ့)မှာ သတင်းမီဒီယာတွေနဲ့ တွေ့ဆုံစကားပြောခဲ့ပါတယ်။ အသက် ၄၁ နှစ်အရွယ်ကစားသမားကြီးက ကြာသပတေးနေ့၊ နေးရှင်းလိဂ်ပွဲစဉ်အဖြစ် ဝေးလ်အသင်းနဲ့ရင်ဆိုင်ကစားဖို့ ပေါ်တူဂီလက်ရွေးစင်အသင်းနဲ့အတူ ရှိနေပါတယ်။

သူက နည်းပြဂျော့ဂျီးဆပ်စ်နဲ့အတူ လက်တွဲလုပ်ဆောင်ရမယ့်အခြေအနေကို ပြောကြားခဲ့ပြီး ကွင်းတွင်းကွင်းပြင်ကဏ္ဍနှစ်ခုလုံးမှာ အသင်းအတွက် အသုံးဝင်သူတစ်ဦးအဖြစ် ခံစားလိုတယ်လို့ ပြောကြားခဲ့ပါတယ်။ သူ့ရဲ့အမြင်မှာတော့ လက်ရွေးစင်အသင်းအတွက် အကျိုးရှိနေဆဲပဲလို့ ယူဆထားပါတယ်။
 
"အကယ်၍ နည်းပြသာ ကျွန်တော့်ကို အားမကိုးတော့ဘူးဆိုရင် ကျွန်တော် ဒီနေ့ပဲ ထွက်သွားနိုင်ပါတယ်။ လုံးဝ ပြဿနာမရှိပါဘူး။ ဥက္ကဋ္ဌလည်း အလားတူပါပဲ၊ သူတို့ ကျွန်တော့်ကို မလိုအပ်တော့ဘူးဆိုရင်ပေါ့။ ကျွန်တော် ဘာမှ အသုံးမဝင်တော့ဘူး၊ ကွင်းထဲမှာ ဘာမှ မပေးဆပ်နိုင်တော့ဘူး၊ ဂိုးမသွင်းနိုင်တော့ဘူး သို့မဟုတ် အသင်းထဲမှာ မကောင်းတဲ့ အငွေ့အသက်တွေ ဖန်တီးနေမိပြီ၊ သူတို့ ကျွန်တော့်ကို ဒီမှာ မလိုချင်တော့ဘူးလို့ ခံစားရတဲ့အချိန် အထုပ်အပိုးသယ်ပြီး အရင်ဆုံး ထွက်ခွာသွားမယ့်သူက ကျွန်တော်ပဲ ဖြစ်ပါလိမ့်မယ်" လို့ စီရော်နယ်ဒိုက ပြောကြားခဲ့ပါတယ်။
 
ပေါ်တူဂီသတင်းမီဒီယာတွေရဲ့ ပရိသတ်ဆန္ဒမဲကောက်ယူမှုတစ်ခုမှာ လက်ရှိလူစာရင်းမှ စီရော်နယ်ဒိုကို ချန်လှပ်ထားဖို့ မဲပေးခဲ့ကြပါတယ်။ ဒါပေမဲ့ စီရော်နယ်ဒိုကတော့ ကွင်းတွင်းမှာပဲဖြစ်စေ သို့မဟုတ် အားပေးထောက်သူတစ်ဦးအနေနဲ့ဖြစ်စေ နိုင်ငံ့အတွက် သူ့ကို ယုံကြည်အားကိုးနိုင်တယ်လို့ ပြောကြားခဲ့ပါတယ်။
 
"သူတို့ ကျွန်တော့်ကို အားကိုးရင် ကျွန်တော်လည်း သူတို့ကို အားကိုးပါတယ်၊ ပေါ်တူဂီပြည်သူတွေလည်း ကျွန်တော့်ကို အားကိုးကြပါတယ်... ဒါကြောင့် ဒါက လက်ရွေးစင်အသင်းကိစ္စသက်သက် မဟုတ်ဘူးဆိုတာ ကျွန်တော် သိပါတယ်။ ကျွန်တော်နဲ့ သူတို့အကြားမှာလည်း ဘုံအကျိုးစီးပွားဆိုတာ မရှိတော့ပါဘူး။ ကျွန်တော် လုပ်ပေးနိုင်တာနဲ့ ကျွန်တော် ပေးဆပ်နိုင်သေးတယ်လို့ ယုံကြည်တာကတော့... တကယ်တော့ ယုံကြည်တာတင် မဟုတ်ပါဘူး၊ ကျွန်တော် လုပ်ပြနေဆဲပါပဲ၊ ကိန်းဂဏန်းအချက်အလက်တွေကို ကြည့်ရုံပါပဲ။ အကယ်၍ ရေတွက်တတ်တယ်ဆိုရင် ကျွန်တော် ကောင်းကောင်း လုပ်ဆောင်နေဆဲဖြစ်သလို အပြောင်းအလဲတွေကို ဖန်တီးပေးနေနိုင်ဆဲဆိုတာ မြင်တွေ့ရပါလိမ့်မယ်။ သူတို့ ကျွန်တော့်ကို မလိုအပ်တော့တဲ့နေ့မှာ လုံးဝ ပြဿနာမရှိပါဘူး။ လက်ရွေးစင်အသင်းက ကျွန်တော့်ဆီမှ ဘာပဲလိုအပ်ပါစေ၊ ကျွန်တော် ပေးဆပ်သွားဖို့သလို ဒီဘောလုံးအဖွဲ့ချုပ်ရဲ့ နံပါတ်တစ်အားပေးသူအဖြစ် အမြဲတမ်းရှိနေပါမယ်" လို့ CR7 က ဆိုပါတယ်။
 
"နေရှင်းစ်လိဂ် ဗိုလ်စွဲမလား၊ သွင်းဂိုး ၁,၀၀၀ ပြည့်အောင် လုပ်မလားဆိုရင်တော့ နှစ်ခုလုံးကို လုပ်သွားချင်ပါတယ်။ ဒါ ခေတ်သစ်တစ်ခုပါ။ နိုင်ငံခြားသားတစ်ဦးဖြစ်လို့ ဝေဖန်တိုက်ခိုက်မှုတွေနဲ့ အမြဲရင်ဆိုင်ခဲ့ရပေမဲ့ ကောင်းမွန်တဲ့ စွမ်းဆောင်ရည်တွေကို ပြသခဲ့တဲ့ နည်းပြဟောင်းမာတီနက်ဇ်ကိုလည်း ဂုဏ်ပြုလိုပါတယ်။ အခုတော့ နည်းပြဂျော့ဂျီးဆပ်စ်နဲ့အတူ ခေတ်သစ်တစ်ခုကို စတင်ပါပြီ။ သူလည်း ကောင်းမွန်တဲ့အလုပ်တစ်ခု လုပ်ပြနိုင်မယ်ဆိုတာ သေချာပါတယ်။ သူက ပြီးပြည့်စုံတဲ့ရွေးချယ်မှုတစ်ခုပါပဲ။ ကွဲပြားတဲ့ နည်းစနစ်တွေ၊ မတူညီတဲ့ ဘာသာစကားတွေ ရှိပါတယ်။ အရာအားလုံး အကောင်းဆုံး ဖြစ်လာလိမ့်မယ်လို့ မျှော်လင့်သလို ကျွန်တော်တို့အားလုံးလည်း ယုံကြည်မှု ရှိနေကြပါတယ်" လို့ စီရော်နယ်ဒိုက ဆက်ပြောခဲ့ပါတယ်။

ပေါ်တူဂီအသင်းက နေးရှင်းလိဂ်အုပ်စုအဖွင့်ပွဲစဉ်အဖြစ် ဝေးလ်အသင်းနဲ့ ရင်ဆိုင်ကစားပြီးနောက် ဒုတိယပွဲစဉ်အဖြစ် လာမယ့်တနင်္ဂနွေနေ့မှာ နော်ဝေနဲ့ ရင်ဆိုင်ကစားသွားရပါမယ်။ အခုနိုင်ငံတကာသီတင်းပတ်အတွင်း စီရော်နယ်ဒိုဦးဆောင်လာမယ့်အသင်းက အောက်တိုဘာ ၁ ရက်မှာ ဒိန်းမတ်၊ အောက်တိုဘာ ၄ ရက်မှာ နောက်ထပ်တစ်ကြိမ် နော်ဝေနဲ့ ဆက်လက်ယှဉ်ပြိုင်ကစားသွားရပါမယ်။