နွေရာသီအပြောင်းအရွှေ့ကာလနောက်ဆုံးသီတင်းပတ်တွေမှာ အဲဗာတန်အသင်းက ကြယ်ပွင့်ကစားသမားအန်ဒီယာရီကို အသင်းမှာ ဆက်ထိန်းထားနိုင်မယ်လို့ ယုံကြည်နေပါတယ်။

မာဆေးလ်မှရောက်ရှိလာပြီးနောက် အန်ဒီယာရီက ၂၀၂၄-၂၀၂၅ ပွဲဦးထွက်ရာသီမှာ အဲဗာတန်အတွက် ၁၁ ဂိုးအထိ သွင်းယူပေးခဲ့ပြီး အဲဒီသွင်းဂိုးတွေအနက် ဂူဒီဆင်ပတ်ခ်ကွင်းသမိုင်းတစ်လျှောက် နောက်ဆုံးသွင်းဂိုးလည်း ပါဝင်ပါတယ်။

၂၀၂၅-၂၀၂၆ ဘောလုံးရာသီအစမှာလည်း သူတို့ရဲ့အိမ်ကွင်းသစ်ဖြစ်တဲ့ ဟေးလ်ဒစ်ကင်ဆင်ကွင်းရဲ့ပထမဆုံးသွင်းဂိုးကိုလည်း အန်ဒီယာရီပဲ သွင်းယူခဲ့ပါတယ်။

၂၀၂၅-၂၆ ဘောလုံးရာသီမှာ ခြောက်ဂိုးသာ သွင်းနိုင်ခဲ့လို့ သွင်းဂိုးအရေအတွက် လျော့သွားခဲ့ပေမဲ့လည်း အန်ဒီယာရီက နည်းပြဒေးဗစ်မိုယက်စ်အတွက် အဓိကကွင်းလယ်ဖန်တီးရှင်အဖြစ် ရှိနေသလို မာဆေးဆိုဒ်ကလပ်နဲ့လည်း ၂၀၂၉ ခုနှစ်အထိ စာချုပ်သက်တမ်း ကျန်ရှိနေပါသေးတယ်။

မန်ချက်စတာယူနိုက်တက်က သူ့ကို ပေါင် သန်း ၅၀ ဖြင့် ကမ်းလှမ်းဖို့ စိတ်ဝင်စားမှုအချို့ ရှိခဲ့ပေမဲ့ ပိုပြီးတိကျတဲ့ကမ်းလှမ်းမှုကတော့ ဆော်ဒီပရိုလိဂ်ဆီမှ ရောက်ရှိလာခဲ့ပါတယ်။ အဲဗာတန်ဘက်ကတော့ ပယ်ချခဲ့ပြီး အသင်းရဲ့ဂန္ထဝင်ကစားသမား တိုနီဟစ်ဘတ်ကိုယ်တိုင်လည်း အန်ဒီယာရီကို အသင်းမှာ ဆက်ရှိနေစေရေးအတွက် အစွမ်းကုန်ကြိုးစားသွားကြဖို့ တိုက်တွန်းလိုက်ပါတယ်။

"ဘောလုံးက သူ့ခြေထောက်မှာ ကပ်နေသလိုပါပဲ။ ဒါက အန်ဒီယာရီရဲ့အရည်အသွေး ဘယ်လောက်အထိ ကောင်းသလဲဆိုတာကို မြင်နိုင်ပါတယ်" လို့ ဟစ်ဘတ်က ဆိုပါတယ်။

"သူက ပြိုင်ဘက်တွေရဲ့ပြစ်ဒဏ်ကျူးလွန်မှုကို ခဏခဏ ခံရတတ်ပေမဲ့ ဘောလုံးကို ထိန်းထားနိုင်တဲ့ပုံစံ၊ ခန္ဓာကိုယ် ဟန်ချက်ထိန်းပြီး လိမ်ခေါက်ထွက်တဲ့ ပုံစံတွေကို ကြည့်ရင် တကယ့်ကို ထိပ်တန်းကစားသမားတစ်ဦးဆိုတာ သိသာပါတယ်။ သူ့ကို ကျွန်တော်တို့ အသင်းမှာ ဆက်ထိန်းထားဖို့ လိုပါတယ်။"

"ကျွန်တော်တို့အသင်းအတွက် အောင်မြင်မှုတွေ ရယူချင်တယ်ဆိုရင် အခုတည်ဆောက်နေတဲ့ လမ်းကြောင်းအတိုင်းပဲ ဆက်သွားရပါမယ်။ ဒါကြောင့် အသင်းမှာ အန်ဒီယာရီဆက်ရှိနေဖို့ လိုပါတယ်" လို့ ဟစ်ဘတ်က နိဂုံးချုပ် ပြောကြားခဲ့ပါတယ်။